Read Zokam Hosea 10 Bible Online

Hosea 10 - Zokam bible

Hosea 10

¹Israel pen lenggui zaam ahi hi; amah mah in gah a gahkhia hi. A gah a khanna tawh kizui-in biakna-tau a tamzaw a dawh hi; a gam a daupaina tawh kizui-in a suang siangthote a zem hi.

²Amaute lungsim khemhat a, tu-in amaute khialhna thaman a thuak ding uh hi. TOPA in amau biakna-taute phiatmang dinga, a suang siangthote uh a susia ding hi.

³Tua ciangin amaute in, "Eite in TOPA kihta lo i hi manin kumpi i nei kei hi. Ahi hangin kumpi nei taleng zong ei adingin bang sem thei ding ahi hiam?" ci ding uh hi.

⁴Amaute in kamciam tampi nei uh a, a maan loin kiciamin thukimna a bawl uh hi; tua ahi ciangin lokhawhna-a gunei kiakte bangin thu kineihna a khangkhia hi.

⁵Samaria a teng mite in Beth Aven a[27] a bawngno lim a kihta uh hi. Tua pen amau kiang pan kila in saltang ahi manin ama thupina nuam a sa mite hangin thum ding uh a, tua milim bia siampite zong a tuaci ding uh hi.

⁶Tua pen Assyria ah kumpi lianpa adingin siah in kipuak ding hi. Ephraim maimawl ding hi; Israel in a sing milimte b[28] a maizumpih ding hi.

⁷Samaria le a kumpipa, tui maitang-a selkang bangin tui in taimang ding hi.

⁸Gitlohna c[29] munsangte kisusia ding hi - tua in Israel mawhna ahi hi. Lingkungte le thangling kungte khangin a biakna-taute uh a khuh ding hi. Tua ciangin amaute in mualliante tungah, "Ko hong khuh un’" ci ding uh a, mualneute tungah, "Ko hong cipnelh un!" ci ding uh hi.

⁹Israel aw, Gibeah huna kipan na mawh khin zo a, tua lai ah na om suak hi. d[30] Gibeah-ah gilo-a gamtate gal in pha lo ahi hiam?

¹⁰Ka lungkim ciangin amaute dan ka tuaksak ding hi; amaute in mawhna a bawlthuahte uh hangin a thuaksak dingin amaute langah minamte kikaikhawm ding uh hi.

¹¹Ephraim in a kisinsa an cil nuamsa bawngla ahi hi; tua hi-a, a ngawng hoih ah hakkol ka suan ding hi. Ephraim ka hawl dinga Judah in pelloin kho dinga, Jacob in leitang a kalkaang pelmawh ding hi.

¹²Thumaan note a dingin vawh unla, a kip tawntung itna at un. Na leitang sitlaite uh kalkaang un; ahang in ama hong pai mateng leh thumaan guahpi hong zuksak mateng amah TOPA zon hun ahi hi.

¹³Ahi hangin gitlohna na suan uh a, gitlohna atin, zuauphuahna gah na ne hi. Nangma thahatna le na galhang tampite tungah na kingak manin,

¹⁴Shalman in gal do ni-in Beth Arbel vatmai a, nupite le a tate uh tawh leilak a denna hun lai-a bangin na kulh muanhuai khempeuh a kiphiat mai nadingin na mite langkhat ah gal husa a hawk ding hi.

¹⁵Bethel aw, na gitlohna lian ahi manin tua bangin nang tungah hong tung ding hi. Tua ni a suah ciangin Israel kumpipa a kisusia kiuhkeuh ding hi.