Read Zokam Ezekiel 8 Bible Online

Ezekiel 8 - Zokam bible

Ezekiel 8

¹A kum gukna sung, a kha gukna a ninga ni-in, ka inn sunga ka tut laitakin Judah upate ka mai-ah hong tu uh a, tua lai-ah Thupipen TOPA khut ka tungah hong tung hi.

²Ka en a, mihing a[16] lim tawh kibang khat ka mu hi. A kawng nuaisiah mei tawh kibangin, a kawng tungsiah sumsan nawt ngil banga tee khat ka mu hi.

³Amah in khut tawh kibang khat hong zana ka luzang samin hong man hi. Lei le van kikal ah Kha in kei hong domto a, Pasian mangmuhnate sungah amah in Jerusalem leilu-lam a huang sungnunga lutna kongpi a, haza-a hehsuahna milim kitunna mun hong tun hi.

⁴Tua lai-ah zanglei-a ka mangmuh lai-a ka muh bang tektekin Israel-te Pasian’ minthanna ka mai-ah hong om hi.

⁵Tua ciangin amah in kei kiangah, "Mihing tapa aw, leilu-lam en in," hong ci hi. Tua ciangin ka en a, leilu lam pana lutna biakna-tau kongpi ah tua hazatna milim ka mu hi.

⁶Amah in kei kiangah, "Mihing tapa aw, amaute gamtatnate na mu hiam? - hih lai-a Israel innkuante ka munsiangtho tawh a kigamlat semsem nadingin a kihhuai gamta uh hi lo hiam? Ahi hangin a kihhuaizaw na mu lai ding hi," hong ci hi.

⁷Tua ciangin inntual lutna ah hong puak hi. Ka et leh kulh vang khat ka mu hi.

⁸Amah in, "Mihing tapa aw, kulh sung to in," hong ci hi. Kulh sung ka tawh leh tua lai-ah kawvang khat ka mu hi.

⁹Tua ciangin, "A sungah tum inla hih lai-a a kheltatna uh le a kihhuai gamtatnate uh en in," hong ci hi.

¹⁰Tua ciangin lut-a ka khuadak leh kawm tung khempeuh ah a awmtal na namte khempeuh le a kihhuai ganhing Israel innkuante milim khempeuh a kisuai ka mu hi.

¹¹Tuate mai-ah Israel innkuan upate sawmsagih dinga amaute lakah Shaphan tapa Jaazaniah a ding hi. Amaute khut sungah gimnamtui kuang khat ciat tawi uh a, gimnamtui khu a zaamto hi.

¹²Amah in, "Mihing tapa aw, Israel innkuan upate in khuamial sunga a biakbukno a amau milim tungah bang hih ciat uh hiam, cih na mu hiam? Amaute in, ‘TOPA in eite hong mu lo hi; TOPA in hih leitang nusia ta hi,’ ci uh hi," hong ci hi.

¹³Amah in "Amaute in a kihhuai zaw nangawn a hih uh na mu lai ding hi," hong ci lai hi.

¹⁴Tua ciangin TOPA inn lutna leilu lam kongpi ah hong puak a, tua lai ah Tammuz kahin, a thuma tu numeite ka mu hi.

¹⁵Amah in, "Mihing tapa aw, hih na mu hiam? Hih sanga a kihhuai zaw nangawn na mu lai ding hi," hong ci hi.

¹⁶Tua ciangin amah in TOPA inntual sungnungah hong puak a, tua lai-ah biakinnpi lutna mun innlim le biakna-tau kikal ah pasal sawmnih le nga ding khawng a na om hi. Tua biakinnpi nungngatin nisuahna-lam nga uh a, nisuahna lama ni bia-in a kun uh hi.

¹⁷Amah in, "Mihing tapa aw, hih na mu hiam? Hih munah Judah innkuan in a kihhuai na a sep uh kineu seh thei ding ahi hiam? A gamsung uh ngongtatna bekbek tawh dimin tatsat loin kei hong hehsak uh hi lo hiam? Amaute en in, a nak uah singhiang a baang ve-ua leh!

¹⁸Tua ahi manin amaute ka hehna ka thuaksak ding hi; Hehpihna tawh en loin ka zah tuan kei ding hi. Ka bil ah hong kiko uh hangin a gen uh ka ngai kei ding hi," hong ci hi.