Read Zokam Misimna 13 Bible Online

Misimna 13 - Zokam bible

Misimna 13

¹TOPA in Moses tungah,

²"Israel-te ka piak ding Canaan gam en dingin mi pawlkhat sawl in. Behgui khat panin a makai khatta sawl in," a ci hi.

³Tua ciangin TOPA thupiak zui-in Moses in Paran Sehnel-gam panin amaute a sawlkhia hi. Amaute a vekpi un Israel-te makaite ahi uh hi.

⁴Amaute min hihte ahi hi: Reuben beh panin, Zaccur tapa Shammau;

⁵Simeon beh panin, Hori tapa Shaphat;

⁶Judah beh panin, Jephunneh tapa Caleb;

⁷Issachar beh panin, Joseph tapa Igal;

⁸Ephraim beh panin, Nun tapa Hoshea;

⁹Benjamin beh panin, Raphu tapa Palti;

¹⁰Zebulun beh panin, Sodi tapa Gaddiel;

¹¹Manasseh beh panin, (Joseph beh), Susi tapa Gaddi;

¹²Dan beh panin, Gamalli tapa Ammiel;

¹³Asher beh panin, Michael tapa Sethur;

¹⁴Naphtali beh panin, Vophsi tapa Nahbi;

¹⁵Gad beh panin, Maki tapa Geuel, ahi hi.

¹⁶Moses in gam en dinga a sawlte min hihte ahi hi. (Moses in Nun tapa Hoshea min Joshua a phuak hi.)

¹⁷Moses in amaute Canaan gam en dingin a sawl ciangin, amah in, "Negev kantanin mualtung gamah paito un.

¹⁸A gam bang tawh kibanga a teng mite thahat uh hiam, thahat lo uh hiam, tawm uh hiam, tam uh hiam?

¹⁹Amau tenna leitang bang nam hiam? Hoih hiam hoih lo hiam? Bang khuapi nam a teng uh hiam? Kulha ki-um hiam, ki-um lo hiam?

²⁰A leitang bangte hiam? Lei hoih hiam, sia hiam? Singkung po hiam, po lo hiam? Tua gam singgahte na deih penpen uh hong pua un," a ci hi. (Tua hun pen lenggah min tung laitak ahi hi.)

²¹Tua ciangin amaute paito uh a, Zin Sehnel-gam panin Lebo a Hamath lam manawhin Rehob dong a paito uh hi.

²²Amaute Negev kantanin pai to uh a, Anak suante tenna Ahiman, Sheshai le Talmai a tung uh hi. (Egypt a Zoan kilam ma kum sagih lai-in Hebron kilam khin zo hi.)

²³Amaute Eshcol b Kuam a tun uh ciangin lenggah bom khat a hiangin a lo uh hi. Amaute nih in cianggolh khat tawh zawngin, mang kawlsing le thei pawlkhat zong a vom uh hi.

²⁴Israel-te in tua lai-ah lenggah bom khat lo uh ahi manin tua mun Eshcol Kuam kici hi.

²⁵Ni sawmli khit ciangin amaute a gam etna panun a ciah uh hi.

²⁶Amaute, Moses Aaron le Israel mipi bup omna Paran Sehnel-gam-a Kadesh ah ciah kik uh hi. Tua lai-ah amaute in mipi bup le amaute tungah thu zasak uh a, tua gama singgahte a lak uh hi.

²⁷Amaute in Moses kiangah: "Nong sawlna gam ah ka va pai uh a, tua lai-ah bawngnawi le khuaizu a luang hi. A singgahte hihte ahi hi.

²⁸Ahi hangin tua lai-a mite vanglian uh a, a khuapite uh zai mahmah in kulhin ki-um hi. Tua lai ah Anak suante nangawn ka mu uh hi.

²⁹Negev ah Amalek mite a teng uh hi; mualtung gam tengah Hit-te, Jebus-te le Amor-te teng uh a; tuipi gei teng le Jordan gun dung tengah Canaan-te a teng uh hi," ci-in hih bangin a zasak uh hi.

³⁰Tua ciangin Caleb in Moses maitangah mipite daisak a, "Eite in zo taktak ding i hi manin paito in tua gam va la ni," a ci hi.

³¹Ahi hangin amah tawh a paikhawmte in, "amaute ei sangin hatzaw uh ahi manin i do zo kei ding hi," a ci uh hi.

³²Tua ciangin amaute in a gam etna thu uh Israel mite lakah a sia lamin a zasak kawikawi uh hi. Amaute in, "Ka gametna uh leitang in a tunga tengte a valhtum hi. Tua lai-a ka muh uh mite lian thei mahmah uh hi.

³³Tua lai-ah Nephilim-te (Nephilim pana pai Anak suante) ka mu uh hi. Kote kauphe bangin ka kimu uh a, amaute in zong kote tua bangin hong mu uh hi," a ci uh hi.