Read Zokam Hosea 6 Bible Online

Hosea 6 - Zokam bible

Hosea 6

¹"Hong pai un, TOPA lamah kileh ni. Amah in eite hong balnen hangin eite hong damsak ding hi; eite hong liamsak khit hangin i liammate hong tunsak ding hi.

²Ni nih khit ciangin eite hong puahpha dinga; ama omna ah i ten theih nadingin a ni thumna ni-in eite a ngei hong bangsak ding hi.

³Eite in TOPA phawk ni; amah phawk ding ngaihsun tentan ni. Ni a suah pelmawh bangin amah hong kilang pelmawh ding hi; tuklai-a guahzuk bangin eite kiangah hong pai dinga, leitung tui a buak sikhiau guah bangin amah hong pai ding hi."

⁴"Ephraim aw, nang bang hong cih thei ding ka hi hiam? Judah aw, nang bang hong cih thei ding ka hi hiam? Na itpa lah zingsang meiilum tawh kibanga, zing tunga daitui bangin mangthang hi.

⁵Tua ahi ciangin kamsangte zangin kong atnen a, ka muk-a kammalte in kong that hi; ka thukhennate no tungah khuaphia bangin a phia hi.

⁶Ahang in keimah in biakpiakna deih loin lainatna ka deih hi; meihal biaknate sangin Pasian theihna ka deihzaw hi.

⁷Amaute in Adam c[23] bangin thukhun palsat khin uh a - tua lai-ah kei tungah a muanhuai kei uh hi.

⁸Gilead pen migilote khuapi khat hi-a, sisan khekhap tawh a nin hi.

⁹Galgukte in mi khat a buksim bangun siampi honte a tuaci uh hi; amaute in Shechem paina lampi ah that uh a, a zumhuai mawhna a bawl uh hi.

¹⁰Keimah in Israel inn sungah a mulkimhuai na khat ka mu hi. Tua lai-ah, Ephraim kizuakna ah kipia a, Israel a buahsak hi.

¹¹"Nang Judah adingin ahileh an lak hun kiseh khin hi. "Mailam hunah ka mite a kaam uh ka phatsak ciang,