Read Zokam Jonah 4 Bible Online

Jonah 4 - Zokam bible

Jonah 4

¹Ahi hangin Jonah lungkim lo lua-a a heh hi.

²TOPA tungah thu ngen a, "TOPA aw, inn a ka om lai-in hici mah inteh ci hi lo ka hi hiam? Tarshish lamah manlanga ka taina zong tua hang mah ahi hi. Nang in mi hehpih thei-in, mi a khuatuah Pasian, heh hakin itna lungsim a nei Pasian, siatna tunsak nading a khel theipa na hilam ka thei hi.

³Tu-in TOPA aw, ka nuntak ding sangin ka sih ding hoihzaw ahi manin ka nuntakna lakhia in," a ci hi.

⁴Ahi hangin TOPA in, "Heh theih nading thu nei na hi hiam?" ci-in a dawng hi.

⁵Jonah paikhia-a khuapi nisuahna lam mun khatah a tu hi. Tua lai-ah hampheeng khat bawlin a liim ah tu-a khuapi sunga thupiang ding a ngak hi.

⁶Tua ciangin TOPA, Pasian in nop a saklohna a nuamtuamsak ding le a lutungah a liah dingin lenggui khat Jonah tungah a zaamsak hi. Tua lenggui hangin Jonah a lungdam mahmah hi.

⁷Ahi hangin a zingciang khuavak ciangin tua lenggui a kungkeu nadingin Pasian in lungno khat a nesak hi.

⁸Ni a suah ciangin Pasian in nisuahna-lam huihsa nungsaka, a thazawm zawh na dingin Jonah lutung a kang velval hi. Amah si nuamin, "Ka nuntak sangin si leng hoihzaw hi," a ci hi.

⁹Ahi hangin Pasian in Jonah tungah, "Nang, lenggui tungah heh nading thu nei na hi hiam?" ci hi. Amah in, "Ka nei hi, sih na ding khopin ka heh hi," a ci hi.

¹⁰Ahi hangin TOPA in, "Nang posak loh, nang gimpih loh hih lenggui na awlmawh hi. Zan khat thu-in khanga, zan khat mahin a si hi.

¹¹Ahi hangin Nineveh in avei le atak a gen thei lo mihing tulza le tul sawmnih tham lo ganhing tampi a nei zaw hi. Keimah in tua a lian mahmah khuapi awlmawh zaw lo ding ka hi hiam?" a ci hi.