Read Zokam Daniel 7 Bible Online

Daniel 7 - Zokam bible

Daniel 7

¹Babylon kumpipa Belshazzar a kum masapen kumin Daniel in mang khat mana, a lupna tungah a lup laitakin a lungsim sungah mangmuhnate a va suak hi. A mangmatnate lai-in a gelh hi.

²Daniel in, "Zana ka mangmuh inah, ka khuadak leh ka mai ah vantung huih lite in tuipi lian a mutgawp uh hi.

³A kibang lo gamsapi li, tuipi sung panin hong pusuakkhia to hi.

⁴"A khatna, humpinelkai tawh kibangin muvanlai kha a nei hi. Ka et laitakin a khate kibotkhia-a mihing bangin a khete gela a din nadingin leitung panin a kikhaang to hi; tua ciangin mihing lungsim kiguan hi.

⁵"Tua ciangin a nihna gamsa ka mai-ah hong om a, vompi tawh kibang hi. A pang khatin kiphongto a, a hate in nakguh thum a kei kawm hi. Tua kiangah, ‘Ding inla sa na kham dong ne in!’ kici hi.

⁶"Tua khit ciangin ka et leh ka mai-ah gamsa dang khat na om a, gialbem tawh kibang hi. Vasa bangin a nungzangah kha li a nei hi. Hih gamsa in lutang li nei a, ukna za amah kipia hi.

⁷"Tua khit ciangin zana ka mangmuhna ah ka et leh ka mai-ah gamsa a lina hong om hi - kihtakhuai-in lauhuai mahmah a, a hat mahmah hi. Tua in sik ha golpi khat nei a, tua tawh na a nek peuhpeuh haizanin valh a, a khamval teng a khe-in a tuancilgawp hi. A ma-a gamsa khempeuh tawh kibang loin ki sawm a nei hi.

⁸"A kite ka ngaihsutsut laitakin ka mai-ah tuate lak pan a pokhia ki neu adang khat hong om a, a mai-a omsa ki thumte a kibotkhia hi. Hih ki in mihing bangin mit nei a, kiphatsak pauna kam khat a nei hi.

⁹"Ka etet laitakin, "kumpi tokhomte kiphah a, Tangkum Pu hong tu hi. A puansilhte vuk bangin pak a; a lu-a samte tuumul bangin a ngo hi. A kumpi tokhom meikuang zuahzuah hi a, a tokhom peite khempeuh a tang leelaa hi.

¹⁰Meikuang gunpi luanga, ama mai pana luang ahi hi. Tul tampi mun tul tampite in ama na a sem uh hi; Tul sawm mun tul sawmte a mai-ah ding uh hi. Thukhen zum ah kitu a, tua ciangin laibute a kilem hi.

¹¹"Tua ciangin tua ki in kiphatsakna kammalte pau ahi manin ka vil gige hi. Tua Gamsa kithatin a pumpi kisusia a meikuang sungah a kikhul dong ka en gega hi.

¹²(Gamsa dangte a thuneihna uh kilakkhiatsak a, ahi hangin hun khat sung a nuntak ding uh kiphal hi.)

¹³"Zana ka mangmuhna ah ka et leh ka mai-ah mihing tapa tawh kibang khat vana meii tungah tuangin hong pai hi. Amah in Tangkum Pu lam manawh a, ama omna munah kipaipih hi.

¹⁴Amah thuneihna, minthanna le alianpipen vangliatna kipia hi; mite, minamte le pau nam khempeuh in amah a bia uh hi. Ama ukna bei ngei loin a kisia ngei kei ding hi; ama kumpi-gam kuamah in a susia kei ding hi.

¹⁵"Keimah Daniel, ka lungsim tawna hong suak ka mangmuhnate in hong linglawngsakin ka lungsim a patausak hi.

¹⁶Tua lai-a dingte khat kiang ka zuan a, hihte khempeuh a khiatna maan ka dong hi. "Tua ciangin amah in hong genin, hihte khiatna hong hilha:

¹⁷‘Gamsa lite, leitunga hong khang ding kumpi li ahi hi.

¹⁸Ahi hangin Sangpen Pa misiangte in kumpi-gam ngah ding uh a, a nei tawntung ding uh hi - hihi a tawntungin nei den ding uh hi,’ ci hi.

¹⁹"Tua ciangin adangte khempeuh tawh a kibang lo a kihtak huai pipen, a sik ha le a sumngo khecin tawh - nek a neih ciangin haizan-a valh-in a khamval teng a tuancilgawp tua gamsa pen a khiatna maan ka thei nuam hi.

²⁰Keimah in a lutunga ki sawm le tua lakah thumte kiakhia a, adang hong poto - ki dangte sang thupizaw tham leh a kilawm, mittang nei-in kiphatsakna a pau kam a neite thu zong ka thei nuam hi.

²¹Ka et laitakin hih ki in misiangte gal in do a,

²²Tangkum Pu hong pai-in Sang Penpa misiangte angvanin thukhenna gena kumpi-gam a neih ding hun uh a tun masiah amaute a zo hi.

²³"Amah in hih bangin hong telgen hi: ‘Gamsa a lina in, leitunga om ding kumpi-gam lina ahi hi. Tua in kumpi-gam dang khempeuh tawh kibang lo dinga, leitung buppi valhtumin, suzanin a tuancil ding hi.

²⁴Tua ki sawmte hih kumpi-gam pana piang kumpi sawm ahi hi. Tuate nungah kumpi khat khang dinga, a mai-ate tawh kilamdang ding hi; amah in kumpi thum a nuaisiah ding hi.

²⁵Amah in Sang Penpa langdona kam pau dinga a misiangte nengniamin a kisehsa hun le upadite khek ding a hanciam ding hi. Ama tungah hun khat le hun lang b[22] sung misiangte a kipia ding hi.

²⁶"‘Ahi hangin thukhen hun kipan ta dinga, ama vangliatna kilakkhiat-sak mangin a tawntungin a kisia dikdek ding hi.

²⁷Tua ciangin van kikupsin nuai-a kumpigam thupi-penna, vangliatna le liatnate Sang Penpa mi misiangte tungah ki-ap ding hi. Ama kumpi-gam in tawntung kumpi-gam hi dinga gam-ukte khempeuh in amah bia-in a thu a mang ding uh hi,’ ci hi.

²⁸"Hih in hih thu a beina ahi hi. Keimah Daniel ka ngaihsutna in hong lauthawngsak mahmah a ka mai a daang hi, ahi zongin hih thu kei guak theihin ka im khinkhian hi," a ci hi.