Read Zokam Daniel 2 Bible Online

Daniel 2 - Zokam bible

Daniel 2

¹Nebuchadnezzar in kumpi a suah zawh a kum nihna kumin mang khat a man hi; a lungsim lauthawnga a ihmu thei kei hi.

²Tua ciangin kumpipa in ama mangmat gen dingin mitphial siamte, aisan siamte, mibum-theite le aksi-en siamte a[4] a samsak hi.

³Amaute a sungah tumin kumpipa mai-ah a din uh ciangin kumpipa in, "Hong patausak mang khat ka man hi, bang a cih nopna hiam ka thei nuam hi," b[5] a ci hi.

⁴Tua ciangin aksi-en siamte in Aram pau in, c[6] "Kumpipa aw, khansawt ta in! Na nasemte tungah na mang hong gen in, tua hileh a khiatna kong gen ding uh hi," a ci uh hi.

⁵Kumpipa in aksi-en siamte kiangah, "Kiptak a ka khensat thu hih ahi hi: Ka mang hong genin a khiatna nong gen theih kei uh leh kong atnen dinga na innte uh nin kholna ka suaksak ding hi.

⁶Ahi hangin mang nong gen theih uh a, a khiatna nong gen theih uh leh kei tung panin letsong, pahtakman le pahtawina lianpi na ngah ding uh hi. Tua ahi ciangin ka mang hong gen unla hong khiatsak un," a ci hi.

⁷Amaute in, "Kumpipa aw, na nasemte tungah na mang hong gen in, tua ciangin a khiatna kong gen ding uh hi," ci-in khatvei a dawng kik uh hi.

⁸Tua ciangin kumpipa in, "Ka lungsim khentatnasa teng tel khin ka hi manin a hun sawt theihtheih nading a zong lel na hilam uh teltakin ka thei hi.

⁹Mang nong gen theih kei uh leh na thuak ding uh dan khat bek a om hi. Lungsim kikhatin thukawng hekhek leng a ngaihsutna khel ding hi, ci-a a lamen na hi uh hi. Tua ahileh ka mang hong gen le uh cin a khiatna zong nong gen theih ding lam uh ka thei ding hi," ci-in a dawng hi.

¹⁰Aksi-en siamte in kumpipa kiangah, "Kumpipa dotna a hih thei leitungah khat beek a om kei ding hi! Bangzah in lianin thahat taleh kumpi khat beek in mitphial siamte, aisan theite le aksi-en siamte tungah tua bang dotna a dong ngei kei hi.

¹¹Kumpipa aw, nong thudot haksa lua mahmah hi. Pasiante longal kuamah in kumpipa tungah a pulaak thei kei ding hi, tua bang mi zong leitung mite lakah a teng kei hi," a ci uh hi.

¹²Hih thu in kumpipa hehsak mahmah a, Babylon mipilte khempeuh thah dingin thu a pia hi.

¹³Tua bangin mipil khempeuh thah nading thukip a om ciangin Daniel le a lawmte zong thah dingin mite kizongsak hi.

¹⁴Babylon a mipil khempeuh that dingin kumpi cingte ukpa Arioch a paikhiat ciangin Daniel in pilvangtak le kidawmtakin amah a hopih hi.

¹⁵Amah in kumpipa ulianpa kiangah, "Bang dinga kumpipa in hizah a kinawh thukip suaksak hi ding hiam?" ci-in a dong hi. Tua ciangin Arioch in Daniel kiangah thupiang teng teltakin a hilh hi.

¹⁶Tua tak ciangin kumpipa kiangah Daniel tuma mang khiatna a gen theih nadingin hun a ngen hi.

¹⁷Tua ciangin Daniel a inn ah ciah a, a lawmte Hananiah, Mishael le Azariah-te kiangah thupiang teng a gen hi.

¹⁸Amah in Babylon a mipil dangte tawh amah le a lawmte a kithahkhawm loh nadingin thuthuk tawh kisai-in van a Pasian tungah lainatna a nget dingun amaute a kun hi.

¹⁹Zan laitakin Daniel in mangmu a tua thuthuk a kilaak hi. Tua ciangin Daniel in vana Pasian phat in:

²⁰"Pasian min a tawntungin kiphat den ta hen; pilna le vangliatna ama aa ahi hi.

²¹Amah in hun le khuahunte a khel hi; kumpite koiha zong a hemkhia hi. Amah in mipilte tungah pilna guana theihsiamna neite tungah theihna a guan hi.

²²Amah in thuthukpi-a a kisel nate laakkhia a; khuamial sunga kikoihte thei-in, amah tawh khuavak a teng hi.

²³Ka pate Pasian aw, ka lungdamin nang kong phat hi. Pilna le vangliatna nong pia khin a, nang kong dot uh kei tungah nong theisak zo hi. Kumpipa mang kote nong theisak khin hi," a ci hi.

²⁴Tua ciangin kumpipa in Babylon mipilte that dinga a sehpa Arioch kiangah, Daniel pai a, "Babylon mipilte that kei in. Kumpipa kiangah kei hong paipih in, a mang ka khiatsak ding hi," a ci hi.

²⁵Arioch in kumpipa kiangah Daniel paipih pah a, "Judah saltangte lak panin na mang khiatna a thei ding mi khat ka mu hi," a ci hi.

²⁶Kumpipa in (Belteshazzar zong a kici) Daniel kiangah, "Ka manga ka muh le a khiatna hong gen thei ding na hi hiam?" ci-in a dong hi.

²⁷Daniel in, "Kumpipa in nong dot thuthuk a gen thei dingin mipil, aisan-siam, mitphial siam, khongkhai thei kuamah a om kei hi;

²⁸ahi hanign thuthukte a laakkhia vantungah Pasian khat a om hi. Amah in Kumpi Nebuchadnezzar tungah mailam huna thu piang ding hong lak khin hi. Na mang le lupna tungah na lup laitaka na lungsim sunga na mangmuhte hihte ahi hi:

²⁹"Kumpipa aw, tua muna na lup laitakin mailam a piang ding thu na ngaihsun hi; thuthukte a lakkhiapa in a piang ding thu hong lak hi.

³⁰Kei midangte sanga ka pilzawk man hi loin nang kumpipa mahmah in hih thuthuk a khiatna na theih nading le na lungsim tawna hong paite na theihtel nadingin kei tungah hong kilaak ahi hi.

³¹"Kumpipa aw, na en a, na mai-ah milim lianpi khat a ding hi - tua milim gol pha mahmah a tee daldal in kihtakhuai hi.

³²Milim lutang teng kham hi-a, a awm le a bante ngun hi-in a gilpi le a pheite sumngo hi-a,

³³a khete sik hi-in, a khepekte sik le buan ki-em ahi hi.

³⁴Na vil gige laitakin mihing khuta kikhuk lo suangtum khat hong tuksuk hi. Tua in sik le buan kihel milim khepek a khazan hi.

³⁵Tua ciangin tua sik, tua buan, tua sumngo, tua ngun le tua kham-te thakhatin kitamzan a, khuakhal lai-a ancilna-a ansi leng tawh kibang hi. Huih in mutmang a, amel-amang kimu nawn lo hi. Ahi hangin tua milim a dengkham suangtum mual lian mahmah khat suaka leitung buppi a dim hi.

³⁶"Na mang hih ahi hi, tu-in a khiatna kong gen ding uh hi.

³⁷Kumpipa aw, nang kumpite kumpipa na hi hi. Vantunga Pasian in nang tungah kumpi-gam, vangliatna, thahatna le minthanna hong pia khin hi;

³⁸na khut sungah mihing le leitung ganhing le huih lak vasate hong pia khin hi. Tuate a tenna peuhpeuh ah nangma uk a suaksak hi. Nang in tua kham lutang na hi hi.

³⁹"Nang nungah nang sanga a gina lo zaw kumpi-gam dang khat a khang ding hi. Tua zomah sumngo kumpi a thumna khang dinga leitung buppi a uk ding hi.

⁴⁰A nunungpenin, sik banga thakhauh a lina kumpi khat a khang ding hi - sik in na khempeuh sukhamin zansak zo hi. Tua hi-a sik in nate a suknen bangin tua pen in adang khempeuh sukhamin zansak ding hi.

⁴¹A khepekte le a khemete khenkhat sik hi-in, khenkhat tungman ki-em-a na muh bang tektekin kumpi-gam kikhenkham ding hi; tua hi napi, tungman le sik kihel na muh bangin tua hun nangawnin sik khauhna zah pawlkhat mah a nei lai ding hi.

⁴²A khemete khenkhat sik hi-in khenkhat tungman ahi mah bangin kumpi-gam zong khenkhat khauhin khenkhat a nem ding hi.

⁴³Sik le tungman kihel khawm na muh bang tektekin mite kihelzau dinga kipawl thei loin sik le tungman mah a bang ding uh hi.

⁴⁴"Tua kumpite hun sungin vantunga Pasian in a kisusia zo lo ding, midangte zong a kiluahsak lo ding kumpi-gam khat a phut ding hi. Tua in tua huna kumpi-gamte khempeuh suzan dinga bei mangsak ding hi; ahi hanign tua gam a kip tawntung ding hi.

⁴⁵Hih in mihing khuta kisukha lo mualtung pana tuksuk suangtumpi khiatna hi a - tua suangtum pen sik, sumngo, tungman, ngun le kham a khazan pen ahi hi. "Mai lama thupiang ding a lian Pasian in kumpipa tungah hong lak khin zo hi. Tua mang thumaan hi-a, a khiatna zong muantak hi," a ci hi.

⁴⁶Tua ciangin Daniel mai-ah Kumpipa Nebuchadnezzar a khup lamin bok a, ama pahtawi-in biak-piakna le gimnamtui-a biakna a piak dingin thu a pia hi.

⁴⁷Kumpipa in Daniel kiangah "Na Pasian, pasiante’ Pasian hitakpi-in kumpite’ Topa hi a, thuthuk a laakkhiapa ahi hi; ahang in, note in hih thuthuk nong laakkhia thei tazen uh hi," a ci hi.

⁴⁸Tua ciangin kumpipa in Daniel zalianpi in koih a, letsong tampitakin pahtawi lai hi. Amah in Babylon gamkhen khempeuh uksak a, tua gam sunga mipil khempeuh ukpipa-in a koih hi.

⁴⁹Tuate banah Daniel ngetsakna hangin kumpipa in Shadrach, Meshach le Abednego-te Babylon gamkhente ukin a koih hi. Daniel ahileh kumpi zumah a om lai hi.