Read Zokam Misimna 16 Bible Online

Misimna 16 - Zokam bible

Misimna 16

¹Levi tapa Kohath, Kohath tapa Izhar, Izhar tapa Korah le Reuben-te panin - Eliab tapa Dathan le Abiram, le Peleth tapa On-te kimisak a uh a,

²Moses a langpan uh hi. Mihonpite makai minthang vaihawm pawl dinga kisehsa Israel mi 250 in amaute a koppih uh hi.

³Moses le Aaron langpan dingin kuankhawm uh a, "Ki-uangsak lua uh teh! Mihon buppi a vekpi un siangtho uh hi, amaute TOPA in ompih hi. Tua hi napi bang dinga TOPA mite sangin a thupi zawa kikoih na hi uh hiam?" a ci uh hi.

⁴Moses in hih thu a zak ciangin a mai a kunsuk hi.

⁵Tua ciangin Korah le ama nungzuite khempeuh kiangah: "Zingsang ciangin TOPA in ama aa kua hi a, kua siangtho hiam, cih hong lak dinga, tua mipa a kiangah a paisak ding hi. Ama telpa pen amah in a kiangah paisak ding hi.

⁶Nangmah Korah le na nungzuite khempeuh: na kisim unla

⁷zing ciangin TOPA mai-ah mei-in gimnamtui na hal dih un. TOPA teel tua mipa a siangthopa pen hi ding hi. No Levi mite uang lua zaw uh teh!" a ci hi.

⁸Moses in zong Korah tungah, "Tu-in no Levi mite aw, ngai dih un!

⁹Israel-te’ Pasian in Israel mipi dangte panin hong khenkhia-a, TOPA biakbuk-a ama kianga nasemin mipite mai-ah amau adingin biakna na sem dinga hong koih phazo sa hoh lo na hi hiam?

¹⁰Amah in note le na Levi mipihte uh ama kiangah hong koih napi, tu-in siampi za zong ngah na sawm lai uh hi.

¹¹Nang le na nungzui-te na kikopkhawmna uh TOPA langpanna ahi hi. Na phunsan dingin Aaron kua himawk ahi hiam?" a ci hi.

¹²Tua ciangin Moses in, Eliab tapa Dathan le Abiram a samsak hi. Ahi hangin amaute in, "Pai buang lo e!

¹³Khuaizu le bawngnawi a luanna gam pan hong lakhia in sehnel gam ah thah dinga nong omsak hawmthawh lai na hi hiam?

¹⁴Tua tham loin bawngnawi le khuaizu a luanna gam sungah nong tunpih kei a, lote le lenggah lote nong luahsak kei hi. Hih mite mittang b khelkhia lai ding na hi hiam? Kong pai peuhmah kei ding uh hi!" a ci uh hi.

¹⁵Tua ciangin Moses heh mahmah a TOPA kiangah, "Amaute biakna sang kei in. Amaute tung panin laa khat nangawn zong ka la nai kei a, amaute khat tungah zong ka khial kei hi," a ci hi.

¹⁶Moses in Korah kiangah, "Zing ciangin nang le na nungzuite khempeuh TOPA kiangah na kilak ding uh hi - nang le amaute le Aaron.

¹⁷Note in na gimnamtui beel tek uh tawi-in a sungah gimnamtui na koih ding uh hi - gimnamtui beel vekpi 250 hi a - TOPA mai-ah a pia ding uh hi. Nang le Aaron in zong na gimnamtui beel uh na pia ding uh hi," a ci hi.

¹⁸Tua ciangin a gimnamtui beelte ciat uh la uh a, a sungah mei le gimnamtui koihin Kikhopna Puanbuk lutna ah Moses le Aaron tawh a dingkhawm uh hi.

¹⁹Korah in Kikhopna Puanbuk lutna amaute langkhatah a nungzuite a kikhopsak khit ciangin mihonpite khempeuh tungah TOPA minthanna kilang hi.

²⁰TOPA in Moses le Aaron tungah,

²¹"Amaute thakhatin a kibeisak theih nadingin hih a kikhawm mihonpite panin kihemkhia un," a ci hi.

²²Ahi hangin Moses le Aaron mai kunsuk uh a, "Pasian aw, mihingte Pasian aw, mi khat a mawhnate hangin mipi buppi tungah heh ding na hi hiam?" ci-in a kiko uh hi.

²³Tua ciangin TOPA in Moses tungah,

²⁴"Mihonpi tungah, ‘Korah, Dathan le Abiram-te puanbuk panin kihemkhia un,’ ci un," a ci hi.

²⁵Moses dingkhia a Dathan le Abiram-te kiangah pai-a Israel upate in amah a zui uh hi.

²⁶Amah in mihonpite vauhilh a, "Hih migilote puanbuk panin kihemkhia un! Amaute na khat beek lawng kei un, na lawn uh leh amau mawhnate hangin note hong kiphiatkhia ding hi," a ci hi.

²⁷Tua ciangin amaute Korah, Dathan le Abiram-te puanbuk panin a kihemkhia uh hi. Dathan le Abiram paikhia uh a, a zite a tate uh le a tangeekte uh tawh amau puanbuk lutna ah a dingkhawm uh hi.

²⁸Tua ciangin Moses in, "Hihte kei thu-a ka hih hi loin hihte khempeuh a sem dingin TOPA in kei hong sawl ahilam na theih nading uh ahi hi.

²⁹Hih mite sih ngeina-in si-in, mihing tuah ngei mah tuak le uh TOPA in kei hong sawl lo hi ding hi.

³⁰Ahi hangin TOPA in a thak tuam mahmah khat tuaksakin lei kamka in amaute le a neihsa khempeuh uh valhin a hing tangun han a ah kivui leh tua ciangin hih mite in TOPA a simmawh lam uh na thei ding uh hi," a ci hi.

³¹Amah in hih thu a gen khit phetin amaute nuai lei kikhenkham a,

³²lei kamka-in Korah mite le a innkuanpihte le a neihsate khempeuh uh a valh hi.

³³Amaute a neihsa khempeuh uh tawh a hingtangin han sungah tumsuk uh a; lei in amaute khupnelhin kisia uh a, mipite lakah a om nawn kei uh hi.

³⁴Amaute kimkot a om Israel-te tai-in, "Leitang in ei zong hong valh kha in ciai!" ci-in a awng uh hi.

³⁵Tua ciangin TOPA panin mei kuangkhia a, biakna-a gim namtui a pia mi 250 te a haltum hi.

³⁶TOPA in Moses kiangah,

³⁷"Siampi Aaron tapa Eleazar kiangah, meikuang khupi lak panin gimnamtui beelte lakhiasakin a gamla sim ah mei-amte thehthangsak in,

³⁸ahang in, amaute nuntakna bei nading zah-a, a mawh mite’ gimnamtui beelte siangtho hi. Tua gimnamtui beelte TOPA mai-ah a siangtho-a kipia ahi manin biakna-tau a luan dingin a pekin seek in. Israel-te adingin tuate lim suaksak in," a ci hi.

³⁹Tua ciangin siampi Eleazar in a kangtumsa mite’ sumngo gimnamtui beelte khawma, biakna-tau-a sun dingin seek-a,

⁴⁰TOPA in Moses tungtawna amah a lamlah bangin a hih hi. Hih in Aaron suante longal mi khatpeuh in TOPA mai-ah gimnamtui hal dingin a pai loh nading, a pai leh Korah le a nungzuite bang ding hi, cih Israel-te theihsakna ahi hi.

⁴¹A zing ciangin Israel mi buppi in Moses le Aaron a phunsan uh hi. Amaute in, "TOPA mite na thatlum uh hi," a ci uh hi.

⁴²Ahi hangin Moses le Aaron langpanin mipite kikaikhawmin Kikhopna Puanbuk lamah a pai laitakun, thakhatin meii in tuam a, TOPA minthanna a kilang hi.

⁴³Tua ciangin Kikhopna Puanbuk mailam ah Moses le Aaron pai uh a,

⁴⁴TOPA in Moses kiangah,

⁴⁵"Amaute thakhatin ka beisak theih nadingin hih mipite panin kihemkhia un," a ci hi. Tua ciangin amaute a mai kunsuk uh hi.

⁴⁶Tua ciangin Moses in Aaron kiangah, "Na gimnamtui beel la inla a sungah gimnamtui koih in, amaute ading biakna-tau pana mei tawh thoihdamna bawl dingin mipite lamah paipah in. TOPA thangpaihna hong pusuak khin hi; pulpi kipan khin hi," a ci hi.

⁴⁷Tua ciangin Aaron in Moses cih bangin hih a, mipite laizangah a tai hi. Mipite lakah pulpi kipan khin zo hi; ahi hangin Aaron in gimnamtui halin amaute adingin thoihdamna a bawl hi.

⁴⁸Amah a sisate le a hing laite kikalah dinga, pulpi a tawp hi.

⁴⁹Ahi hangin Korah hanga a site banah pulpi-in mi 14,700 a sih beh lai hi.

⁵⁰Pulpi tawpta ahi manin Kikhopna Puanbuk lutna-a Moses kiangah Aaron a ciah kik hi.