Read Zokam Misimna 22 Bible Online

Misimna 22 - Zokam bible

Misimna 22

¹Tua ciangin Israel-te zinkhia uh a, Jericho c gal Jordan dunga Moab zanglei ah giahphual a sat uh hi.

²Tu-in Zippor tapa Balak in Amor-te tunga Israel gamtatnasa khempeuh mu a,

³mi tam mahmah ahi manin Moab-te linglawng uh hi. Hi takpi hi, Israel-te hangin Moab-te a laupha mahmah uh hi.

⁴Moab-te in Midian upate kiangah, "Bawngtal khat in lo sunga lopate a liahmang bangin hih mihon kawivakte in i kima na khempeuh a liakmang ding uh hi," a ci uh hi. Tua ciangin tua huna Moab kumpipa Zippor tapa Balak in,

⁵Gun d kianga ama leitang Pethor a om Beor tapa Balaam kiangah kamtai sawlin a samsak hi. Balak in: "Egypt panin mihonpi khat hong paikhia uh hi; amaute in leitang tung teng tuam uh a, kei zomah teng uh hi.

⁶Hong pai inla hih mite hong hamsiatsak in, bang hang hiam cih leh amaute hat lua mahmah uh ka sa hi. Tua hileh amaute zoin gamsung pan ka hawlkhia thei ding hi, ci-in ka ummawh hi. Ahang in, nang thupha na piakte in thupha ngah uh a, na hamsiatte sia uh hi, cih ka thei hi," a ci hi.

⁷Moab le Midian upate a aisan thaman ding uh tawh a kuankhia uh hi. Balaam kiang a tun uh ciangin amaute in Balak gensa teng a gen uh hi.

⁸Balaam in amaute kiangah, "Hih lai-ah zantaam unla, TOPA hong piak a dawnna note kong puak kik ding hi," a ci hi. Tua ciangin Moab-te’ uliante a taam uh hi.

⁹Balaam kiangah Pasian pai-a, "Na ompih hih mite kua ahi hiam?" ci-in a dong hi.

¹⁰Balaam in Pasian kiangah, "Moab kumpipa Zippor tapa Balak in hih thu hong khak hi:

¹¹Egypt pana hong paikhia mihonpi khat in lei maitang teng tuam uh hi. Hong pai inla amaute hong hamsiatsak in. Tua ciangin amaute do-in ka nawhmang thei kha ding hi,’ hong ci hi," a ci hi.

¹²Ahi hangin Pasian in Balaam kiangah, "Amaute zui kei in. Amaute thupha kipiasa ahi manun tua mite na hamsiat peuhmah kei ding hi," a ci hi.

¹³A zing ciang zingsangin Balaam tho a, Balak uliante kiangah, "TOPA in note kong zuih ding hong phal lo ahi manin na gam uah ciah kik un," a ci hi.

¹⁴Tua ciangin Moab-te uliante Balak kiangah ciah kik uh a, "Balaam in kote hong zui nuam lo hi," a ci uh hi.

¹⁵Tua ciangin Balak in a masa teng sanga a tamzaw tham le a zahtakbaang-zaw tham ulian dang a sawl hi.

¹⁶Amaute Balaam kiang tung uh a: "Hih in Zippor tapa Balak gen ahi hi: Kei kiangah nong pai ding bangmah kikolsak kei in,

¹⁷bang hang hiam cih leh pahtakman hoih mahmah kong pia dinga na cih bangbang ka hih ding hi. Hong pai inla hih mite hong hamsiatsak in," a ci uh hi.

¹⁸Ahi hangin Balaam in amaute kiangah, "Balak in a kumpi inn dim kham le ngun hong pia taleh TOPA ka Pasian hong thupiak zah val, aneu ahi a, alian ahi zongin bangmah ka sem thei kei hi.

¹⁹Adangte mah bangin tuzan hih lai-ah taam unla TOPA in kei kiangah bang hong genbeh lai hiam hong dong ning," a ci hi.

²⁰Tua zanin Balaam kiangah Pasian pai a, "Hih mite nang hong sama hong pai ahi nungsangin amaute zui inla ahi hangin kong gensa bang bekin hih in," a ci hi.

²¹Zingsangin Balaam tho-a, a laa tutphah vawhin Moab uliante a zui hi.

²²Ahi hangin amah a pai ciangin Pasian heh mahmah a, TOPA vansawltak khat in lampi-ah a pang hi. Balaam ama laa tungah tuanga a nasem nihte a tonpih hi.

²³Tua laa in, a khutah namsau dawhkhiatsa-a tawi, lampi-a ding TOPA vansawltak a muh ciangin lampi pan gamlak ah a pial hi. Balaam in satin lampi a zuisak kik hi.

²⁴Tua ciangin lenggui lo kikal-a a lang tuakah phungkho om tuak lam neuna khatah TOPA vansawltak a na ding hi.

²⁵Laa in TOPA vansawltak a muh ciangin phungkho phu tentan a, Balaam khe phungkho tawh a nencip hi. Tua ciangin a laa a sat leuleu hi.

²⁶Tua khit ciangin TOPA vansawltak na mapai-a, taklam le veilam kihei nading a om lohna mun kawcik khatah a na ding hi.

²⁷Laa in TOPA vansawltak a muh ciangin Balaam nuai-ah a bok hi, amah hehin a ciangkhutin a sat hi.

²⁸Tua ciangin TOPA in laa kam honsak-a, Balaam kiangah, "Kei thumveitak nong sat na zah dingin nang bang hong cih ka hi hiam?" a ci hi.

²⁹Balaam in laa kiangah, "Kei nong haibawl hang ahi hi! Namsau ka tawi laitak hileh tu mahmah in kong that ding hi," a ci hi.

³⁰Laa in Balaam kiangah, "Tuni dong a tawntunga na tuanna nangma laa hi lo ka hi hiam? Hih bangin nang hong hih ngei ka hi hiam?" a ci hi. Amah in, "Nong hih ngei kei hi," a ci hi.

³¹Tua khit ciangin TOPA in Balaam mit honsak a, namsau dawhsa tawh lamlai-a ding TOPA vansawltak a mu hi. Tua ciangin lei lam nga-in a kunsuk hi.

³²TOPA vansawltak in ama kiangah, "Bang hangin na laa thum veitak sat na hi hiam? Nang hong pang dingin hih lai-ah kong pai hi, bang hang hiam cih leh ka mai-a na lampi na thusim kei hi. a

³³Laa in kei hong mu-a, thumveitak kei hong peel hi. Amah in hong peel lo hileh tu mahmah in nang kong that khin taktak dinga ahi hangin amah ka hawi ding hi," a ci hi.

³⁴Balaam in TOPA vansawltak kiangah, "Ka mawh zo hi. Kei hong pang dingin lampi ah na din ding lam ka phawkkha kei hi. Nang lungkim lo na hileh ka kileh ding hi," a ci hi.

³⁵TOPA vansawltak in Balaam kiangah, "Mite zui inla ahi hangin nang tunga kong gen teng bek gen in," a ci hi. Tua ciangin Balaam in Balak uliante a zui hi.

³⁶Balaam pai hi, cih Balak in a zak ciangin a gamgi monga om, Arnon gamgi-a om Amor-te khuapi-ah a dawn dingin a kuan hi.

³⁷Balak in Balaam kiangah, "A manlangin nang hong sam ding hong sawl hi lo ka hi hiam? Bang hang hong pai pah lo na hi hiam? Nang pahtakman hong pia thei buang lo ding ka hi hiam?" a ci hi.

³⁸Balaam in, "Pha hi, tu-in nang kiang kong tung khin hi. Ahi hangin ka hizah val khatpeuh hong gen thei ding ka hi hiam? Pasian in ka kam-a a koih zah bek ka gen kul ding hi," a ci hi.

³⁹Tua khit ciangin Balaam in Balak zui-a Kiriath Huzoth ah a paikhawm uh hi.

⁴⁰Balak in bawngte le tuute biakna-in pia a, tuate pawl khat Balaam le amah tawh a omkhawm uliante a pia hi.

⁴¹A zing ciang zingsangin Balak in Bamoth Baal dong Balaam paipih a, tua lai panin mipite pawlkhat a mu hi.