Read Zokam Misimna 25 Bible Online

Misimna 25 - Zokam bible

Misimna 25

¹Shittim ah Israel a om laitakin pasalte, amau pasiante bia dinga a sam Moab numeite tawh

²numei le pasal paktat ding a kipan uh hi. Mite in ne in amau pasiante mai-ah a kun uh hi.

³Tua bangin Israel in Peor a Baal biakna a biakpih hi. Tua ciangin amaute tungah TOPA hehna a kuang hi.

⁴TOPA in Moses kiangah, "Hih mite makaite khempeuh paipih inla Israel tunga TOPA hehluatna a kipelh theih nadingin amaute that inla, TOPA mai-ah suntangpi in amaute pholak in," a ci hi.

⁵Tua ciangin Moses in Israel thukhente tungah, "Note in Peor a Baal a biakpih na mite uh khat ciat na that ding uh hi," a ci hi.

⁶Kikhopna Puanbuk lutna-ah amaute a kahkah laitakun Israel-te pasal khat in Moses le Israel mihonpite muhin Midian-te numei khat a innkuanpihte kiangah a ciahpih hi.

⁷Siampi Aaron’ tapa, Eleazar’ tapa Phinehas in a mu hi; amah in a khutah teipi khat tawi kawma mihonpite nusia-in

⁸Israel mipa a puanbuk sung dong a zui hi. Amah in amaute gel - Israel mipa pailetin tua numei pumpi zong a dawtlet suak hi. Tua ciangin Israel-te thuak pulpi a veng hi;

⁹ahi hangin tua pulpi-a si mi 24,000 a pha hi.

¹⁰TOPA in Moses tungah,

¹¹"Siampi Aaron’ tapa, Eleazar’ tapa Phinehas in Israel tunga ka hehna a damsak zo hi; ahang in, pammaih ka sakna hangin amaute ka beisak loh nadingin, amaute lakah kei pahtawina kei amm zahin a amm hi.

¹²Tua ahi manin ama kiangah gen in, amah tawh kilemna thukhun ka bawl khin hi.

¹³Amah le ama suante in siampi hihna a kip thukhun nei ding uh hi, bang hang hiam cih leh amah in a Pasian a pahtawina-in pammaih sa-in Israel-te ading thoihdamna a bawl hi," a ci hi.

¹⁴Midian numei tawh a kithat khawm Israel mipa min Simeon innkuan-a makaipa Salu’ tapa Zimri ahi hi.

¹⁵Midian-te a kithat nu min Midian-te innkuan pana beh ukpi Zur’ tanu Cozbi ahi hi.

¹⁶TOPA in Moses tungah,

¹⁷"Midian-te galbawl inla amaute that in;

¹⁸bang hang hiam cih leh Peor thu le Peor-a pulpi a tunna hang a kithat Midian-te makaipa tanu amaute sanggamnu hangin nang hong khemin hong galneih uh hi," a ci hi.