Read Zokam Misimna 1 Bible Online

Misimna 1 - Zokam bible

Misimna 1

¹Israel-te Egypt pana a paikhiat khit uh a kum nihna, a kha nihna a ni masa ni-in Sinai Sehnel gam-a Kikhopna Puanbuk ah TOPA in Moses a hopih hi. Amah in:

²"Israel mipi bup a bawng’ le a innkuan zui-in simin, pasal peuhmah a min uh khat khit khat gual in.

³Nang le Aaron in kum sawmnih pan a tungsiah, Israel-te khempeuh pasal paltan tum thei ding peuhmah amau kikhenna bangin na sim ding uh hi.

⁴A beh, simin pasal khat ciat, a innkuan lutang pen ciat in nang hong huh ding uh hi.

⁵Nang hong huh ding mite min hihte ahi hi: Reuben panin, Shedeur tapa Elizur;

⁶Simeon panin, Zurishaddai tapa Shelumiel;

⁷Judah panin, Amminadab tapa Nahshon;

⁸Issachar panin, Zuar tapa Nethanel;

⁹Zebulun panin, Helon tapa Eliab;

¹⁰Joseph tapate pan: Ephraim panin, Ammihud tapa Elishama; Manasseh panin, Pedahzur tapa Gamaliel;

¹¹Benjamin panin, Gideoni tapa Abidan;

¹²Dan panin, Ammishaddai tapa Ahi-ezer;

¹³Asher panin, Ocran tapa Pagiel;

¹⁴Gad panin, De-u-el tapa Eliasaph;

¹⁵Naphtali panin, Enan tapa Ahira," ahi hi.

¹⁶Hihte mihonpi pana kiseh pupa beh pana makaite ahi hi. Amaute Israel bawng’ lutangte ahi uh hi.

¹⁷Moses le Aaron in a min kipiasate tonpih uh a,

¹⁸a kha nihna a ni masa ni-in mihonpi bup a kikhawmsak uh hi. Tua mite in amau pupa bawng’ le innkuan zui-in ciamteh uh a kum sawmnih leh a tungsiah a min a banbanin a khum uh hi;

¹⁹Tua pen TOPA in Moses a thupiak bang ahi hi. Tua hi-a Sinai Sehnel gamah tuaci-in mi khat khit khat a sim uh hi.

²⁰Israel tapa upa pen Reuben suante panin: Kum sawmnih pan a tungsiah paltan tum thei ding pasal khempeuh amau bawng’te le innkuante ciamtehna tawh kizui-in a min uh a kigual ahi hi.

²¹Reuben beh panin mi 46,500 a pha hi.

²²Simeon suante panin: Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in kisima a min uh a kigual ahi hi.

²³Simeon beh panin mi 59,300 a pha hi.

²⁴Gad suante panin: Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi.

²⁵Gad beh panin mi 45,650 a pha hi.

²⁶Judah suante panin: Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi.

²⁷Judah beh panin mi 74,600 a pha hi.

²⁸Issachar suante panin: Kum sawmnih pan a tungsiah paltan tum thei ding pasal khempeuh amau bawng’te le a innkuante ciamtehna tawh kizui-in a min uh a kigual ahi hi.

²⁹Issachar beh panin mi 54,400 a pha hi.

³⁰Zebulun suante panin: Kum sawmnih pan a tungsiah paltan tum thei ding pasal khempeuh amau bawng’te le innkuante ciamtehna tawh kizui-in a min uh a kigual ahi hi.

³¹Zebulun beh panin mi 57,400 a pha hi.

³²Joseph tapate pan: Ephraim suante panin: Kum sawmnih pan a tungsiah paltan tum thei ding pasal khempeuh amau bawng’te le innkuante ciamtehna tawh kizui-in a min uh a kigual ahi hi.

³³Ephraim beh panin mi 40,500 a pha hi.

³⁴Manasseh suante panin: Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi.

³⁵Manasseh beh panin mi 32,200 a pha hi.

³⁶Benjamin suante panin: Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi.

³⁷Benjamin beh panin mi 35,400 a pha hi.

³⁸Dan suante panin: Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-a a min uh a kigual ahi hi.

³⁹Dan beh panin mi 62,700 a pha hi.

⁴⁰Asher suante panin: Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawhzui-in a min uh a kigual ahi hi.

⁴¹Asherbeh panin mi 41,500 a pha hi.

⁴²Naphtali suante panin: Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi.

⁴³Naphtali beh panin mi 53,400 a pha hi.

⁴⁴Hih mite pen Moses Aaron le amau innkuan ciat tanga a sem Israel makai sawm le nihte misimna ahi hi.

⁴⁵Israel mi paltan tum thei ding khempeuh kum sawmnih pan a tungsiah a innkuan zui-a kisim ahi hi.

⁴⁶A vekpi-a kigawm mi 603,550 a pha hi.

⁴⁷Tuate lakah Levi beh innkuan teng adangte tawh a kisim khawm kei hi.

⁴⁸TOPA in Moses tungah:

⁴⁹"Na misimna ah Israel dangte tawh Levi beh na simkhawm peuhmah kei ding hi.

⁵⁰Tua tangin, Levi-te Tecipanna biakbuk - a nazat khempeuh le tua tawh kisai na khempeuh uk dingin seh in. Amaute in biakbuk le a vanzat khempeuh a pua ding uh hi; amaute in cing ding uh a, a kimkot ah giahphual sat ding uh hi.

⁵¹Biakbuk a kiphualsuan peuhpeuh ciangin Levi-te in phel ding uh a, biakbuk a kilam peuhpeuh ciangin Levi-te in a sem ding uh hi. Midang khatpeuh a kiangah a pai leh kithat ding hi.

⁵²Israel-te in a pawlpawlin a puanbukte uh lam ding uh a, amau satsa giahphual-a dialkhai nuai-ah a om tek ding uh hi.

⁵³Levi-te in ahileh Israel mipite tungah thangpaihna a tun loh nadingin biakbuk kimkot ah a puanbukte uh a lam ding uh hi. Levi-te in Tecipanna biakbuk kep ding tavuan a la ding uh hi," a ci hi.

⁵⁴TOPA in Moses a thupiak bang tektekin Israel-te in hihte khempeuh a sem uh hi.