Read Zokam Daniel 9 Bible Online

Daniel 9 - Zokam bible

Daniel 9

¹Xerxes c[25] (Mede suante khat) tapa Darius, Babylon-te d[26] gam ukpa a a kikoih, a kum masapen kum -

²kumpi a suah zawh a kum masapen kumin, keimah Daniel in, Laisiangtho sunga TOPA in kamsangpa Jeremiah tunga a piak, Jerusalem a siatmang nading kum sawm sagih a sawt ding hi, a cih tawh kizui thu ka telcian hi.

³Tua ciangin Topa Pasian lam ka nga-a an tangin ippi puan silh-in vut kibuakin thungetna le thumna tawh ka kun hi.

⁴TOPA ka Pasian tungah mawh-na pulakin thu ka ngen a: "Alian a kihtakhuai Pasian, amah it a, a thukham a zuite khempeuh tungah a itna thukhun a kiplet Topa aw,

⁵kote gamtakhialin ka mawh zo uh hi. Giloin kong lehdo uh hi; na thupiakte le na thukhamte ka lehngatsan ta uh hi.

⁶Kote in, ka kumpite uh, ka uliante uh le ka pate uh, le ka gamua mite khempeuh tungah na mina thugen, na nasem kamsangte thu ka ngai kei uh hi.

⁷Topa aw, nang na thumaan a, ahi hangin Judah mite le Jerusalem-a mite le anai agamla a om Israel-te khempeuh nang tungah ka muanhuai loh manun nong thehthangna gam khempeuh ah - tuni-in kote maizumna tawh ka kituam uh hi.

⁸TOPA aw, nang tungah hong mawh zo ka hi manun ko le ka kumpite, ka uliante uh le ka pate uh maizumna tawh ka kituam uh hi.

⁹Topa kote Pasian lainatna tawh kidim a amah ka lehdo uh hangin ka mawhna uh hong maisak lai hi;

¹⁰TOPA kote Pasian thu mang loin ama nasem kamsangte tungtawna hong piak thukhamte ka zuih loh uh hangin hong hehpih lai hi.

¹¹Israel-te khempeuh in na thu hong mang nuam lo uh a, na thukhamte palsatin nang hong lehngatsan uh hi. "Tua ahi ciangin nang tungah kote mawh khin ka hi manun Pasian nasem Moses Thukham sunga kigelhsa hamsiatna le ciamsiatna thukhennate ko tungah hong kisung khin hi.

¹²A kigensate na tangtunsakna-in kote le ka gam-ukte uh tungah siatna lianpi na tungsak zo hi. Jerusalem tungah a tungsa thu bangin vantung buppi nuai-ah khatvei beek a tung ngei nai kei hi.

¹³Moses thukham sunga kigelhsa bang tektekin hih siatnate ko tungah hong tung napi ka mawhna uh kisikin TOPA kote Pasian kong zong tuan kei uh a, na thumaan ka thusim tuan kei lai uh hi.

¹⁴TOPA kote Pasian a sepna peuh ah thumaan ahi manin kote tungah siatna hong tun ding TOPA in haksa a sa kei hi; tua hi napi a thu lah ka mang tuan kei uh hi.

¹⁵"Tu-in a mite Egypt pan a khut thahat tawh a lakhia tuni dongin a min a kipsak den Topa Pasian aw, kote mawh in ka khial zo uh hi.

¹⁶Topa aw, amaan na nasepna khempeuh tawh a kituah hangin na khuapi, na mual siangtho Jerusalem tungah hehin thangpai kei in. Kote mawhnate le ka pate uh khialhnate hangin ka kim ka pam-ua mi khempeuh in Jerusalem le na mite hong simmawh uh hi.

¹⁷"Kote Pasian aw, tu-in na nasempa thungetna le thumnate hong za in. Topa aw, nang adinga kilam, a kisiasa na mun siangtho hong angvansak in.

¹⁸Pasian aw, na bil hong ngat inla hong za in; hong en inla nangma Min a pua khuapi a siatna mu in. Kote thumaanna suang hi loin a lian mahmah nangma lainatna muangin kong ngen uh hi.

¹⁹Topa aw, kong ngetna hong za in; Topa aw, hong maisak in! Topa aw, hong za inla na hong sem in! Ka Pasian aw, na khuapi le na mite in nangma Min pua ahi manin nangmah na kikhualna-in hong ziakai kei in," ka ci hi.

²⁰Keima mawhna le ka mipih Israel-te mawhna pulaka pau in thu ka nget laitak le TOPA ka Pasian tungah a mual siangtho ading ka thum laitak -

²¹thu ka ngetnget laitak, nitak biak piak hun pawlin ka mangmuh masak a ka muhsa mipa, Gabriel ka kiangah hong leng vingveng hi.

²²Amah in lam hong lakin ka kiangah, "Daniel aw, thutawng-muhna le theihtelna hong pia dingin kong pai hi.

²³Thu na nget phetin, nang hong kisang koih ahi manin tu-a kong gen ding tawh nang hong kidawng pah hi. Tua ahi manin hong kipuak thu ngaihsunin mangmuhna theitel in.

²⁴"Na mite le na khuapi siangtho in khialhna beisak a[27] nading, mawhna beisak nading, gitlohna thoihdam nading, tawntung thumaanna a tun nading mangmuhna le kamsanna imcip nading le siangthopen b[28] sathau nilh nadingin "Sawm sagih ‘sagihte’ c[29] thukip hi khin hi.

²⁵Hih thu thei inla telcian in: Thukip d[30] a kipiaka kipan Jerusalem a ngei bangin a kilam kik dong sagih ‘sagihte’ hi dinga, Jerusalem kilam kika kipan Sathau-kinilh Pa e[31], ukpa hong pai dong, sawmguk lenih ‘sagihte’ hi ding hi. Kongzing lampite le guampi nei-in kilam kik dinga, ahi hangin lungkham hun sung hi ding hi.

²⁶Sawmguk le nih ‘sagihte’ khit ciangin Sathau-kinilh Pa kithat dinga, bangmah f[32] a nei kei ding hi. Hong pai ding gam-ukpa’ mite in khuapi le munsiangtho a susia ding uh hi. Tuikhang bangin a beina tungin: A bei dongin gal kido ding hi, siatmang ding thukip a kisehsa ahi hi.

²⁷Amah in mi tampi tawh ‘sagih’ g[33] khat sung thukhun bawl dinga, ahi hangin tua ‘sagih’ h[34] kimtan ciangin biakpiakna le biakna a beisak ding hi. Tua ciangin amah in ama tungah a beina thukip a kisunkhiat mateng biakinnpi meng khat tungah a hawmmangsak kihhuaina a koih ding hi," i[35] hong ci hi. j[36]