Read Zokam Hosea 7 Bible Online

Hosea 7 - Zokam bible

Hosea 7

¹Israel ka damsak peuhpeuh ciangin Ephraim mawhnate pholak in Samaria tatkhialhnate ki laak ding hi. Amaute in zuauphuak uh a, gutate in inn sung luhin, misuamte in lampi-ah a sut uh hi.

²Ahi hangin amaute in a mau gamtat sia khempeuh ka ciamteh lam a phawk kei uh hi; a mawhnate un amaute valhcip a, ka mai ah a om den uh hi.

³"Amaute in a gitlohna uh tawh a kumpipa uh lungkimsak uh a, a zuau thu uh tawh uliante a nuamsak uh hi.

⁴Amaute angkawm vive hi uh a, annel lom a pawm masiah a empa in a mei mutkuang a kullo meikhuk sunga om tawh kibang uh hi.

⁵I Kumpipa pawi bawl ni-in, kumpipa tapate in zu uang kham mahmah uh a, mi selnohte tawh a kilen uh hi.

⁶Amaute lungtang meikhuk tawh kibang a; amaute in amah gitlohsawmsimna tawh a naih uh hi. Amaute ukluatna in zan tawntung in kanga, zingsang ciangin mei kuanglai bangin a kuang hi.

⁷Amaute khempeuh meikhuk bangin sa uh a; amaute in a uliante uh a valhtum uh hi. A kumpite khempeuh uh puk napi amaute khat beek in kei hong sam lo uh hi.

⁸"Minamte tawh Ephraim kigawma; Ephraim pen a kilumlet lo mohpheng ahi hi.

⁹Gamdangte in amah thanemsak uh a, ahi hangin amah in tua a phawk kei hi. Ama sam lakkan napi amah in a phawk kei hi.

¹⁰Israel kisaktheihna in ama langah teci pang hi; tua hi napi, TOPA ama Pasian lamah kihei loin amah a zong tuan kei hi.

¹¹Ephraim kawlvakhu tawh kibanga, khemnop mahmah in ngaihsutna mel nei lo a - tu-in Egypt samsam in, tu-in Assyria lamah kihei hi.

¹²Amaute a pai uh ciangin ka len ka khuh ding hi; huih laka vasate bangin amaute ka kaikhiasuk ding hi. Amaute a ciakkhawm uh ka zak ciangin amaute ka man ding hi.

¹³Ka kiang panin amaute lampial uh ahi manin gimna thuak ta uh hen! Amaute in kei hong lehdo uh ahi manin amaute tungah siatna tung ta hen! Amaute ka tatkhiat nop hangin kei langkhatah zuauthu a phuak uh hi.

¹⁴Amaute a lungsimun kei tungah hong kiko lo uh a, amau lupna tungah a tau uh hi. Amaute an le zuthak adingin a kikaihkhop a[24] uh hangin kei kiang pan a kiheikhia uh hi.

¹⁵Amaute kisinsakin ka thakhauhsak a, ahi hangin kei langkhat ah a hoih lo sep a sawm uh hi.

¹⁶Sangpen Pa lamah amaute kihei lo uh a, thalpeu neemsa a bang uh hi. Amaute thusimlohna kammalte hangin a makaite uh namsau-in a puk uh hi. Hih thu hangin Egypt gamah amaute mi nuihsatin a om ding uh hi.