Read Zokam Ezekiel 6 Bible Online

Ezekiel 6 - Zokam bible

Ezekiel 6

¹TOPA thu kei tungah hong tunga:

²"Mihing tapa aw, Israel mualliante lam nga in amaute langah thu genkhol inla;

³‘Israel mualliante aw, Thupipen TOPA thugen za un. Hih in Thupipen TOPA in mualliante le mualneute, kuamte le guamte tungah a thugen ahi hi: ‘Keimah in namsau kong kuansak dinga, na munsangte uh ka susia ding hi.

⁴Na biakna-taute uh kisusia in, na gimnamtui halna taute uh ka sukham dinga; na milimte uh mai-ah na mite uh ka that ding hi.

⁵Israel misi luangte a milimte uh mai-ah ka sial dinga, na guhte uh na biakna-tau kimkot uah ka thehthang ding hi.

⁶Na biakna-taute uh kisumangin, kibeisaka na milimte uh kisuzanin a kisiat nading, na gimnamtui tau uh kisukhamin no bawlsa peuhmah a kiphiatmang nadingin na tenna uh khuapite kisusiamangin na munsangte uh a kiphiatmang ding hi.

⁷Note lakah na mite uh puk dinga, keimah TOPA ka hilam na thei ding uh hi.

⁸"‘Ahi hangin gamte le minam dangte lakah na kithehthang uh ciangin namsau panin pawlkhat ka hawi nadingin pawlkhat a suakta ding uh hi.

⁹Tua ciangin minamte laka salin a kikaihna peuhah tua a suaktate in, kei kiang pan kiheikhia-in a angkawmna lungsim uh hang le amaute milimte hanga uanglua-a a khialhnate uh hangin ka lungkhamsak ahilam a phawk ding uh hi. A gitlohna uh le a kihhuai gamtatnate uh hangin amau le amau a kihua ding uh hi.

¹⁰Tua ciangin keimah TOPA ka hilam thei ding uh a, amaute ka tuahsiatsak nading ka genkholhte ka mawk gen ahi loh lam a thei ding uh hi.

¹¹"‘Hih in Thupipen TOPA gen ahi hi: Na khut le na khut tumin lei tuan in,"Tazen aw!" ci-in awngkhia in. Israel innkuante a kihhuai a gamtatna uh le a gitlohnate uh hangin namsau, kialpi le pulpi-in a si ding uh hi.

¹²Gamlapi a omte pulpi in si ding uh a, a nai-a omte namsau-in puk ding uh a, a omlai sun a kihawi laite kialpi in a si ding uh hi. Ka thangpaihna tu-a bangin ka tungsak ding hi.

¹³Tuateh amau milimte lak, a biakna-tau kimkot uh, mualsang tung teng le muallian dawn teng, sing hiangzau nuai teng le tehno teh pha nuai teng - milimte gimnamtui-a a biakna uh mun khempeuh ah a mite uh a sisa-a a om ciangin keimah TOPA ka hilam hong thei ding uh hi.

¹⁴Amaute langkhat ah ka khut ka zankhia dinga, amaute tenna mun teng - a gam uh sehnel-gam pan Diblah a[13] dong gamtul ka suaksak ding hi, Tua ciangin amaute in keimah TOPA ka hilam a thei ding uh hi,’ ci hi," hong ci hi.