Read Zokam Misimna 23 Bible Online

Misimna 23 - Zokam bible

Misimna 23

¹Balaam in, "Hih lai-ah biakna-tau sagih hong dawhsak inla, kei adingin bawngtal sagih le tuutal sagih hong bawlsak in," a ci hi.

²Balaam cih bangin Balak in hih a, biakna-tau khatah bawngtal khat le tuutal khat ta a pia hi.

³Balaam in Balak kiangah, "Ka paikhiat kalin hih na biakna kiangah na om in, TOPA in kei hong kimuhpih nuam kha ding hi. Kei tunga hong lah peuhpeuh kong gen ding hi," a ci hi. Tua ciangin amah pawnlak munsang khatah a paikhia hi.

⁴Pasian in amah na dawn a, Balaam in, "Biakna-tau sagih ka dawh khin-a, tau khatah bawngtal khat le tuutal khat ka pia khin hi," a ci hi.

⁵TOPA in Balaam kam sungah thu muam-a, "Balak kiangah pai kik inla amah hih thu pia in," a ci hi.

⁶Tua ciangin ama kiangah pai kik a, a biakna gei-ah Moab uliante khempeuh tawh amah a dingkhawm a mu hi.

⁷Tua ciangin Balaam in a thusuak pulak a: "Balak in Aram panin kei hong paipih a, nisuahna mualte panin Moab kumpipa in hong paipih hi. Amah in, ‘Jacob hong hamsiatsak in; hong pai inla Israel mawhsak in,’ ci hi.

⁸Pasian hamsiat loh amaute bang ka ci hamsiat theih ding hiam? TOPA mawhsak loh amaute bang ka ci mawhsak thei ding hiam?

⁹Asannate panin amaute ka gal-et a, suangpi dawn panin amaute ka mu hi. A tuam ten mite ka mu a, amau le amau minam khata a kisim lote ahi uh hi.

¹⁰Tua in Jacob leivui sim thei-in, Israel sehli suah sehkhat sim zo ding ahi hiam? A thumaan mi sih bangin kei hong sisak inla ka hun tawpna amaute aa bangsak in," a ci hi.

¹¹Balak in Balaam kiangah, "Kei bang hong cih na hi hiam? Ka galte hamsiat dingin nang kong sam hi, ahi hangin bangmah cih loin amaute thupha na pia zawsop hi!" a ci hi.

¹²Amah in, "TOPA in ka kam sunga hong guan thu gen pelmawh lo ding ka hi hiam?" ci-in a dawng hi.

¹³Tua ciangin Balak in a kiangah, "Amaute na muh theih nading a mundang khatah kei hong zui in; a khenkhat bek na mu ding hi, a vekpi uh hi nai lo hi. Tua lai panin hong hamsiatsak in," a ci hi.

¹⁴Tua ciangin Zophim gamlaka Pisgah dawna paipih a, tua lai-ah biakna-tau sagih dawhin tau khatah bawngtal khat le tuutal khat ta a pia hi.

¹⁵Balaam in Balak kiangah, "Hua lai-a amah tawh ka kituah sung na biakna kiang hih lai-ah na om in," a ci hi.

¹⁶TOPA in Balaam na dawntuah a, ama kamah thu muamin, "Balak kiangah pai kik inla hih thu amah pia in," a ci hi.

¹⁷Tua ciangin ama kiangah pai kik a, a biakna gei-a Moab uliante tawh amah a dingkhawm a mu hi. Balak in, "TOPA in bang ci hiam?" ci-in a dong hi.

¹⁸Tua ciangin a thusuak pulak a: "Balak, tho inla ngai in; Zippor tapa aw, ka thugen za in.

¹⁹Pasian pen zuau gen dingin mihing hi lo a, a lungsim kheng themthum dingin mihing tapa zong ahi kei hi. A cihsa hih lo ding ahi hiam? A khapsa tangtun lo ding ahi hiam?

²⁰Thupha piak ding thupiakna ka ngah zo hi; amah in thupha pia khin hi, ken ka khel thei kei hi.

²¹"Jacob sungah kamsiatna kimu lo-a, Israel sungah lungnoplohna a a om kei hi. TOPA amaute Pasian amaute tawh omkhawm hi; amaute lakah Kumpipa a kiko hi.

²²Pasian in amaute Egypt panin paikhiatpih a; amaute in gam bawngtal tha a paii uh hi.

²³Jacob langah bumna om lo-a, Israel langah aisanna a om kei hi. Tu-in keimah in Jacob kiang le Israel kiangah, "Pasian sepsa mu in!" a ci ding hi.

²⁴Tua mite humpinelkai pi a bang uh hi; amaute a sa matsa a nek ma sisan a dawn khit matenga a ommawk thei lo humpinelkai bangin a diangdiang uh hi," ci hi.

²⁵Tua khit ciangin Balak in Balaam kiangah, "Amaute hamsiat kei inla thupha lah pia kei in!" a ci hi.

²⁶Balaam in, "TOPA cih peuhpeuh ka hih kul hi, hong ci hi lo ka hi hiam?" ci-in a dawng thi.

²⁷Tua ciangin Balak in Balaam kiangah, "Hong pai dih in, a mundang khatah hong paipih lai dih ning. Tua lai panin amaute nong hamsiatsak ding Pasian lungkim kha thei ding hi," a ci hi.

²⁸Tua ciangin Balak in gamval a kimuhsukna Peor dawnah Balaam a paipih hi.

²⁹Balaam in, "Hih lai-ah biakna-tau sagih hong dawh inla bawngtal sagih le tuutal sagih hong bawl in," a ci hi.

³⁰Balaam gensa bangin Balak in hihsak a, tau khempeuh ah bawngtal khat le tuutal khat ta a pia hi.