Read Zokam Daniel 1 Bible Online

Daniel 1 - Zokam bible

Daniel 1

¹Judah kumpipa Jehoiakim kumpi a suah zawh a kum thumna kumin Babylon kumpipa Nebuchadnezzar va kuana Jerusalem a umcih hi.

²Topa in tuapa khut sungah Judah kumpipa Jehoiakim le Pasian biakinnpi-a vante pawlkhat a pia hi. Amah in tuate Babylonia a[1] a, a pasian biakinn ah tunin a pasian goukholna sungah a koih hi.

³Tua ciangin kumpipa in a zum sunga ulianpipa Ashpenaz kiangah kumpi innkuan sung pan le a nampite panin -

⁴a khangmoi a pumpi ah poina a nei lo, a mel hoih a navak, na khempeuh a kiva, na a thei baih, kumpi inn sungah nasem dinga a cin Israel-te pawlkhat hong sawl in, ci-in thu a pia hi. Amah pen Babylon-te b[2] pau le lai a hilh ding ahi hi.

⁵Kumpipa in ama sabuai pan tuate nisim annek ding le zu dawn ding a pia hi. Amaute kum thum sung kipantah dinga tua khit ciangin kumpipa na sem ding uh hi.

⁶Tuate lakah Judah-te pawlkhat: Daniel, Hananiah, Mishael le Azariah-te kihel uh hi.

⁷Zum ukpipa in amaute minthak phuah a: Daniel min Belteshazzar; Hananiah min Shadrach; Mishael min Mashach, le Azariah min Abednego a phuak hi.

⁸Ahi hangin Daniel in kumpipa an le kumpipa zu-in a kithanghuaisak loh ding tum-a, zum ukpipa tungah tua banga amah le amah a kithanghuaisak loh nadingin phalna a ngen hi.

⁹Tu-in Pasian in Daniel tungah angvanna le hehpihna laksaka,

¹⁰ahi zongin ulianpa in Daniel kiangah, "Na c[3] annek ding uh le na dawn ding uh hong sehsak ka topa kumpipa ka kihta hi. Bang hang hiam cih leh amah in note kum kikimpih khangmoi dangte sangin a gina lo zaw-in hong mu zenzen ding ahi hiam? Tua hileh kumpipa in note hangin ka lu hong tan ding hi," a ci hi.

¹¹Tua ciangin Daniel, Hananiah, Mashael le Azariah cing dinga zum ukpipa in a koihpa kiangah Daniel in,

¹²"Nong hehpihna-in ko na nasemte ni sawm sung hong zia-et phot dih in: Ka nek ding uh anteh singgah le ka dawn ding uh tuisik longal hong pia kei in.

¹³Tua ciangin kumpipa an ne tua khangnote tawh hong enkak inla na nasemte nong muhna tawh kizui-in hong bawl in," a ci hi.

¹⁴Tua ciangin amah thukim a, ni sawm sung a zia-et phot hi.

¹⁵Ni sawm a cin ciangin kumpipa an nete sangin cidamsuakzaw uh a, a ci a sa uh zong a hoihzaw hi.

¹⁶Tua ciangin a cingpa in an limcite leh a dawn ding uh zute lakhia-in tuate tangin anteh-singgah bek a pia hi.

¹⁷Hih khangno lite tungah Pasian in theihna le lai nam khempeuh theihtelna le laisiamna a guan hi. Tua banah Daniel in mangmuhna le mangnamte khempeuh a theitel thei hi.

¹⁸Kumpipa in amaute lah dinga a sehsa hun a cin ciangin zum ukpipa in amaute Nebuchadnezzar a lak hi.

¹⁹Kumpipa in amaute hopih a, Daniel, Hananiah, Mishael le Azariah-te tawh a kibang kuamah a mu kei hi. Tua ahi ciangin amaute kumpipa nasemin a lut uh hi.

²⁰Pilna nam tuamtuam le a thudotnate ah kumpipa in a kumpi gam sung khempeuh-a mitphial siamte le aisan siamte zah sawmin a siam zawk lam uh a mu hi.

²¹Tua hi-a, Kumpipa Cyrus kumpi a suah zawh a kum masapen dong tua lai-ah Daniel a om hi.