Read Zokam Amos 5 Bible Online

Amos 5 - Zokam bible

Amos 5

¹Israel innkuante aw, note tawh kisai-a ka tamlawhna hih kammal za un:

²"A Bit Israel pukta hi; tho kik ngei nawn lo ding hi. Ama leitangah lum dildel hi; a phong ding kuamah om lo hi."

³Hih in Thupipen TOPA gen ahi hi: "Israel khuapi lian in a thahat tulkhat kuansak a, zakhat bek nungta lai hi; khuapi khat in a thahat zakhat kuansaka, sawm bek a nungta lai hi,"

⁴Hih in Israel innkuan tunga TOPA gen ahi hi: "Hong zong unla nungta un;

⁵Bethel zong kei un, Gigal ah pai kei un, Beersheba ah zin kei un. Ahang in, Gilgal saltang taktak dinga, Bethel bangmah lo kisuaksak ding hi," b[16]

⁶TOPA zong unla nungta un, tua hikei leh Joseph innkuante tungah mei bangin hong kuang dinga, tua in hulin, Bethel in a phelh ding kuamah a ngah kei ding hi.

⁷Thutang khaatna suah a, thumaan leilaka a lawn note aw,

⁸(Pleiades le Orion bawlpa, khuamialna nisuak tung a suaksakpa, sunni mialsaka zan a suaksak, tuipi tui sama, lei maitanga a sungpa - ama min TOPA ahi hi.

⁹Mun muanhuaite susia dingin amah manlang a, a kilim um mahmah khuapi a susia hi)

¹⁰Note in thukhen zuma thumaan gen siamte na mudah uh a, thumaan gente na hua uh hi.

¹¹Mizawngte na tuancil uh a, a antang teng uh ut lopipi-in na kipiasak uh hi. Tua ahi manin suang kiseek inn na lam uh hangin a sungah na teng kha kei ding uh hi; lenggui hoihna lo na neih uh hangin lenggahzu na dawn kha kei ding uh hi.

¹²Ahang in, na langpanna zah uh le na mawhnate uh a liatna ka thei hi. A thumaante nengniamin, golhsum na la uh a, thukhen zumte ah mizawngte thu amaanin na khensak kei uh hi.

¹³Tua ahi ciangin hunte gilo ahi manin tua bang hun ciangin a ngaihsun thei mite daitakin a om uh hi.

¹⁴Na nuntak nadingun gitlohna zong loin a hoih zong un. Tua ciangin amah a hi ngeisa hi na cih bang tektekun, TOPA Thahatpen Pasian note tawh hong omkhawm ding hi.

¹⁵Gitlohna mudah un, thu hoih it un; thukhen zum ah amaanin thu khen un. Tua hileh TOPA Thahatpen Pasian in a baanglai Joseph hong lainat kha thei ding hi.

¹⁶Tua ahi manin Topa Thahatpen TOPA Pasian gen hih ahi hi: "Lampi dung khempeuh le mihon kikhopna mun khempeuh ah nasa-in kapa thumna a om ding hi. Lokho mite a kap dingin kisam dinga, kah siamte a thum dingin kicial ding hi.

¹⁷Note omna munmun ah hong pai ding ka hi manin lenggui lo khempeuh ah kithum ding hi," TOPA in cikhia hi.

¹⁸TOPA ni a ngaklah note, gimna nak thuak na nucia! Bang hangin TOPA ni ngaklah na hi uh hiam? Tua ni-in khua vak loin mial bikbek ding hi.

¹⁹Tua in humpinelkai kihta-in a tai leh vompi a tuak tawh kibang bek dinga, a inn sungah luta kawm ah a khut nga leh gul in a tuk tawh kibang bek ding hi.

²⁰TOPA ni-in khua vak loin khua kimialsak ding - mial bikbekin khuavak-zang khat zong om lo ding hi lo ahi hiam?

²¹"Na biakna pawite uh mudahin ka simmawh hi; na kikhopnate uh ka cimtak hi.

²²Meihal biakna le an-a biakna nong puak uh zongin tuate kong sang kei ding hi. Kilawmtakna biakna a[17] tuam nong puak uh hangin tuate ka thusim kei ding hi.

²³La sa-in gamlum nawn kei dih un! Na harp gingte uh ka ngai kei ding hi.

²⁴Ahi hangin gun bangin thutang luangluangin thumaan ahileh a kang ngei lo luitui bangsak un!

²⁵Israel innkuante aw, sehnel-gam ah kum sawmli na om sungun biakpiakna le biakna hong pia na hi uh hiam?

²⁶Nomau bawltawm - na kumpipa uh biakbukno, na milimte tunna uh le na pasian b[18] uh aksite na thupisak uh hi.

²⁷Tua ahi manin note Damascus khengin salin kong puak ding hi," ama min TOPA Thahatpen Pasian in a ci hi.