Read Zokam Daniel 3 Bible Online

Daniel 3 - Zokam bible

Daniel 3

¹Kumpipa Nebuchadnezzar in pi sawmkua asang, pi kua a[7] azai kham milim khat bawl a, Babylon gamkhen sung Dura zanglai ah a phut hi.

²Tua ciangin khawk-ukte, uliante, ukpite, thu dotte,sumkemte, thukhente, thu-khen mangte le a gamgama uliante khempeuh tua a phuhsa milim apna ah pai dingin a samsak hi.

³Tua ciangin khawk-ukte, uliante, ukpi-te, thudotte,sumkemte, thukhente, thu-khen mangte le a gamgama uliante khempeuh Nebuchadnezzar phuhsa milim apna ah kikhawm uh a, tua mai-ah a ding uh hi.

⁴Tua ciangin tangkopa in angaih mahmahin tangko-a, "Mite aw, minamte aw, pau namkimte aw, hih in na hih dingua hong kisawl ahi hi:

⁵Saki, tamngai, zither, lyre, harp, gawsem le tumtheih nam khempeuh ging na zak phetun boksukin Kumpipa Nebuchadnezzar phuhsa kham milim na bia ding uh hi.

⁶Boksuk-a a bia lo peuhmah pummei kuanglai sungah kilawn ding hi," a ci hi.

⁷Tua ahi ciangin amaute in saki, tamngai, zither, lyre, harp le tumtheih namkim ging a zak phetun mi khempeuh, minamte, pau nam khempeuh boksukin Kumpipa Nebuchadnezzar phuhsa kham milim a bia uh hi.

⁸Hih hunin aksi-ensiamte b[8] pawlkhat in mipi mai-ah pai-in Jew-te a hek uh hi.

⁹Amaute in Kumpipa Nebuchadnezzar kiangah, "Kumpipa aw, khansawt in!

¹⁰Kumpipa aw, saki, tamngai, zither, lyre, harp, gawsem le tumtheih namkim kitum a za mi peuhmah boksukin kham milim bia dinga

¹¹boksuk lo-a a bia lo peuhmah pummei kuanglai sungah kilawn ding hi, ci-in thukip khat na pia khin hi.

¹²Ahi hangin Babylon gamkhen-uk dinga na koih Jew mi pawlkhat - Shadrach, Meshach le Abednego-te in a thusim kei uh hi, kumpipa aw. Amaute in na pasiante na sem loin na phuhsa kham milim zong a bia nuam kei uh hi," a ci uh hi.

¹³Nebuchadnezzar nak heh lua mahmah a, Shadrach, Meshach le Abednego-te a samsak hi. Tua ciangin tua mite kumpipa mai-ah kipuak a,

¹⁴Nebuchadnezzar in amaute kiangah, "Shadrach, Meshach le Abednego, ka pasiante na sem loin ka phuhsa kham milim na biak loh uh a man mah ahi hiam?

¹⁵Tu-in saki, tamngai, zither, lyre, harp gawsem le tumtheih nam khempeuh ging na zak uh ciangin ka bawlsa milim bia-in na boksuk uh leh hoih mahmah hi. Ahi zongin na biak kei uh leh note pummei kuanglai sungah hong kilawnpah ding hi. Tua ciangin ka khut sung pan bang pasian in note hong hukhia zo ding ahi hiam?" a ci hi.

¹⁶Shadrach, Meshach le Abednego-te in kumpipa kiangah, "Nebuchadnezzar aw, hih thu tawh kisai nang mai-ah ka kihut ding uh kisam lo hi.

¹⁷Pummei kuanglai sungah hong kikhul leh tua panin a na ka sep uh Pasian in kote hong honkhia zo dinga nang khut panin hong hukhia ding hi, kumpipa aw.

¹⁸Ahi zongin hong hutkhiat kei zenzen leh zong nang pasiante na ka sem kei ding uh a, na phuhsa kham milim zong ka biak loh ding lam uh thei in," a ci uh hi.

¹⁹Tua ciangin Nebuchadnezzar heh mahmah a Shadrach, Meshach le Abednego-te tungah a ngaihsutna a kilaih hi. Amah in pummei a sat ngeina zah sangin a zah sagihin a satsak zawk nadingun thu pia a,

²⁰a galkapte lakah a thahatpente, Shadrach, Meshach le Abednego-te hencipsakin amaute pummei kuanglai sungah khul dingin thu a pia hi.

²¹Puantualpite a silh, pheituamtual a teng, dial khim-a, puan dangte a silh hih mite kihencip a pummei kuanglai-ah kilawn hi.

²²Kumpipa thupiakna kinawh lua mahmah a, pummei lah sa lua mahmah ahi manin meikuang in Shadrach, Meshach le Abednego-te a lawn galkapte hullum a,

²³hih mi thumte a kihen bikbeksa-in pummei kuanglai sungah a kiasuk uh hi.

²⁴Tua ciangin Kumpipa Nebuchadnezzar in lamdang sa lua-in diangvat a, a thudotte kiangah, "Hencip-a meikhuk sunga i lot mi thum hi lo hiam?" ci-in a dong hi. Amaute in, "Himah hi, kumpipa aw," ci-in a dawng uh hi.

²⁵Amah in, "En dih un! Mei kuang sungah mi li a vak kawikawi ka mu hi, kihen loin zong liam lo uh hi; a linapa hoh pasiante tapa khat sun!" a ci hi.

²⁶Tua ciangin Nebuchadnezzar in pummei kuanna vang lam manawh in, "Shadrach, Meshach le Abednego no Sangpen Pasian nasemte aw, hong paikhia un! Hih lai-ah hong pai un," ci-in a awng hi. Tua ciangin Shadrach, Meshach le Abednego-te meikuang lak panin paikhia uh a,

²⁷gamkhen-ukte, uliante, ukpite le kumpipa thudotte in amaute a umcih uh hi. A pumpi uh mei in a kat loh lam mu tek tham loin a lu ua samzang a hulkhakna lim nangawn a mu kei uh hi; a puantualpite uh zong kangdeu loin meigim nangawn anam kei uh hi.

²⁸Tua ciangin Nebuchadnezzar in, "Shadrach, Meshach le Abednego-te’ Pasian, a vansawltak sawl-a, a nasemte a hukhiapa kiphat ta hen! Amaute in amah muang uh a, kumpipa thupiak nialin amau Pasian longal Pasian dangte na sep ding le biak ding sangin singam zaw uh hi.

²⁹Tua ahi ciangin minam khatpeuh paunam khatpeuh sunga mite in Shadrach, Meshach le Abednego-te Pasian langpanna khatpeuh a gen leh ki-atnen dinga a innte uh nin buakna mun a suak ding hi, cih thukip kong pia hi, ahang in, hih bangin pasian dangte in a honkhia zo kei ding hi," a ci hi.

³⁰Tua ciangin kumpipa in Shadrach Meshach le Abednego-te Babylon gamkhen ah a za uh a khangsak hi.