Read Zokam Amos 3 Bible Online

Amos 3 - Zokam bible

Amos 3

¹Israel mite aw, note langkhata TOPA thugen hih thu za un - Egypt pana kong paikhiatpih innkuante aw, hih thu ngai un:

²"Leitung a innkuan khempeuh panin note bek kong teel hi; tua ahi manin na mawhna khempeuh uh hangin dan kong pia ding hi," a ci hi.

³A kithutuak lo minih tonkhawm thei ahi hiam?

⁴A mat ding sa a muh loh ciangin sephih laka humpinelkai mawk hawk ahi hiam? Bangmah a mat loh ciangin a kua sungah mawk humham ahi hiam?

⁵Lei lakah thang-antah kitah lopi-in thangah vasa mawk awk ahi hiam? A sukha om lopi-in thang kimawk sai ahi hiam?

⁶Khuapi sungah pengkul a kimut ciangin mite ling lo uh ahi hiam? Khuapi sungah siatna a tun ciangin TOPA tunsak loh-a tung ahi hiam?

⁷Hi takpi hi, Thupipen TOPA in ama geelna, a nasem kamsangte tungah a laak lohin bangmah a sem kei hi.

⁸Humpinelkai hawk khin hi - kua in kihta lo ahi hiam? Thupipen TOPA in gen khin hi - kamsangte lo kua in gen ding hiam?

⁹Ashdod kulh muanhuaite le Egypt kulh muanhuai-te ah tangko in: "Samaria mualtungah hong kikhawm unla ama mite laka buaina lianpi le kinetniamnate hong en un," ci un.

¹⁰TOPA in, "Amaute in amaana gamtat ding thei lo uh a, a kulh muanhuaite uh mite’ na a suhte uh tawh a dim uh hi," a ci hi

¹¹Tua ahi manin Thupipen TOPA in: "Galte in gam khempeuh zogawp dinga, na mun muanhuaite uh phukpai-in, na kulhpite uh a luhgawp ding uh hi," a ci hi.

¹²Hih in TOPA gen ahi hi: "Tuucingpa in humpinelkai kam panin a kheguh nih ahikeh a bil them khat a ngah bangin, Samaria sunga a lupna mong uh le Damascus a amaute tutna-zal kiu-a tu Israel-te bek kihonkhia ding hi. a[11]

¹³"Topa Thahatpen Pasian, TOPA in: "Hih thu za unla Jacob innkuante langah teci pang un," a ci hi.

¹⁴"A mawhna hanga Israel ka dantat ni ciangin, Bethel biakna-tau ka susia ding hi; biakna-tau kite kisutanin lei-ah kiasuak ding hi.

¹⁵Keimah in phalbi inn le khuakhal inn ka phelkhia ding hi; saiha a kizem innte kisusia-in inn thupite a kisia ding hi," TOPA in cikhia hi.