Read Zokam Misimna 30 Bible Online

Misimna 30 - Zokam bible

Misimna 30

¹Moses in Israel bawng’ lutangte tungah, "Hih in TOPA thupiak ahi hi:

²Mi khat in TOPA tungah thu a ciam ahikeh a tomlawh ciangin a kiciamna in amah khih hi. Amah in a kammal pelh thei lo dinga a cihsa khempeuh a sem pelmawh ding hi.

³"Numei khangmoi khat in a pa’ inn a, a om lai-in TOPA tungah thu a ciam ahikeh ama zuih dingin a pa zakin thu a ciama, a zuih dingin a koih a,

⁴a pa in ama kiciamna thu za napi bangmah a genpih keileh tua ama kiciamna le a zuih ding khempeuh a kip ding hi.

⁵Ahi hangin tua thu a pa in za-a, a kham leh ama kiciamna leh zuih dinga a ciamte a kip lo a suak hi; a pa in kham ahi manin TOPA in amah a suaktasak ding hi.

⁶"Tuanu in amah a khih ding kiciamna a bawl khit ahikeh ngaihsun khol lo-in a kam tawh a kimawk ciam khitin mi khat tawh a kiten a,

⁷a pasal in za napi tuanu tungah bangmah a gen keileh tua ciangin amah le amah a kikhihna kiciamnate ahikeh a zuih dingte a kip ahi hi.

⁸Ahi hangin a pasal in tua thu a zak ciangin a kham leh amahmah a kikhihna kiciamna le kama kiciam mawkna a lawmpa in phiatsak ahi manin TOPA in amah a suaktasak hi.

⁹"Meigong numei khat ahikeh mimaksa numei khat ama thu-a a kiciamna in amah a khih ding hi.

¹⁰"A pasal tawh a nungta khawm numei khat in thuciamna bawl ahikeh tomlo in zuih ding bawla a kikhih leh

¹¹a pasal in tua thu za napi bangmah gen loin a kham kei leh tua ciangin tuanu kiciamna ahikeh amahmah a kikhihna zuih dingte a kip ahi hi.

¹²Ahi hangin a pasal in tua thu a zak ciangin a phiatsak leh tua ciangin a kam pana a cih khiat kiciamnate ahikeh zuih dingte khat beek a kip kei hi. A pasal in phiat khin ahi manin, TOPA in tuanu a suaktasak hi.

¹³A pasal in ama kiciamna khatpeuh ahikeh zuih dinga a ciamna khatpeuh a nial nop leh kipsak thei, beisak thei hi.

¹⁴Ahi hangin a pasal in tua ni-a kipan bangmah a gen kei leh tua ciangin tuanu a khih kiciamna ahikeh zuih dingte khempeuh a kipsak a suak hi. Amah in tuate a zak ciangin tuanu tungah bangmah a genlohna tawh tuate a kipsak a suak hi.

¹⁵Ahi zongin tuate a zak nung hun khat ciangin tuate a phiat leh tuanu mawhna ama tung tu ding hi," a ci hi.

¹⁶TOPA in Moses tungah hihte zi le pasal kikal le a pa inn sunga a om lai numei khangmoi laite le a pa kikal thu tawh kisai kizop nadinga a piak ngeinate ahi hi.