Read Zokam Ezekiel 5 Bible Online

Ezekiel 5 - Zokam bible

Ezekiel 5

¹"Mihing tapa aw, tu-in namsau hiam khat la inla na sam le na khamul metna-in sammet tem bangin zang in. Tua ciangin tawi teh inla khen in.

²Na umcih hun a bei ni ciangin tua multe sehthum suah sehkhat khuapi sungah mei-in hal in, sehthum suah sehkhat la inla khuapi kimkot tengah namsau-in satnen in. Tua ciangin a sehthum suah sehkhat pen huih na mut lengsak ding hi. Ahang in, amaute namsau doksa in ka delh ding hi.

³Ahi hangin mul tawmkhat la inla na puanmong ah zepnelh in.

⁴Hihte tawm la leuleu inla mei sungah khulin haltum in. Tua lai panin Israel innkuan buppi ah mei hong kilawh ding hi.

⁵"Hih in Thupipen TOPA thugen ahi hi: Hih Jerusalem ahi hi, minamte laizangah ka omsak a, a kimkotah gamdangte a om uh hi.

⁶Tua hi napi a kima mi namdangte le gamdangte sangin gilo zaw uh a ka thukhamte le ka thukipte a lehdo zaw uh hi.

⁷Tua ahi ciangin hih in Thupipen TOPA thugen ahi hi: Na kimkot a om minamte sangin na thumang kei zaw a, ka thukipte ahikeh ka thukhamte na zui kei hi. Na kimkota minam dangte zuih dinga ka piakte nangawn e[12] na zui kei uh hi.

⁸"Tua ahi ciangin hih bangin Thupipen TOPA in gen hi: Nang Jerusalem langkhatah kei mahmah ka pang dinga minamte muhna-ah dan kong tuaksak ding hi.

⁹A kihhuai na milimte khempeuh uh hangin a tung ngei nai lo le a tung nawn lo ding nang tungah kong tungsak ding hi.

¹⁰Tua ahi manin note lakah na pate un a tate uh ne ding uh a, a tate un a pate uh ne ding uh hi. Note dan kong pia dinga no a omlai sunte khempeuh huih lakah kong thehthang ding hi.

¹¹Tua ahi ciangin Thupipen TOPA in ka nuntakna ka lo hi, na bawl tawm uh milimte le a kihhuai na hihnate uh tawh ka munsiangtho ninsak na hi manun kong angvanna ka dokkik dinga hong hehpih loin kong hingkhawi kei ding hi.

¹²Na mite sehthum suah sehkhat na sungah pulpi-in a sih kei leh a puksi ding uh hi; sehthum suah sehkhat na kulh pua-ah namsau in a si ding uh hi; sehthum suah sehkhat pen huih lakah ka thehthang ding a, namsau kidoksa ka nungdelhsak ding hi.

¹³"Tua ciangin ka hehna dai dinga, amaute tungah ka thangpaihna kiamin ka lungkim ta ding hi; ka phulakna ahi hi. Ka thangpaihna amaute tungah ka zat ciangin TOPA in hong aam a, a pau ka hilam a thei ding uh hi.

¹⁴"Nang kong siasak dinga na sung a tawnkha na kimkota minamte khempeuh in hong simmawh ding uh hi.

¹⁵Heh le thangpai-in note hong tai-a dan kong tuahsak ciangin na kimkot ua om minamte adingin vauhilhna le thuak ding lauhuaina na suak ding uh a, hong kineu-et in, ciamnuihna-in hong kinei ding hi. Kei mah TOPA in kong gen zo hi.

¹⁶Sihna le siat theihna kialpi thaltangte tawh kong kap ciangin note hong siasak dingin kong kap ding hi. Na an ngahna uh ka khak tan dinga, note tungah kialpi ka uangsak semsem ding hi.

¹⁷Note tungah kialpi le gamsa gilote kong sawl dinga ta nei loin hong koih ding uh hi. Pulpi le sisan kiluansakna tawh na kidiah ding uh a, note a susia dingin namsau kong kuansak ding hi. Keimah TOPA in kong ci khin hi," hong ci hi.