Read Zokam Misimna 31 Bible Online

Misimna 31 - Zokam bible

Misimna 31

²"Israel-te phu Midian-te tungah la in. Tua khit ciangin na mipihte kiangah hong kipaipih pan ding hi," a ci hi.

³Tua ciangin Moses in mite kiangah, "Midian-te sima TOPA phulakna a sem dingin mite pawlkhat galhiam tawh kithawisak un;

⁴Israel beh khat ciangin pasal tulkhat ta kuansak un," a ci hi.

⁵Tua ciangin beh khat panin tulkhat ta a kuan galhiam tawi mi tulsawm le nih Israel bawng’te panin a kuansak ciat uh hi.

⁶Moses in beh khatah mi tulkhat galsim dingin sawla, Eleazar tapa siampi Phinehas, biakbuka nate le thukoh nadingin pengkulte kengsakin amaute a zuisak hi.

⁷TOPA in Moses a thupiak bangin amaute in Midian-te sim uh a mi khempeuh a that uh hi.

⁸A mi thahte uh lakah Midian kumpi ngate ahi: Evi, Rekem, Zur, Hur le Reba zong kihel hi. Amaute in Beor tapa Balaam zong a that uh hi.

⁹Israel-te in Midian-te’ numei le naupangte le Midian-te’ bawnghon, tuuhonte le a na khempeuh uh galvanmat bangin a man uh hi.

¹⁰Midian-te tenna khuapite le a giahbuk khempeuh uh a haltumsak uh hi.

¹¹Van khempeuh laksak uh a, mite le ganhingte susia-in

¹²Jericho b pan Jordan gun kantanna Moab zanglei-a giahphual - Israel mihonte kikhopna-a Moses le siampi Eleazar kiangah a galmatte uh, a van matte uh le a van laksakte uh a tun uh hi.

¹³Amaute dawn dingin Moses, siampi Eleazar le mihonpi makaite giahphual pua-ah a paikhia uh hi.

¹⁴Galkapte a makaih tul tampi ukte le za tampi ukte - giah phual-a hong ciahte tungah Moses a heh hi.

¹⁵Amaute kiangah, "Numeite hingkhawi na hi uh hiam?

¹⁶TOPA tung pana Israel-te a kiheikhiasak, Peor ah TOPA mite tunga pulpi a tungsak Balaam hilhna a mang amaute hi lo uh ahi hiam?

¹⁷Tu-in pasalno teng that un. Tuateh pasal tawh a lumkhawmsa numei peuhmah that unla,

¹⁸ahi hangin pasal tawh a lumkhawm nai lo numeino peuhmah nomau adingin suaktasak un.

¹⁹"Mi khatpeuh a that ahikeh a kithatsa a lawngkhate peuhmah ni sagih sung giahphual pualam ah na om pelmawh ding uh hi. A ni thumna ni le a ni sagihna ni-in no le na galmatte uh na kisiansuah ding uh hi.

²⁰Savun, keelmul ahikeh singa kibawl nate le puansilh khempeuh na siansuah ding uh hi," a ci hi.

²¹Tua ciangin gal sunga kuan galkapte kiangah siampi Eleazar in, "TOPA in Moses a piak thukham deihna hih ahi hi:

²²Kham, ngun, sumngo, sik, langva, hak

²³le mei a do zo na peuhmah mei-in kihal pelmawh dinga tua ciangin a siang suak ding hi. Ahi hangin sianna tui ah zong kisawp pelmawh ding hi. Tuateh mei a do zo lo peuhmah tua tui sungah kidiah ding hi.

²⁴A ni sagihna ni-in na puante uh na sawp ding uh a na siang ding uh hi. Tua khit ciangin giahbuk sungah na tum thei pan ding uh hi," a ci hi.

²⁵TOPA in Moses kiangah

²⁶"Nang le siampi Eleazar le mihonte innkuan lutangte khempeuh in a kiman mihing le ganhingte sim un.

²⁷Gal sunga kuan galkapte le mihonpite a vanmatte uh hawmsak un.

²⁸Galsim a kuan galkapte aa panin mihingte, bawnghonte, laate, tuuhonte ahikeh keelte, zanga ciangin khat TOPA siahkaih dingin sehkhia un.

²⁹Amau ngahzah lang sung panin hih siahkaih la unla, TOPA tanh dingin siampi Eleazar tungah pia un.

³⁰Israel-te ngah alang sung panin mihingte, bawnghonte, laate, tuuhonte, keelte ahikeh ganhing dangte sawmnga ciangin khat ciat tengkhia inla TOPA’ biakbuk kem dinga thunei Levi-te tungah tuate pia in," a ci hi.

³¹Tua ciangin Moses le siampi Eleazar in, TOPA in Moses a thupiak bangin a sem uh hi.

³²Van kimante sunga a omlai galkapte lakte tuu 675,000

³³bawng 72,000,

³⁴laa 61,000,

³⁵le pasal tawh a lumkhawm nai lo numeino 32,000 ahi hi.

³⁶Gal sima kuante ngah a langte: tuu 337,500

³⁷tuate lakah TOPA ading siahkaih 675;

³⁸bawng 36,000 tuate lakah TOPA ading siahkaih 72;

³⁹laa 30,500 tuate lakah TOPA ading siahkaih 61;

⁴⁰mihing 16,000 tuate lakah TOPA ading siahkaih 32, ahi hi.

⁴¹TOPA in Moses a thupiak bangin Moses in TOPA tanh dingin siampi Eleazar tungah siahkaih a pia hi.

⁴²Galsimna a kuante ngahzah a lang mah Israel-te adingin Moses in sehkhia a -

⁴³mihonpite ngah a lang in: tuu 337,500,

⁴⁴bawng 36,000,

⁴⁵laa 30,500,

⁴⁶le mihing 16,000 ahi hi.

⁴⁷Israel-te aa a lang panin mihing le ganhing sawmnga ciangin khatta TOPA thupiak bangin Moses in tengkhia a, TOPA biakbuk kepna-a tavuan nei Levi-te tungah a pia hi.

⁴⁸Tua ciangin galkap hon tampi tungah a ukte tul tampi ukte - za tampi ukte - Moses kiangah pai uh a,

⁴⁹ama tungah, "Nangma nasem kote in ka ukna nuai-ua om galkapte ka sim khin uh a, khat beek a kikhahsuah kei hi.

⁵⁰Tuateh kote in mawhna khuh nadingin TOPA biakna-in kham-a kibawl banbuh le taute, seal zungbuhte, bilbahte, khite ka muh ciatciat uh TOPA mai-ah thoihdamna dingin ka puak uh hi," a ci uh hi.

⁵¹Moses le siampi Eleazar in amaute tung panin kham-a kibawl na khempeuh a sang uh hi.

⁵²A tul tampi ukte le a za tampi ukte in Moses le Eleazar tungah TOPA adingin letsong a, a piak khempeuh uh kham shekel a 16,750 a gik hi.

⁵³Galkapte in amau tanh ciat a la uh hi.

⁵⁴Moses le siampi Eleazar in a tul tampi ukte le a za tampi ukte tung panin khamte sang uh a, Israel-te phawk tawntung nadingin Kikhopna Puanbuka TOPA mai-ah a puak uh hi.