Read Zokam Daniel 8 Bible Online

Daniel 8 - Zokam bible

Daniel 8

¹Kumpipa Belshazzar kumpi a suah zawh a kum thumna kumin keimah Daniel in kei tunga hong kilaksa banah mang khat ka muh beh lai hi.

²Ka mangmuhna ah Elam gamkhen sung Susa khuapi ah ka om hi; ka mangmuhna ah Ulai hawkguam gei-ah ka om hi.

³Ka ettoh leh ka mai-ah ki nih a nei tuutal khat tua hawkguam gei-ah na dinga a kite a sau hi. A ki khat a khat pen sangin po hakzaw napi a sauzaw hi.

⁴Tua tuutal ka et gige leh nitumna lam, leilu-lam le leitaw-lam a si kawikawi hi. Amah a zo zo ganhing om lo a, ama vangliatna panin kuamah in a hukhia zo kei hi. Ama lungkim bangin gamta-a, a lian mahmah hi.

⁵Hih thu ka ngaihsutsut laitakin thakhatin a mitte gel kikal a kilang ki khat a nei keeltal khat leitung buppi kantanin nitumna-lam pan leitung sikkha lo liangin hong tai veva hi.

⁶Amah hawkguam gei-a ding ki nih a nei tuutal lam manawhin pai-a nakpi-in a si hi.

⁷Tuu bawhgawp a, sii-in a kite gel a siktansak ka mu hi. Tuutal in a nan zawh nadingin hatna a nei kei hi; keel in lei lakah sipai a, tuancilgawp in tuutal a hukhia zo kuamah a om kei hi.

⁸Keeltal lian mahmah hi, ahi hangin a hatpen hun laitakin a ki lianpi kitan a, a ki pona munah a kilang ki li, van huih lite lamah a khangto hi.

⁹Tuate laka khat tungah ki dawng khat mengsawn a, a men tungin neu napi leitaw-lam, nisuahna-lam le Gam Melhoih lamah a vanglian hi.

¹⁰Tua ki vantungte galkap honte a bat dongin khang a, aksi galkap honte pawlkhat leitungah khiasuk a, a tuancilgawp hi.

¹¹Amah le amah mihonte Kumpipa zaha lianin kikoih hi; nisima ama biakpiaknate beisakin a munsiangtho zong a niamkhiat hi.

¹²Tua lehdona hangin misiangtho honpite a[23] le nisim biakpiakna tua ki tungah kipia hi. A hihna peuhpeuh ah lawhcing-a leitungah thumaan a kilawnsuk hi.

¹³Tua ciangin a siangthopa khat kiko ka za a, a siangthopa khat mah in kei kiangah, "Hih mangmuhna - nisim biak piakna, a hawmmangsak lehdona, munsiangtho le mihonte a kituatcilna mangmuhnate a tangtun ding hun bang tanvei sawt lai ding hiam?" hong ci hi.

¹⁴Amah in kei kiangah, "Zingsang, nitak 2,300 sawt ding hi; tua ciangin munsiangtho a kisiansuah kik ding hi," hong ci hi.

¹⁵Keimah Daniel in mangmuhna a khiatna theih ding hanciamin ka et gega laitakin ka mai ah mi tawh a kibang khat hong ding hi.

¹⁶Tua ciangin Ulai panin mihing aw khat ka za a, "Gabriel aw, hih mipa tungah mangmuhna a khiatna gen in," a ci hi.

¹⁷Ka dinna geiah amah hong pai-a laulua in ka khup bawhsuk hi. Amah in kei kiangah, "Mihing tapa aw, na mangmuhna hun tawpna tawh kisai ahilam thei in," hong ci hi.

¹⁸Amah in kei hong hopihpih laitakin khupbawksa in ka ihsip hi. Tua ciangin hong lawnga ka khe-in hong dingsak hi.

¹⁹Hih mangmuhna pen beina hun kiciangtanna b[24] tawh kisai ahi manin mailama thangpaihna hun ciangin bang piang ding hiam, cih kong gen ding hi.

²⁰Ki nih a nei tuutal khat na muh pen Media le Persia kumpite ahi hi.

²¹Keel mulphapi pen Greece kumpipa hi-a, a mitte gel kikala ki golpi in kumpi masapen ahi hi.

²²Ki khat a kitan khit cianga tua muna po ki lite, a minam zui-in kumpi-gam li piang ding cihna hi a, ahi zongin a vangliatna uh a kikim kei ding hi.

²³Amaute kumpi a suah zawh uh a nunung lamah lehdote a gitloh luat mahmah uh ciangin kumpi khauh mahmah, zuauphuah siam mahmah khat khang ding hi.

²⁴Amah hat mahmah dinga, ahi hangin ama hatna ahi kei ding hi. A dipkuathuai piangsakin a hihna peuhpeuh a zo ding hi. Amah in mi thahatte le misiangte a susia ding hi.

²⁵Amah in zuauthu khangsak dinga amah le amah a kiliansak ding hi. Amaute a lung muan uh ciangin amah in tampi that dinga uliante Ukpa langah pang ding hi. Amah a tua cih hangin mihing thahatna kizang loin a kisusia ding hi.

²⁶Na mangmuhna-a nang hong kimusak zingsang le nitakte a maan ahi hi, ahi hangin mailam hun sawtpi cianga tung pan ding ahi manin imcip phot in," hong ci hi.

²⁷Keimah Daniel, ka tha bei lua a, ni tampi sung ka ci a na hi. Tua ciangin ka tho a ka kumpi nasep sem dingin ka kuan hi. Ka mangmuhna in hong lauthawngsak lua-a theihtel zawh hi lo hi.