Read Zokam Misimna 24 Bible Online

Misimna 24 - Zokam bible

Misimna 24

¹Balaam in Israel-te thupha a piak TOPA lungkim hi cih a theih ciangin a hun dangte bangin aisaan dingin a kuan nawn kei hi. Ahi hangin sehnel gam lam a maingat hi.

²Balaam khuadak a, Israel-te a behbeh in giahphual sata om a muh ciangin ama tungah Pasian Kha tungin,

³ama thusuak pulak a: "Beor tapa Balaam thusuak, siangtaka a mit tawh a mupa thusuak,

⁴Pasian kammal a zapa khat thusuak, Thahatpa b pan-a mangmupa, lum ditdiat napi-a mit-hakpa pan:

⁵"Jacob aw, na puanbukte, Israel aw, na tenna munte kilawm nah e!

⁶"Mualkuam bangin kiphalh a, gungei-a huante bangin TOPA suansa mualheuhpak banga tuigei-a tamtak kung tawh kibang hi.

⁷Amaute beelkhai panin tui luang dinga amau khaicite in tui a kicingin a ngah ding uh hi. "Amaute kumpipa Agag sangin lianzaw ding uh hi; amaute kumpi-gam a kitawisang ding hi.

⁸"Pasian in Egypt panin paikhiatpih a; gam bawngtal bangin a hat uh hi. Amaute in amau gal minamte netum ding uh a, a guhte uh suzan ding uh hi; a thaltang uh tawh amaute kaplet ding uh hi.

⁹Amaute humpinelkai bangin thamvakin bok uh a, humpinelkai pi bang uh hi - amaute kua in phawng ngam ding ahi hiam? "No thupha hong piate in thupha ngah uh henla, no hong hamsiatte kihamsiat hen!" a ci hi.

¹⁰Tua khit ciangin Balaam tungah Balak a heh lua mahmah hi. Amah in a khut le a khut tumin a kiangah, "Ka galte hamsiat dingin nang kong samsak hi. Ahi hangin thumvei tak thupha na pia hi!

¹¹Tu-in ciah meng in! A kilawm zah pahtakman kong pia ding hi kong ci hi, ahi hangin TOPA in na pahtakman hong khaktansak hi," a ci hi.

¹²Balaam in Balak kiangah, "Ka kiangah nong sawl kamtaipa tungah,

¹³"Balak in a kumpi inn dim ngun le kham hong piak hangin a sia ahi a, a pha ahi zongin TOPA hong thupiak zah val kei thu-in bangmah ka hih kei hi - TOPA gensa bek ka gen kul hi," ci hi lo ka hi hiam?

¹⁴Tu-in ka mite kiangah ka ciah ding hi, ahi hangin hong pai dih in, mailam hunah hih mite in na mite bang cih ding hiam kong hilhkhol ding hi," ci-in a dawng hi.

¹⁵Tua ciangin ama thusuak pulak a: "Beor tapa Balaam thusuak, siangtaka a mit tawh a mupa thusuak,

¹⁶Pasian kammal a zapa khat thusuak, Sangpen Pa pana theihna, Thahatpa pana mangmupa, lum ditdiat napi a hakpa pan:

¹⁷"Amah ka mu a, ahi hangin tuhun a hipah kei hi; amah ka en hi, ahi hangin nai pak nai lo hi. Jacob pana aksi khat hong suakkhia ding hi; Israel panin sik ciangkhut khat hong khang ding hi. Amah in Moab-te taltang Seth a tapate b lutang guh c khempeuh a satkham ding hi.

¹⁸Edom kizo ding hi; ama gal Seir kizo dinga, ahi hangin Israel a thakhauh lai ding hi.

¹⁹Jacob panin ukpa khat hong piang dinga, khuapi pan-a suakte a susia ding hi," a ci hi.

²⁰Tua ciangin Balaam in Amalek mu a, a thusuak gen in: "Minamte lakah Amalek a masapen hi-a, ahi hangin a tawpna ah a kisusia ding hi," a ci hi.

²¹Tua ciangin Ken-te mu-a, a thusuak genin: "Na tenna uh mun kho hi-a, suangpi sungah na bu uh kitom hi;

²²tua hi napi no Ken-te, Asshur in galmatin note hong lak ciangin na kisia ding uh hi," a ci hi.

²³Tua ciangin ama thusuak gen a: "Kalasai, Pasian in hih a sep ciangin kua nungta zo ding hiam? d

²⁴Kittim gun gei panin tembawpite hong pai-in; tuate in Asshur le Eber thazawh ding uh a, ahi hangin tuate zong a kisia ding uh hi," a ci hi.

²⁵Tua khit ciangin Balaam dingkhia-a innah ciah in Balak ama ciah nading ah a ciah hi.