Read Zokam Misimna 3 Bible Online

Misimna 3 - Zokam bible

Misimna 3

¹Hih in, Sinai Vum tungah TOPA in Moses a hopih lai-a Moses le Aaron-te innkuan simna ahi hi.

²Aaron tapate minte: a tacil Nadab tuateh Abihu, Eleazar le Ithamar ahi hi.

³Tuate pen sathau kinilhsa siampite, siampi sem dinga a kikipsaksa Aaron tapate ahi hi.

⁴Nadab le Abihu ahileh Sinai Sehnel gamah mei siangtho lo zangin TOPA maiah biakna a piak uh ciangin ama mai-ah pukin a si uh hi. Amaute in tapa a nei kei uh hi; tua ahi ciangin a pa uh Aaron a nuntak hun sungin Eleazar le Ithamar bekin siampi a sem uh hi.

⁵TOPA in Moses tungah,

⁶"Levi behte paipih inla, amah huh dingin amaute siampi Aaron tungah pia in.

⁷Amaute in Kikhopna Puanbuk-a biakbuk na a sepna uah ama ading le mipi bup adingin na a sem ding uh hi.

⁸Amaute in Kikhopna Puanbuk sunga nazat khempeuh kem ding uh a, biakbuk nasepna ah Israel dangte hih ding ngeina teng a tangtungsak ding uh hi.

⁹Aaron le a tapate tungah Levi-te pia in; ama a tungah a kibup piak Israel-te amaute ahi hi.

¹⁰Aaron le a tapate siampi sem dingin seh in; munsiangtho ah a pai midang khatpeuh kithat ding hi," a ci hi.

¹¹TOPA in zong Moses tungah,

¹²"Israel-te lak panin Israel numeite’ tapa upa pen mun-a dingin Levi-te ka la khin zo hi. Levi mite kei aa ahi hi;

¹³ahang in, ta cilte kei aa ahi hi. Egypt ah tacil khempeuh ka sattuk lai-in mihing ahi a, ganhing ahi zongin Israel-te pana suak tacil peuhmah kei adingin ka tuam koih hi. Amaute kei aa ahi ding uh hi. Keimah TOPA ka hi hi," zong a ci hi.

¹⁴Sinai Sehnel gama Moses tungah TOPA in,

¹⁵"Levi-te amau bawng’te le a innkuante zui-in sim in. Pasal kha khat pan a tungsiah peuhmah sim in," a ci hi.

¹⁶Tua ciangin TOPA kammal in amah a thupiak bangin Moses in amaute a sim hi.

¹⁷Hihte Levi tapate minte ahi hi: Gershon, Kohath le Merari.

¹⁸Hihte, Gershon bawng’te minte ahi hi: Libni le Shimei.

¹⁹Kohath bawng’te: Amram, Izhar, Hebron le Uzziel.

²⁰Merari bawng’te: Mahli le Mushi. Hihte in amau innkuan zui-in Levi behte ahi hi.

²¹Libni mite le Shimei mite pen Gershon bawng’te ahi uh hi; hihte pen Gershon mite bawng’te ahi hi.

²²Kha khat pan a tungsiah a pha pasal a kisim khempeuh 7,500 a pha hi.

²³Gershon mite bawng’te in biakbuk nung nitumna lamah giahphual a sat uh hi.

²⁴Gershon mite innkuan makaipa, Lael tapa Eliasaph ahi hi.

²⁵Kikhopna Puanbuk ah Gershon mite tavuan in: biakbuk le puanbuk a khuhnate tawh, Kikhopna Puanbuk lutna a puankhai,

²⁶buktual a puankhaite, biakbuk le biakna-tau kimkot-a, a huang umna puante le a khaute - le tuate tawh a kizom na khempeuh ahi hi.

²⁷Amram mite, Izhar mite, Hebron mite le Uzziel mite pen Kohath bawng’te ahi uh hi; hihte in Kohath mite bawng’te ahi uh hi.

²⁸Kha khat pan a tungsiah pasal peuhmah 8,600 b a pha uh hi. Munsiangtho cin ding Kohath-te tavuan ahi hi.

²⁹Kohath-te bawng’te in biakbuk leitaw-lam pangah giahphual a sat uh hi.

³⁰Kohath innkuante bawng’te makaipa, Uzziel tapa Elizaphan ahi hi.

³¹Amaute tavuan in singkuangpi, sabuai, meivak tunna, biakna-tau, biakna nasepna-a kizang mun siangtho sunga nate, puanzak, le tuate tawh kizom na khempeuh cin ding ahi hi.

³²Levi-te makai lian pen siampi Aaron tapa Eleazar ahi hi. Amah munsiangtho cing dinga tavuan neite khempeuh tunga a uk dinga kikoih ahi hi.

³³Mahli mite le Mushi mite pen Merari bawng’te ahi uh hi; hihte, Marari bawng’te ahi uh hi.

³⁴Kha khat pan a tungsiah pasal a kisim peuhmah 6,200 a pha hi.

³⁵Merari innkuan bawng’te makaipa Abihail tapa Zuriel ahi hi; amaute in biakbuk leilu-lam pangah giahphual a sat uh hi.

³⁶Merari mite pen biakbuk singpekte, a zawnna zawlte, a khuamte, a bullente, a kizang nengneng khempeuh, le tuate tawh a kizom a kizang na khempeuh,

³⁷tuate banah a huang umna khuamte a bullente tawh, puanbuk khetphim le a khaute tawh a cing dinga kiseh ahi hi.

³⁸Moses le Aaron le a tapate in biakbuk nisuahna-lam pangah nisuahna-lam nga-in Kikhopna Puanbuk mai-ah giahphual a sat uh hi. Amaute in Israel-te tangin mun siangtho cin tavuan la ding uh hi. Midang khatpeuh mun siangtho nai-in a pai leh kithat ding hi.

³⁹TOPA thupiakna tawh Moses le Aaron in amau bawng’te zui-a a sim uh kha khat pan a tungsiah pasal peuhmah 22,000 a pha hi.

⁴⁰TOPA in Moses tungah, "Israel-te tacil pasal kha khat pan a tungsiah peuhmah sim inla amaute min ciamteh in.

⁴¹Israel-te tacilte tangin kei adingin Levi-te nong laksak dinga, Israel-te ganhing tacilte khempeuh tangin Levi-te ganhingte nong laksak ding hi. Keimah TOPA ka hi hi," a ci hi.

⁴²Tua ciangin TOPA in amah a thupiaksa bangin Moses in Israel-te tacil khempeuh a sim hi.

⁴³A min a ciamteh kha khat pan a tungsiah tacil pasal khempeuh 22,273 a pha hi.

⁴⁴TOPA in Moses tungah,

⁴⁵"Israel tacil khempeuh tangin Levi-te la inla, amaute ganhing tacil tang dingin Levi-te ganhingte la in. Levi-te kei aa hi ding hi. Keimah TOPA ka hi hi.

⁴⁶Levi-te sangin tatkhiat ding Israel-te tacilte 273 in tamzaw hi;

⁴⁷tuate tat nadingin mun siangtho shekel gerah sawmnih a gik tawh kizui-in mi khat ciangin shekel a nga ta khawm in.

⁴⁸Tua sum pen Israel-te a tamzawknate tatna-in Aaron le a tapate tungah pia in," zong a ci hi.

⁴⁹Tua ciangin Moses in Levi-te banah a val lai mite tung panin kitatna sum a kaikhawm hi.

⁵⁰Amah in Israel tacilte panin munsiangtho shekel b tawh kizui-in sumngo shekel 1,365 a kaikhawm hi.

⁵¹Moses in TOPA thupiakna kammal bangin tua tatna sumte Aaron le a tapate a pia hi.