Read Zokam Daniel 11 Bible Online

Daniel 11 - Zokam bible

Daniel 11

¹(Na gam-ukpa uh Michael longal kuamah in kei hong panpih lo hi. Kei in Mede mi Darius a kum khatna kumin amah panpih in ka dal hi.)

²"Tua ciangin, tu-in thutak kong geninah: Persia ah kumpi dang thum hong khang dinga, tua khit ciang adang khempeuh sangin a hauzaw tham ding alina hong khang ding hi. Ama hauhna hangin a vangliat ciangin Greece kumpi-gam langpang dingin mi khempeuh a tokbuai ding hi.

³Tua ciangin a thahat kumpi khat khang dinga, tuapa vanglian mahmah in a ut bangbangin gamta ding hi.

⁴Amah a liat khit ciangin a gam kikhenkham dinga vantung huih lite manawhin kikhenthang ding hi. Ama suante in luah lo tham loin a zatsa a vangliatna zong a nei kei ding hi, bang hang hiam cih leh ama ukna gam kibulkalh dinga midangte kipia ding hi.

⁵"Leitaw-lam kumpipa thahat dinga, ahi hangin ama galkap mang liante khat amah sang thahatzaw-in ama aituam kumpi-gam alian vangliatna tawh a uk ding hi.

⁶Kum sawtsim khit ciangin amaute kipawlkhawm ding uh hi. Leitaw-lam kumpipa tanu, kipawlna bawl dingin leilu-lam kumpipa kiangah a pai ding hi; ahi hangin tuanu in a vangliatna lensuak lo dinga, tuapa le a vangliatna b[39] zong a kip kei ding hi. Tua ni ciangin tuapa le a tonpih amah a cingte a pa c[40] le amah a huh peuhmah tawh a ki-apkhawm ding hi.

⁷"Ama muna om dingin ama gui pana piang khat a khangkhia ding hi. Tuapa in leilu-lam kumpipa galkapte sim dinga, kulh sung luhgawp ding hi; amaute do-in a gualzo ding hi.

⁸A pasiante uh, sik milimte le ngun le khama kibawl a vanzatte uh matsakin Egypt ah a pua ding hi. Kum tawmvei sung leilu-lam kumpipa a sim nawn kei ding hi.

⁹Tua ciangin leilu-lam kumpipa in leitaw-lam kumpipa gam sim dinga, ahi hangin ama gamah a nung kik ding hi.

¹⁰A tapate galsim dingin kiging ding uh a galkap tampi a khawm ding uh hi; tuate in tuikhang dallah bangin kulh a tun dongun nawhsuak ding uh hi.

¹¹"Tua ciangin leitaw-lam kumpipa hehsa in kuankhia dinga leilu-lam kumpipa a do ding hi; tuapa in galkap tampi a kuanpih hangin kizo veve ding hi.

¹²Galkapte a kipaikhiatpih ciangin leitaw-lam kumpipa kiphasakin tul tampi ngawng-at dinga, tua hi napi a gualzo suak kei ding hi.

¹³Ahang in, leilu-lam kumpipa in a masa sanga tamzaw galkap kaikhawm dinga kum tampi khit ciangin galhiam cingtaka a nei galkap honpi tawh a kuan ding hi.

¹⁴"Tua hun ciangin leitaw-lam kumpipa langah mi tampi a pang ding uh hi. Mangmuhna a tangtun nadingin na mipihte lak panin a ngonghtatte in lehdo ding uh a, a zo tuan kei ding uh hi.

¹⁵Tua ciangin leilu-lam kumpipa kuanin khuapi umcihna lei sungvumin kulh-a ki-um khuapi a la ding hi. Leitaw-lamte in nang zo lo ding uh a, a galkap hon siampente nangawn un zong a nang zo kei ding uh hi.

¹⁶Gal va simpa in a ututin bawl dinga ama langah a nangzo kuamah a om kei ding hi. Gam Melhoih ah amah le amah kikipsakin a suksiat nading hatna a nei ding hi.

¹⁷A kumpi-gam bup hatna teng tawh amah pai-in leitaw-lam kumpipa tawh kipawl a sawm ding hi. Amah in kumpi-gam a zawhgawp theih nadingin a tanute khat tawh amah kitengsak dinga, ahi zongin ama geelnate a[41] tangtung loin zong a huh thei tuan kei ding hi.

¹⁸Tua ciangin tuipi gei lam sim sawm dinga, amaute tampi a la ding hi; ahi hangin ama hiamgamhna galkap mang khatin zo dinga, ama hiamgamhna ama tungah a tukik ding hi.

¹⁹Hih teng khit ciangin kulha ki-um a gam zuanin kileh kik dinga ahi hangin kimuktu in a puk ding hi; amah a kimukha nawn kei ding hi.

²⁰"Ama zalaihpa in kumpi thupi nadingin siahdong khat a kuankhiasak ding hi. Ahi ta zongin kum tawmno sungin hehna le gal ahi loin amah a kisusia ding hi.

²¹"Ama za pen kumpi zahtakna a kipia nai lo mi zahtak huai lo khat in laih ding hi. Kuamah in a awlmawh loh ciangin kumpi-gam sim dinga zuau siamna hangin a zo ding hi.

²²Tua ciangin zawhlah a nei lo galkap honpi, ama mai panin a kisiakmai ding hi; tuate le thukhunna bawl gam ukpa a kisusia khawm ding hi.

²³Amah tawh kilemna a bawl khit ciangin zuautat dinga mi tawmno tawh a vanglian ding hi.

²⁴Gam haupite a lungmuan uh ciangin va sim dinga a pu a pate hihzawh ngei loh a hih zo ding hi. Gal sunga a ngah uh vante, vanlakte hauhnate a nungzui-te a hawmsak ding hi. Kulhpite zawhgawp sawm dinga - ahi hangin tawlkhat sung bek ahi ding hi.

²⁵"Leitaw-lam kumpipa sim dingin galkap tampi tawh a thahatna le a hangsanna satsuah ding hi. Leitaw-lam kumpipa in zong a thahat mahmah galkap tampi tawh a na do ding hi, ahi hangin amah a kisawmsimna hangin a nang zo kei ding hi.

²⁶Kumpipa tawh an nete in amah siatsak ding hanciamin, a galkapte kivatmai dinga gal sungah tampi a si ding hi.

²⁷Kumpi nih sabuai khatah tukhawmin a lungsim uh gilo tuak ahi manin khat le khat kikhem ding uh a, ahi hangin a lawhcing kei ding uh hi; bang hang hiam cih leh a tawpna dinga kisehsa hun tung lai ding hi.

²⁸Leilu-lam kumpipa neih le lam tampi tawh a gamah ciah kik dinga ahi hangin a lungsimin a siangtho thukhun a langpan ding hi. A ut bangin mawhsak dinga tua ciangin a gamah a ciah ding hi.

²⁹"A kisehsa hun a cin ciangin leitaw-lam sim leuleu dinga, ahi hangin hih hun ciangin a masa lai-te tawh kibang lo ding hi.

³⁰Nitumna gam b[42] tuipi tembawpite in na do ding uh a, a lungkia ding hi. Tua ciangin kileh kikin thukhun siangtho tungah a hehna a tusak ding hi. Amah kileh kik dinga thukhun siangtho a thusim lote a angvan ding hi.

³¹"Agalkapte in biakinnpi um-in kulh buahsakin nisim biakpiakna a beisak ding uh hi. Tua ciangin amaute in a hawmmangsak kihhuaina a koih ding uh hi.

³²Amah in thukhun a nusiate a siatsak nadingin zuau gen siamna zang dinga ahi hangin amau Pasian a theite in kiptakin a nang ding uh hi.

³³"A pilte in tampi thuhilh ding uh a, ahi zongin tawlkhat sung amaute namsau ahikeh meikihal ahikeh kiman ahikeh galmatin a kikai ding hi.

³⁴Amaute a puk uh ciangin huhna tawmbang ngah sam ding uh a, a citak lo mi tampi in amaute a pawl ding uh hi.

³⁵A pil pawlkhatte a bei hun dong kawk bang lo-a a om nadingun kisiansuahin kisiangthosak dinga, amaute a muktu ding uh hi, tua hun pen a kiciangtan hun a tun mateng hi ding hi.

³⁶"Tua kumpipa a ut bangbangin gamta ding hi. Amahmah pasian kici peuhmah tungah kitawisangin kiliansak dinga pasiante’ Pasian langpanna a kiza ngei lo nate a gen ding hi. Thangpaihna a kim hun mateng a gualzo ding hi; ahang in, a kisehsa peuhmah a tun pelmawh kul hi.

³⁷Amahmah, a pate’ pasiante, numeite deihte le pasian khatpeuh thusim loin tuate khempeuh sanga sangzaw in kitawisang ding hi.

³⁸Tuate tangin kulh cing pasian peuh pahbawlzaw dinga; a pate theih loh pasian, ngun le kham, suangmanpha le tampipi man letsongin a pahtawi ding hi.

³⁹Gamdang pasian huhna tawh a khauh penpen kulh sim dinga amah kumpi-a a sangte nasiatakin a pahtawi ding hi. Amaute tampi uksak dinga aman c[43] tawh kizui-in leitang a hawm ding hi.

⁴⁰"A bei ding hun ciangin Leitaw-lam kumpipa in kisim dingin thu zasak dinga, Leilu-lam kumpipa a sakol galkapte, sakolleng le gal tembaw tampi tawh a kuankhia ding hi. Gam tampi sim dinga tuikhang bangin a nawtmai ding hi.

⁴¹Gam Melhoih zong va sim ding hi. Gam tampi in lel dinga ahi hangin ama khut panin Edom, Moab le Ammon makaite kihukhia ding hi.

⁴²Amah in gam tampi tungah a vangliatna khan ding hi; Egypt a suakta kei ding hi.

⁴³Amah in ngun le kham goukholnate le Egypt hauhna khempeuh ukin Libya-te le Nubia-te ama tungah a ki-ap ding uh hi.

⁴⁴Ahi hangin nisuahna-lam le leilu-lam pana thuzaksaknate in amah lauthawngsak ding hi. Thangpai lua-in a susia ding le tampi a sumaimang dingin a kuankhia ding hi.

⁴⁵Amah in a kumpi puanbukte tuipite kikal d[44] mual siangtho melhoih ah a lam ding hi. Tua hi taleh ama hun bei dinga kuamah in a huh kei ding hi.