Read Zokam Hosea 1 Bible Online

Hosea 1 - Zokam bible

Hosea 1

¹Judah kumpi Uzziah, Jotham, Ahaz le Hezekiah-te a man laitak le Israel kumpi Jehoash a[1] a tapa Jeroboam a man laitakin Beeri tapa Hosea tungah TOPA thu tunga:

²TOPA in Hosea tungtawna thugen a kipat ciangin TOPA in ama kiangah "TOPA kiang panin kihemkhia-in hih gamah kizuakna nasia lua ahi manin nang mahmah pai inla a angkawm zi le a muanhuai lo tate la in." a ci hi.

³Tua ciangin amah in Diblaim tanu Gomer tenpih a tuanu gai-in amah tawh tapa khat a nei hi.

⁴Tua ciangin TOPA in Hosea kiangah, "Amah Jezreel ci in, bang hang hiam cih leh Jezreel ah mi phengthahna hangin Jehu innkuante dan ka tuaksak baih dinga Israel kumpi gam ka beisak ding hi.

⁵Tua ni ciangin Jezreel Kuam ah Israel thalpeu ka kuaitan ding hi." a ci hi.

⁶Gomer in nau paii kik a, tanu khat a nei hi.Tua ciangin TOPA in Hosea kiangah, "Keimah in Israel innkuan tungah ka itna lak nawn loin maisak nawn peuhmah lo ding ka hi manin tuanu min Lo-Ruhamah b[2] ci in.

⁷Ahi zongin Judah innkuan tungah ka itna ka lak ding hi; amaute ka hon ding hi - thal tawh hi lo, namsau ahikeh galsimna tawh hi lo, sakolte le sakol-tuangte tawh hi loin, TOPA a maute Pasian tawh ka hon ding hi," a ci hi.

⁸Lo-Ruhamah nawi a dek khit ciangin Gomer in tapa dang khat a nei hi.

⁹Tua ciangin TOPA in,"Note ka mite na hi kei uh a, keimah note Pasian hi lo ka hi manin ama min Lo-Ammi c[3] phuak in."

¹⁰"Tua hi napi Israel-te a kiteh thei lo, a kisim thei lo tuipi gei-a sehnel a bang ding uh hi. Amaute tungah, ‘Note ka mi na hi kei uh hi,’ a kicihna munah a maute, ‘A nungta Pasian tate kici ding hi,’ ci hi.

¹¹Judah mite le Israel mite kigawm kik ding uh a, amaute makai khat kisehin amau gam panin paikhia to ding uh ahi manin tua ni Jezreel ni lianpi ni hi ding hi.