Read Zokam Misimna 14 Bible Online

Misimna 14 - Zokam bible

Misimna 14

¹Tua zanin mipite khempeuh nakpi-in kikoin a kap uh hi.

²Israel mite khempeuh in Moses le Aaron phunsan uh a, mipi buppi in amaute kiangah, "Egypt ahikeh hih Sehnel-gamah i vekin a sikhin hi hoh leng!

³Bang hangin TOPA in namsau a si dingin hih gamah hong paipih se hiam? I zi i tate galte mat ding hi ta hi. Egypt ah kileh kik le ung ko adingin hoihzaw lo ding ahi hiam?" a ci uh hi.

⁴Tua ciangin amaute in, "Makai khat teelin Egypt ah ciah kik ni," a kici uh hi.

⁵Tua ciangin Moses le Aaron tua lai-a kikhawm mihonpite khempeuh mai-ah a boksuk uh hi.

⁶A gam ena paite lakah Nun tapa Joshua le Jephunneh tapa Caleb in a puansilh uh balkekin,

⁷Israel mipite tungah, "Gam ena ka va pai kawikawina uh leitang hoih mahmah hi.

⁸Eite tungah TOPA lungkim peuh leh amah in bawngnawi le khuaizu luanna tua gamah hong paipihin eite hong pia ding hi.

⁹TOPA langdo kei phot peuhmah dih ni. Tua gam mite kihta kei un, bang hang hiam cih leh amaute i zialmang pah na ding hi. Amaute kidalna siamang khin a, ahi hangin eite tawh TOPA a omkhawm hi. Amaute kihta peuhmah kei un," a ci uh hi.

¹⁰Ahi hangin mipi bup in amaute suangin den a sawm uh hi. Tua ciangin Kikhopna Puanbuk a Israel-te khempeuh tungah TOPA minthanna a kilang hi.

¹¹TOPA in Moses kiangah, "Hih mite in bang tanvei hong simmawhbawl ding uh hiam? Amaute laka ka bawlsa lim piandangte om napi amaute in bang tanvei hong um lo lai ding uh ahi hiam?

¹²Amaute, pulpi ka vatmangsak dinga, ka susia ding hi, ahi hangin nang, amaute sanga a lianzaw a thahat minam kong suaksak ding hi," a ci hi.

¹³Moses in TOPA tungah, "Tua hi mawk leh tua thu Egypt mite in na za ding uh hi! Amaute lak panin nangma vang tawh hih mite na paikhiatpih ahi hi.

¹⁴Tua hi a, amaute in hih gama teng mite tungah tua thu a gen ding uh hi. TOPA aw, hih mite tawh na omkhawm lam za khin uh a, TOPA aw, amaute tawh kimaituahin na mu khin hi; amaute tungah nangma meii om a, amaute mai-ah sunin meiikhuam, zan in meikhuam-in na pai hi.

¹⁵Hih mite a vekin sih khatin na sihsak leh nang thu a za minamte in,

¹⁶‘TOPA in kiciama a khapsa gamah hih mite a paipih thei kei hi; tua ahi manin amaute gamlakah a go hi,’ ci ding uh hi.

¹⁷"Tu-in Topa aw, na hatnasa, na lahkhiatsa na thahatna hong zang kik in:

¹⁸‘TOPA heh haka, a itna kicingin, lehdona le mawhna a maisak hi. Amah in a khialte dan tuaksak loin a om kei hi; amah in a pate mawhna a tate tungah khangthum khang lina dongin dan a pia hi,’ ci-a na lahkhiatsa bang tektek ahi hi.

¹⁹Na itna a liatna tawh kizui-in hih mite mawhna, Egypt a nusiat ua kipan tuni dong na maisak bang tektekin hih mite mawhna maisak in," a ci hi.

²⁰TOPA in, "Nong nget bangin amaute ka maisak zo hi.

²¹Keimah a nungta Pasian ka hi a, TOPA minthanna in leitung buppi a dip zah khat in

²²ka minthanna a mu mi le Egypt le gamlaka ka bawl lim lamdangte mu napi ka thu hong mang lo a, sawmvei dong hong zia-et teitei vialte -

²³khat beek in kiciama a pate uh tunga ka khapsa gam a mu peuhmah kei ding uh hi. Kei hong simmawhbawlte khat beek in tua gam a mu peuhmah kei ding uh hi.

²⁴Ahi hangin ka nasempa Caleb in lungsim dang nei-in a lungsim khempeuh tawh kei hong zui ahi manin ama paina gamah ka tungsak dinga, ama suante in tua gam a luah ding uh hi.

²⁵Amalek-te le Canaan-te tua kuam tengah teng uh ahi manin zing ciangin kileh kik unla San Tuipi a paina lampi tawnin gamlak lamah dingkhia un," a ci hi.

²⁶TOPA in Moses le Aaron kiangah:

²⁷"Hih migilo honpi in kei bang tanvei hong phunsan ding uh ahi hiam? Hih a phunhat Israel-te in hong mawhsaknate uh ka za khin hi.

²⁸Tua ahi ciangin amaute kiangah, ‘Keimah a nungta TOPA ka hi a, na gen uh ka zak bang lianin no tungah na khempeuh ka hih ding hi;

²⁹mi kisim lai-a kisim, kum sawmnih pan a tungsiah kei hong phunsan peuhmah hih gam sungah na luang uh a lum ding hi.

³⁰Ka khut lamto-a na inn lam na dingun kong ciamsa leitangah Jephuneh tapa Caleb le Nun tapa Joshua longal note khat beek na tung kei ding uh hi.

³¹Galte in man ding na cih uh na tate uh note nialsa leitang ah puakin nuam ka sasak ding hi.

³²Ahi hangin note pen - na luang uh hih gamlakah a lum ding hi.

³³Note muanhuai lohna thuakin na tate uh kum sawmli sung - na luang uh hih gamlakah a lup dong, tuu cingin a om ding uh hi.

³⁴Gam na et sung uh ni sawmlite ni khat tangin kum khat - kum sawmli sung na mawhna uh hangin na thuak ding uh a, note kong langbawlna bang tawh kibang hiam, cih na thei ding uh hi,’ ci hi.

³⁵Keimah TOPA in ka gen khin zo a, kei langa a kithubup mi honpi tungah hihte ka hih pelmawh ding hi. Amaute in hih gamlak ah beina tuak ding uh a, hih lai ah si ding uh hi," a ci hi.

³⁶Tua ciangin Moses in gam en dinga a sawl ciah kika a thu a sialamin zasak a, mipi honpi amah a phunsansak mite -

³⁷a leitang thu a sia-a a zaksakna uh thuakin TOPA mai-ah pulpi in vat a, a si uh hi.

³⁸Gam ena kuante lak panin Nun tapa Joshua le Jephunneh tapa Caleb a suakta uh hi.

³⁹Moses in Israel-te khempeuh tungah hih thu a zaksak ciangin amaute nakpi takin a thum uh hi.

⁴⁰A zing ciang zingsang tungin mualtung gam asang lamah a kahto uh hi. Amaute in, "I mawh zo hi. TOPA hong khapsa gamah paito ni," a ci uh hi.

⁴¹Ahi hangin Moses in, "Bang hangin TOPA thupiak mang lo na hi uh hiam? Taksuak peuhmah kei nuteh!

⁴²Pai to kei un, bang hang hiam cihleh note tawh TOPA a om kei hi. Na galte un hong zo ding uh hi;

⁴³ahang in, Amalek-te le Canaan-te in tua lai-ah hong maituah ding uh hi. TOPA panin lampial khin na hi manun, amah note tawh omkhawm lo dinga, namsau-in na puk ding uh hi," a ci hi.

⁴⁴Tua hi napi Moses ahi a, TOPA thukhun singkuang ahi zongin om lopi-in giahphual panin mualtung gam lam manawh in a kikhin teitei uh hi.

⁴⁵Tua ciangin mualtung gama teng Amalek-te le Canaan-te kuansuk uh a, amaute simin Hormah dongah a sattuk uh hi.