Read Zokam Daniel 5 Bible Online

Daniel 5 - Zokam bible

Daniel 5

¹Kumpi Belshazzar in a uliante tulkhat tawh pawi lianpi kham a, zu a dawn khawm uh hi.

²Belshazzar in zu a dawn kawmin amah le a uliante, a zite uh le a zinote uh tawh zu dawnna-a a zat dingun a pa a[12] Nebuchadnezzar in Jerusalem biakinnpi pana a lak ngunhai-tung le kham hai-tungte a lak nadingun thu a pia hi.

³Tua ciangin amaute in Jerusalem a Pasian biakinnpi pana kila kham hai-tungte paipih uh a, kumpipa, a uliante, a zite le a zinote in tuate in a dawn uh hi.

⁴Zu a dawn kawmkawm un kham, ngun, sumngo, sik, sing le suanga kibawl pasiante a phat uh hi.

⁵Thakhatin mihing khut mete kilang a, kumpi inn sung meivak tunna gei, za kizutsa kawm tungah lai kigelh hi. Tua khut in lai a gelh laitakin kumpipa in a mu gige hi.

⁶A mai daang a, lau lua mahmah ahi manin a khukte gel kitat gaugau a, a khete a koncip hi.

⁷Kumpipa in aisan siamte, aksi-en siamte b[13] le khongkhai siamte samsak a, hih Babylon mipilte kiangah, "Hih lai kigelh sim thei-a, a khiatna hong gen theite puan dupsan silhsakin a ngawngah khamkhi ka oksak dinga, kumpi-gam sungah a sangpen pan a thumna-in ka koih ding hi," a ci hi.

⁸Tua ciangin kumpipa mipilte khempeuh lut uh a, ahi hangin amaute in lai kigelh sim theih loin a khiatna zong a gen thei kei uh hi.

⁹Tua ciangin Kumpi Belshazzar lauthawng semsem a, a mai adaang pha semsem hi. A uliante in lah a cih nading uh a thei kei uh hi.

¹⁰Kumpinu c[14] in, kumpipa le a uliante aw a zak ciangin pawi khamna inn sungah lut a, "Kumpipa aw, na khan sawt hen! Patau lua kei in! Tua zahin daang zawzen kei in!

¹¹Na gam sungah a siangtho pasiante kha a nei mi khat a om hi. Na pa hun lai-in pasiante bangin thuthuk theihna, ciimna le pilna a nei mi khat a om hi. Na pa ka cih - Kumpipa Nebuchadnezzar in amah - mitphial siamte, aisan siamte, aksi-en siamte khongkhaite ukpi-in a koih hi.

¹²Tua Daniel, kumpipa in Belteshazzar a cih pa, a lungsim navakin theihna le theihtelna nei a, mang zong khia thei in, dotna haksa pipi dawng thei a, thu haksa pipi vengsak thei hi. Daniel samsak lecin lai kigelh a khiatna hong gen thei ding hi," a ci hi.

¹³Tua ciangin kumpipa mai-ah Daniel kipaipih a kumpipa in a kiangah, "Ka pa kumpipa in Judah gama saltang hong lakte lakah khat Daniel na hi hiam?

¹⁴Nang sungah pasiante kha omin thusim theihna le pil tangtuamna na neih lam ka za hi.

¹⁵Hih lai kigelh sim ding le a khiatna gen dingin mipilte, aisan siamte ka mai-ah hong kipaipih khin hi, ahi zongin amaute in a gentel thei kei uh hi.

¹⁶Tu-in nang in khiatna neite khia thei-in thu haksa pipite vengsak thei hi, ci-in ka za hi. Hih lai kigelh na sim theih a, a khiatna zong na gen theih leh puan dupsan hong silhsakin na ngawngah khamkhi hong ki-oksak dinga kumpi gam sunga alian pen thumna-in hong kikoih ding hi," a ci hi.

¹⁷Tua ciangin Daniel in kumpipa kiangah, "Na letsongte nang kem inla, na pahtakmante midang khatpeuh pia in. Tua hi taleh kumpipa adingin lai kigelhte kong simsak dinga a khiatna zong kong gen ding hi.

¹⁸"Kumpipa aw, Sang Pen Pasian in na pa Nebuchadnezzar a lianpipenin koih a, liatna, minthanna le thupinate a pia hi.

¹⁹Ama piaksa a sanna hangin mite khempeuh, minamte le kampau tuamtuamte in na pa lipkhapin kihta uh hi. Kumpipa in a thah nopte thatin a hawi nopte hawi hi; a sansak nopte sangsakin a niamsak nopte a niamsak hi.

²⁰Ahi hangin ki-uangsakin, kiphasaka lungkhauh ahi manin a kumpi tokhom panin kikhinkhia a, a minthanna kihawkkhiatsak hi.

²¹Mite lak panin kihawlkhiamang a, ganhing lungsim kineisak hi; gamsung sakolte tawh tengkhawma, bawnghonte bangin lopa a ne hi; tua ciangin vana daituite in a pumpi kawtsak a, mihing kumpi-gam ah Sang Pen Pasian a lianpen hi-a, a deih khatpeuh kumpi a suaksak hi, ci-in a telsiang theih matengin tua bangin a om hi.

²²Ahi hangin nang a tapa d[15] Belshazzar aw, hihte khempeuh na theih hangin na kiniamkhiat tuan kei hi.

²³Tua sangsikin nang le nang vantung Topa langah na pang hi. Ama biakinnpi-a hai-tungte na kiangah la-in nang le na uliante, na zite le na zinote in tuate zangin zu na dawn uh hi. Bangmah a mu thei lo, a za thei lo, a telcian thei lo, kham, ngun, sumngo, sik, sing le suang-a kibawl pasiante na phat uh hi. Ahi hangin na nuntakna le na vaite khempeuh a khut sunga a len Pasian na pahtawi kei hi.

²⁴Tua ahi ciangin amah in tua lai a gelh khut khat hong sawl hi.

²⁵"Tua a kigelh laimal hih ahi hi. MENE, MENE, TEKEL, PARSIN e[16].

²⁶"Laimalte a khiatna hih ahi hi: Mene: f[17] Pasian in na kumpi sepna nite sim khina, beisak ta hi.

²⁷Tekel: g[18] Nang hong kitawikhai khina, na leek zo kei hi,

²⁸Peres: h[19] Na kumpi-gam kikhenthang khina, Media-te le Persia-te kipia khin hi," a ci hi.

²⁹Tua ciangin Belshazzar thupiakna tawh Daniel puan dupsan kisilhsakin, a ngawngah khamkhi ki-oksak a, kumpi-gam sungah a sangpen thumna dingin kitangko hi.

³⁰Tua zan mahmah in Babylon-te a[20] kumpipa Belshazzar kithat a,

³¹kum sawmguk le nih a pha Media mi Darius kumpi a suak hi.