Read Zokam Joel 1 Bible Online

Joel 1 - Zokam bible

Joel 1

¹Pethuel’ tapa Joel tungah TOPA kammal a tung hi.

²No upate aw, za un; gamsunga teng khempeuh aw, ngai un. No khan sung ahikeh na pu na pate uh khan hun lai-in hih bang thu piang ngei ahi hiam?

³Na tate uh tungah gen un, a tate uh tungah gensak un; a tate uh akhang akhangin kigensawn uh hen.

⁴A keitan kauphete nek bang teng, kauphe hon in gai khin hi. Kauphe honpite nekbang teng, kauphenote in gai khin hi. Kauphenote nekbang teng kauphe dangte a[1] in gai khin hi.

⁵No zukhamte aw, khanglo unla kap un! Lenggahzu dawnte khempeuh aw, mau un, na mukte pan un zuthak kila mangta ahi manin mau un.

⁶Minam khat in ka gam hong sim-a, vanglian mahmahin sim zawh lohin tam uh a, a ha uh humpinelkai ha bangin, humpinelkai nute ha bangin a hiam hi.

⁷Ka lenggui teng netum uh a, ka theikungte siasak uh hi. Ahawng teng kheuhkhia-in lawnmang uh a, a hiang kang sengsang bek nusia uh hi.

⁸Nungakbit b[2] khat in a khangno lai-a a pasal c[3] a kah bangin puan hampi silhin kap un.

⁹TOPA inn ah an-a biakna le dawntheih-a biak nading om nawn lo hi. TOPA mai-ah nasem siampite thum uh hi.

¹⁰Lote kisia khin a leitang keucipin d[4] lo-a ante kisusia-a, zuthak kangta in, sathau a om nawn kei hi.

¹¹Lokhote aw, dah un; lenggui cingte aw, thum un; mangbuh le mangbuh-ham cingte aw, dah un; bang hang hiam cih leh lo-a an lak ding khempeuh kisia ta hi.

¹²Lengguite keugaw a, theikungte kungkeu hi. Mang kawlsing - nisuh le apple kungte - lo sunga singkung khempeuh keu hi. Mihing lungnopna khempeuh beimang ta hi.

¹³Biakna-tau mai-a nasem no siampite aw, puan hampi silhin thumin tau un. No Pasian mai-a nasemte aw, hong pai unla zan tawntung puan hampi silh un. Ahang in, an-a biakna le dawntheih-a biaknate note Pasian inn ah kibansam ta hi.

¹⁴A siangtho antan sawmin a siangtho kikhop khat sam un. TOPA note Pasian inn ah upate le gama teng mite khempeuh khawm unla TOPA tungah kikokhia un.

¹⁵Tua ni aw, tazen aw! Ahang in, TOPA ni nai ta hi. Thahatpenpa a[5] suksiat bangin hong tung ding hi.

¹⁶Ei mitmuh mahmah in i Pasian inn ah ante - lungnopna le lungdamnate kibansam ta hi lo hiam?

¹⁷Khaicite leikhal b[6] nuai-ah thangbugamh ta! Saala koih ding an om nawn loin an-saalte kisiagawp ta hi.

¹⁸Ganhonte hamham ta! Ganhonte lopa mu zo loin cimawh uh hi. Tuuhonte nangawn in gimlawh uh hi.

¹⁹TOPA aw, nang kong ko hi, lonona mun teng mei in hultum a, gam sunga sing khempeuh meikuangin kangtum hi.

²⁰Luitui khempeuh kangcipa, lonona munte mei in hultum ahi manin gamsate nangawn husam uh hi.