Read Zokam Misimna 10 Bible Online

Misimna 10 - Zokam bible

Misimna 10

¹TOPA in Moses tungah:

²"Sek-a kiseek ngun pengkul nih bawl inla, mipite sapkhawmna le giahphual suan nadingin zang in.

³A nihin a ginkhawm ciangin Kikhopna Puanbuk lutna mai-ah mipi bup a kikhawm ding uh hi.

⁴Khat bek a gin ciangin na mai-ah, makaite - Israel bawng’te lutangte kikhawm ding uh hi.

⁵Pengkul khatvei a kimut ciangin nisuahna lama phualsat behte a dingkhia ding uh hi.

⁶A nih veina a kimut ciangin leitaw lama giahphual satte a dingkhia ding uh hi. Dinkhiat nading theihsakna-in a kimut ding hi.

⁷Mipite khop nadingin pengkulte kimut dinga ahi hangin theihsakna a kibang kei ding hi.

⁸"Siampi Aaron tapate in pengkul a mut ding uh hi. Hih in nang le khang sawnsawnte adingin a kip den thuzek hi ding hi.

⁹Na gam sungua no hong nengniam na galte uh tawh na kido uh ciangin pengkulte mut un. Tua ciangin na Pasian uh TOPA in note hong phawkin na galte panun hong hu ding hi.

¹⁰Na lungnop hun uh - no adinga kisehsa pawite le Kha Thak pawi hunte - meihal biakna, kilawmtakna biakna a hun ciangin zong pengkulte na mut ding uh a, tuate no adingin Pasian mai-ah phawkna khat ahi ding hi. Keimah TOPA note Pasian ka hi hi," a ci hi.

¹¹A kum nihna a kha nihna a ni sawmnihna ni-in Tecipanna biakbuk tungsan panin meii a kilamto hi.

¹²Tua ciangin Sinai Sehnel-gam panin Israel-te dingkhia uh a, Paran Sehnel gam ah meii a khawl matengin mun khat pan mun khatah a zin kawikawi uh hi.

¹³Moses tungtawna TOPA thupiak bangin a dinkhiat uh a masapen ahi hi.

¹⁴Judah giahphual-ate pawl amau dialkhai nuai-ah a dingkhia uh hi. Amminadab tapa Nahshon in a uk hi.

¹⁵Issachar beh pawl Zuar tapa Nehthanel in uk a,

¹⁶Zebulun beh pawl Helon tapa Eliab in a uk hi.

¹⁷Tua ciangin biakbuk phelkhia uh a, biakbuk pua Geshon-te le Merari-te a dingkhia uh hi.

¹⁸Tua zomah Reuben giahphuala pawlte amau dialkhai nuai-ah a pai uh hi. Shedeur tapa Elizur in a uk hi.

¹⁹Simeon behte pawl ah Zurishaddai tapa Shelumiel in uk a,

²⁰Gad behte pawl Deuel tapa Eliasaph in a uk hi.

²¹Tua zomah Kohath mite a siangtho nate pua kawmin a dingkhia uh hi. Amaute a tun ma-un biakbuk kilam khin ding hi.

²²Tua zomah Ephraim giahphual-ate amau dialkhai nuai-ah a pai uh hi. Ammihud tapa Eliashama in a uk hi.

²³Manasseh behte pawl Pedahzur tapa Gamaliel in uk a,

²⁴Benjamin behte pawl Gideoni tapa Abidan in a uk hi.

²⁵A nunung pen ah pawl khempeuh nungdalin Dan giahphuala pawlte amau dialkhai nuai-ah a dingkhia ding uh hi. Ammishaddai tapa Ahiezer in a uk hi.

²⁶Asher behte pawl Acran tapa Pagiel in uk a,

²⁷Naphtali behte pawl Enan tapa Ahira in a uk hi.

²⁸Hih in Israel-te a pawlpawlin a dinkhiat uh cianga a paizia uh ahi hi.

²⁹Moses in a sungpa Midian-te Reuel tapa Hobab tungah, "TOPA genna mun lam zuanin ka dingkhia ding uh hi; nang tungah kong pia ding hi. Ko hong zui in; TOPA in Israel tungah na hoih piak ding hong ciam zo ahi manin nang kong ngai ding uh hi," a ci hi.

³⁰Amah in, "Hi kei, kong pai kei ding hi; ka leitanga ka mite kiangah ka ciah kik ding hi," ci-in a dawng hi.

³¹Ahi hangin Moses in, "Nong hehpihna-in kote hong nusia kei in. Gam sunga ka giahphual sat nading mun uh na thei a, ka lampu uh na hi hi.

³²Ko nong zuih leh TOPA hong piak a hoih nate nang tawh i hawm ding hi," a ci hi.

³³Tua ciangin TOPA mual panin dingkhia uh a, ni thum sung a pai uh hi. Amaute khawl nading mun a zonsak dingin tua nithum sungin TOPA thukhun singkuang amaute mai-ah a pai hi.

³⁴Amaute giahphual pan a dinkhiat uh ciangin sunin amaute tung sanah TOPA meii a om hi.

³⁵Singkuangpi a dinkhiat peuhpeuh ciangin Moses in, "TOPA aw, ding in! Na galte kithehthang ta hen; na galte na mai-ah taikhek uh hen," a ci hi.

³⁶A khawl peuhpeuh ciangin amah in, "TOPA aw, Israel tul tampi simzawh lohte kiangah hong kileh in," a ci hi.