Read Zokam Hosea 11 Bible Online

Hosea 11 - Zokam bible

Hosea 11

¹"Israel a naupan lai-in ka it a, Egypt panin ka tapa ka samkhia hi.

²Ahi hangin Israel ka a[31] sap semsem ciangin kei b[32] kiang panin gamla pai semsem hi. Amaute in Baal-te tungah biakna pia uh a, milimte tungah gimnamtui a hal uh hi.

³Keimah in Ephraim lampai kisinsakpa ka hi-a, a bante un amaute ka zam hi; ahi hangin amaute a damsakpa ka hilam a phawk kei uh hi.

⁴Mihing migitna khauzente in amaute ka makaih a, itna in ka khih hi; a ngawng panun hakkolte ka sankhia a, amaute vak dingin ka kunsuk hi.

⁵"Amaute in kisik ding nial uh ahi manin Egypt ah ciah kikin Assyria in amaute uk lo ding ahi hiam?

⁶Amau khuapite sungah namsau kilek dinga, amau kongpi kalhnate kisusia in a geelnate uh kibeisak ding hi.

⁷Ka mite in kei kiang pan kiheisan hong sawm teitei uh hi; Sangpen Pa a sam zawzen uh zongin amah in amaute a tawisang peuhmah kei ding hi.

⁸"Ephraim aw, bang ci-in hong tawpsan thei ding ka hi hiam? Israel aw, bang ci-in mi tungah hong pia thei ding ka hi hiam? Bang ci-in Admah bangin hong bawl thei ding ka hi hiam? Bang ci-in Zeboiim bangin hong bawl thei ding ka hi hiam? Ka sungah ka lungsim kikhel hi; ka khuatuahna teng khang hi.

⁹Ka hehluatna ka tungsak nawn kei dinga, Ephraim zong ka sumaimang kik nawn kei ding hi. Keimah mihing hi loin Pasian ka hi a - note laka om Siangtho Pa ka hi hi. Thangpaisa c[33] in kong pai kei ding hi.

¹⁰Amaute in TOPA zui ding uh hi; humpinelkai bangin amah a hawk ding hi. Amah a hawk ciangin nitumna-lam panin a tate lingkawmin hong pai ding uh hi.

¹¹Amaute vasa bangin Egypt pan, kawlvakhu bangin Assyria pan, ling kawmin hong pai ding uh hi. Amau inn ah amaute ka tengsak ding hi," TOPA in cikhia hi.

¹²Ephraim in zuauthu tawh kei hong umcih a, Israel innkuan in khemna tawh hong umcih hi. Tuateh Judah pen Pasian lang leh a muanhuai, a Siangtho Pa lang nangawn ah a ki-uk thei kei hi.