Read Zokam Misimna 18 Bible Online

Misimna 18 - Zokam bible

Misimna 18

¹TOPA in Aaron tungah, "Nang le na tapate le na pa innkuante in munsiangtho hanga mawhsakna tavuan na la ding uh a, siampi na pana mawhsakna nang le na tapate tavuan ahi ding hi.

²Nang le na tapate in Tecipanna Puanbuk mai-ah biakna na nasep uh ciangin no hong pawl ding le hong huh dingin na pupa beh panun na Levi mipihte tonpih in.

³Amaute in note tavuan hong lakpih ding uh a, Puanbuk a nasep khempeuh a sem ding uh hi. Ahi hangin amaute munsiangtho ahikeh biakna-tau a na zatte kiangah a pai peuhmah kei ding uh hi; a pai uh leh amaute tawh na sikhawm ding uh hi.

⁴Amaute in note hong pawlin Kikhopna Puanbuk-a nasep dingte vanin - Puanbuk a nasep khempeuh tavuan la ding uh a, ahi hangin note omna ah kuamah hong pai thei kei ding uh hi.

⁵Israel-te tungah thangpaihna a tun kik nawn loh nadingin note in mun siangtho le biakna-tau cin tavuan na la ding uh hi.

⁶Kei mahmah in Israel-te lak panin na Levi mipihte nang tungah letsong dingin ka teel khina, Kikhopna Puanbuk ah nasem dingin TOPA tungah ka ap khin hi.

⁷Ahi hangin biakna-tau le puanzak sunga siampite tawh kisai na khempeuh nang le na tapate bek in na sem thei ding uh hi. Keimah in siampi nasep za letsongin note kong pia hi. Mun siangtho kianga a pai midang khatpeuh kithat pelmawh ding hi," a ci hi.

⁸Tua khit ciangin TOPA in Aaron tungah, "Kei tunga hong kipia biaknate a uk dingin keimah in nang kong koih hi; Israel-te in kei hong piak uh a siangtho biaknate khempeuh, na tanh ding uh le na kaih den dingun nang le na tapate kong pia hi.

⁹Biakna-a kipia, mei-a kihal lo a siangtho pen nangma tanh ding ahi hi. Amaute in letsong a kei hong puak uh a siangtho pen biaknate khempeuh, an-a biakna ahikeh mawhna hanga biakna ahikeh khialhna hanga biaknate - tuate pawl peuhmah nang le na tapate aa ahi hi.

¹⁰A siangthopen na khat bangin ne un; pasal peuhmah in a ne ding hi. A siangtho-in na ngaihsun pelmawh ding uh hi.

¹¹"Hihte zong no ading ahi hi: Israel-te in vei-a biakna-in letsonga a piakte khempeuh uh panin a kituam koihte peuhmah no aa ahi hi. Keimah in nang le na tanu na tapate uh tungah na kaih den dingun kong pia hi. Na inn sunga om a sianga kiseh peuhmah in a ne thei ding uh hi.

¹²"Keimah in olive thau hoih pente khempeuh le zu thak a hoih pente khempeuh le amau khawhsa gahmasa pana TOPA a piak uh ante no kong pia hi.

¹³TOPA tungah a puak uh leitang pana gahmasate khempeuh nang ading ahi hi. Na inn sungua om a sianga kiseh peuhmah in a ne thei ding uh hi.

¹⁴TOPA tunga ki-ap a Israel sunga om na khempeuh no aa ahi hi.

¹⁵Naubu pana piang mihing ganhing tacil TOPA tunga ki-ap peuhmah nang ading ahi hi. Ahi hangin tapa upa pen le a sianglo ganhingte a suak masa apa peuhmah na tan pelmawh ding uh hi.

¹⁶Tuate a suah zawh kha khat a phak ciangin mun siangtho shekel tawh kizui-in gerah sawmnih a gik a tat nadinga kiseh zah ngun shekel b nga-in na tan pelmawh ding uh hi.

¹⁷"Ahi hangin a suak masa bawngtal, tuu ahikeh keelte na tanh kei ding uh hi; tuate a siangtho ahi hi. Tuate’ sisan biakna-tau tungah theh unla, mei-a hal biakna, TOPA a lungkimsak gim namtui dingin a thau hal un.

¹⁸Vei-a biakna a iik le a taklam phei no aa ahi bang tektekin a sa zong no aa ahi ding hi.

¹⁹Israel-te in TOPA tungah a siangtho biakna-a a piakte uh pana kituam koih peuhmah nang le na tanu na tapate kaih den dingin kong pia hi. Tua in nang le na suante tawh TOPA mai-ah ci tawh tawntung thukhun ahi hi," a ci hi.

²⁰TOPA in Aaron kiangah, "Amaute gam ah luah na nei kei ding uh a, amaute lakah tanh zong na nei kei ding uh hi; nangma tanh keimah ka hi-a, Israel-te laka nangma gouluah ka hi hi.

²¹"Keimah in Levi-te tungah Kikhopna Puanbuka a nasepna uh thukna-in Israel-te sawma khat khempeuh a luah dingun ka pia hi.

²²Tu-a kipan Israel-te Kikhopna Puanbuk kiangah a pai peuhmah kei ding uh hi; tua hi keileh amaute in amau mawhna thaman thuakin a si ding uh hi.

²³Kikhopna Puanbuk a nasem ding Levi-te hi uh a, tua tawh kisai mawhsakna peuhmah tavuan a la ding uh hi. Hih in khang sawnsawnte dongin tawntung thuzek khat ahi hi. Amaute in Israel-te lakah gouluah a ngah kei ding uh hi.

²⁴Tua tangin Israel-te in TOPA tungah biakna-a a piak uh sawma khat Levi-te gouluah dingin ka pia hi. Tua pen bang hang hiam cih leh keimah in amaute tawh kisai-in, ‘Amaute in Israel-te lakah gouluah a nei kei ding uh hi,’ ka ci hi," a ci hi.

²⁵TOPA in Moses tungah,

²⁶"Levi-te hopih inla amaute kiangah: ‘Israel-te tung panin na gouluah dingun kong piak sawma khat na san uh ciangin, tua sawma khat sehsawm suah sehkhat TOPA biakna-in pia tektek un.

²⁷Na biakna uh ancilna pana antang ahikeh lenggahtui sukna pana singgah-tui bangin hong kisimsak ding hi.

²⁸Note in zong hici bangin Israel-te tung pana na san uh sawma khat khempeuh TOPA tungah biakna-in na pia ding uh hi. Hih sawma khatte panin TOPA tanhte khenkhia-in siampi Aaron na pia ding uh hi.

²⁹Note in no tunga hong kipia nate, a hoih pen le a siangtho pente TOPA adingin na pia tektek ding uh hi," ci in.

³⁰"Levi-te tungah: ‘A hoihpente na piak uh ciangin na ancilna phual le na lenggah sukna muna piangin hong kisimsak ding hi.

³¹Nang le na innkuanpihte in a omlai teng mun khatah na ne thei ding uh hi; ahang in, tua pen Kikhopna Puanbuk a na nasep thaman uh ahi hi.

³²Tuate a hoih pen na piak nak uh leh hih thu ah na mawh kei ding uh hi; tua ciangin Israel-te biakna siangthote na buahsak kei ding uh a, na si kei ding uh hi," a ci hi.