Read Zokam Ezekiel 48 Bible Online

Ezekiel 48 - Zokam bible

Ezekiel 48

¹"Hihte a min zui-a kigual behte ahi hi: Leilu-lam pangah Dan in tanh khat tang ding hi. Tua in Hethlon pana Lebo d[156] Hamath zuatna lampi dungdung ahi hi; Hamath zomah Hazar Enan le Damascus leilu-lam gamgi hi-in, tua gam nisuahna-lam khen khat le tua gam nitumna-lam khenkhat mah hi ding hi.

²"Asher in tanh khat tang ding hi; tua pen nisuahna-lam pan nitumna-lam dongin Dan tawh kigizawng ding hi.

³"Naphtali in tanh khat tang ding hi; tua pen nisuahna-lam pan nitumna-lam dongin Asher tawh kigizawng ding hi.

⁴"Manasseh in tanh khat tang ding hi; tua pen nisuahna-lam pan nitumna-lam dongin Naphtali tawh kigizawng ding hi.

⁵"Ephraim in tanh khat tang ding hi; tua pen nisuahna-lam pan nitumna-lam dongin Manasseh-te tawh kigizawng ding hi.

⁶Reuben beh in tanh khat tang ding hi; tua pen nisuahna-lam pan nitumna-lam dongin Ephraim tawh kigizawng hi ding hi.

⁷"Judah in tanh khat tang ding hi; tua pen nisuahna-lam pan nitumna dongin Reuben tawh kigizawng ding hi.

⁸"Judah tanhna gamgi panin nisuahna-lam pan nitumna-lam donga tanh khat pen a tuam mahmah letsong piak ahi hi. Tua pen a vai tong e[157] 25,000 hi dinga, adung pen nisuahna-lam pan nitumna-lam dong beh khat tanh tawh kikim ding hi; a laizangah munsiangtho om ding hi.

⁹"A tuam mahmah a TOPA na piak ding uh tanh khat pen adung tong f[158] 25,000, avai tong 10,000 pha ding hi.

¹⁰Hih in a siangtho siampite tanh ding ahi hi. Tua in leilu-lam pang adung tong 25,000 pha dinga, nitumna-lam pang avai tong 10,000 pha dinga nisuahna-lam pang avai tong 10,000 mah pha in leitaw-lam pangah adung tong 25,000 pha ding hi. Tua mun laizang takah TOPA munsiangtho a om ding hi.

¹¹Hih munin Israel-te a manthan hun lai-a gammang Levi-te banga a mang lo muanhuai-a ka na a sem Zadok mite - a kisiansuah siampite ading ahi hi.

¹²Tua in a siangtho leitang tanh khat tang, a siangthopen tanh khat tang a tuam mahmah a kipia tuam hi dinga Levi-te tawh kigizawng ding hi.

¹³"Siampite aa tawh kigizawngin Levi-te in mun-awng khat nei ding uh a, adung tong 25,000, avai tong 10,000 pha ding hi. Adung vekpi sauna tong 25,000 pha in, a zaina tong 10,000 pha ding hi.

¹⁴Amaute in zuak loin na khatpeuh tawh zong a khek peuhmah kei ding uh hi. Hih mun a hoih pen leitang hi-a, TOPA tungah a siangtho-a kipia ahi manin kuama khut tungah a piasawn thei peuhmah kei ding uh hi.

¹⁵"A om lai a vai tong 5,000 pha a, a dung tong 25,000 a pha pen inn lam nading le gankhawk ding - khuapi ai dingin kizang ding hi. Khuapi a laizangah om dinga

¹⁶hih-a kilak cia huang a nei ding hi. Leilu- lam pang tong 4,500, leitaw-lam pang tong 4,500 nisuahna-lam pang tong 4,500. nitumna-lam pang tong 4,500 pha kim ding hi.

¹⁷Khuapi gankhawk ding leilu lamah tong 250, leitaw lamah tong 250, nisuahna lamah tong 250, nitumna lamah tong 250 hi ding hi.

¹⁸A awng lai mun teng a siangtho tanh tawh kigizawngin a sauna tantan nisuahna- lam pang zong tong 10,000 mah pha ding hi. Tua sunga piang peuhmah khuapi sunga nasemte kivakna an hi ding hi.

¹⁹Tua khuapi sunga nasem lokho peuhmah Israel behte pan hi ding hi.

²⁰Hih a kisehtuam leitang buppi a ningkimin tong 25,000 pha ding hi. Khuapi neihsa tawh a siangtho tanh khat tuam koihin a tuam mahmah in na piakhia ding uh hi.

²¹"Khuapi huam sung le a siangtho tanh khat na sehkhiat khit uh ciangin a om lai a pangtuaka mun-awng teng gam-ukpa ading ahi hi. Tua mun pen nisuahna-lam manawhin a siangtho tanh banah gamgi dong tong 25,000 hi dinga, nitumna-lam manawhin nitumna-lam pang gamgi dong tong 25,000 hi ding hi. Hih a langnih tuaka mun-awngte gel minam neute tanh ciacia gam-ukpa ading hi-a, a siangtho tanh le biakinnpi munsiangtho, tuate laizangah a om ding hi.

²²Tua bangin Levi-te neihsa le khuapi neihsa, gam-ukpa tanh mun-awngte kikal laizangah a om ding hi. Tua gam-ukpa tanh mun pen Judah gamgi le Benjamin gamgi kikalah a om ding hi.

²³"A omlai behte ading; Benjamin in tanh khat tang ding hi; tua pen nisuahna-lam pan nitumna-lam manawh in kikhung ding hi.

²⁴"Simeon in tanh khat tang ding hi; tua pen nisuahna-lam pan nitumna- lam ah Benjamin tawh kigizawng ding hi.

²⁵"Issachar in tanh khat tang ding hi; tua pen nisuahna-lam pan nitumna lamah Simeon tawh kigizawng ding hi.

²⁶"Zebulun in tanh khat tang ding hi; tua pen nisuahna-lam pan nitumna lamah Issachar tawh kigizawng ding hi.

²⁷"Gad in tanh khat tang ding hi; tua pen nisuahna-lam pan nitumna lamah Zebulun tawh kigizawng ding hi.

²⁸Gad-te leitaw-lam gamgi pen Tamar pan leitaw lamah kikhung-sukin Meribah Kadesh tui ciang dong ban dinga, tua ciangin Egypt Wadi zui-in Tuipi Lian a[159] dong hi ding hi.

²⁹"Hih in Israel behte in a luah den dingun a kipia leitang hi-a, amaute tanh ding ahi hi, kong ci hi, "Thupipen TOPA in cikhia hi.

³⁰"Khuapi pana pusuahna hih bang ahi hi: Leilu-lam pang pan kipanin tong 4,500 sau-a,

³¹a kongpite min Israel behte min kitamsak ding hi. Leilu-lam panga kongpi thumte Reuben kongpi, Judah kongpi le Levi kongpi hi ding hi.

³²"Nisuahna-lam pang tong 4,500 sau-in, kongpi thum om dinga: Joseph kongpi, Benjamin kongpi le Dan kongpi hi ding hi.

³³"Leitaw-lam pang tong 4,500 sau-in, kongpi thum om dinga; Simeon kongpi, Issachar kongpi le Zebulun kongpi hi ding hi.

³⁴"Nitumna-lam pang tong 4,500 sau-in, kongpi thum om dinga; Gad kongpi, Asher kongpi le Naphtali kongpi hi ding hi.

³⁵"A kimkot khempeuh a gamlatna tong 18,000 a pha hi. "Tuateh tua huna kipan khuapi min: TUA LAI-AH TOPA OM HI kici ding hi," hong ci hi.