Read Zokam Misimna 35 Bible Online

Misimna 35 - Zokam bible

Misimna 35

¹Jericho b pana kantanna Jordan gungei Moab zangleite tungah TOPA in Moses tungah,

²"Israel-te in luaha a neih ding uh sung panin Levi-te ten nading khuapite a piak dingun Israel-te thu pia in. Khuapite kima a lonona munte zong amaute pia in.

³Tua ciangin amaute in a ten nading uh khuapi le a tuuhon a bawnghonte uh le a ganhing khempeuh uh adingin lonona mun nei pan ding uh hi.

⁴"Levi-te na piak khuapite kima lonona mun, khuapi kulh panin pi c tul le zanga a huam ding hi.

⁵A khuapi pualam ah nisuahna-lam pang pi d tulthum, leitaw-lam pang pi tulthum, nitumna-lam pang pi tulthum le leilu- lam pang pi tulthum tehin a khuapi a laizangah a om ding hi. Amaute in hih mun teng khuapi lonona munin a nei ding uh hi.

⁶"Levi-te na piak uh khuapite lakah guk, mi khatpeuh a thatkha mipa buk nading khuapi hi ding hi. Khuapi sawmli le nih amaute piak thuah lai un.

⁷Levi-te a lonona tawh na piakkhawm pelmawh ding uh a vekin khuapi sawmli le giat hi ding hi.

⁸Israel-te neihsa panin Levi-te na piak uh khuapite no bawng’ ciatciat luah zah tawh kituakin na pia ding uh hi. Khuapi tampi a nei bawng’te tung panin tampi la-in, ahi hangin a tawm neite tungah na tawm lak ding uh hi," a ci hi.

⁹Tua ciangin TOPA in Moses kiangah,

¹⁰"Isreal-te hopih inla amaute kiangah, ‘Jordan kantanin Canaan ah na lut uh ciangin

¹¹mi khatpeuh a thatkha mi khat a suahtak theih nadingin, na khuapite panun khuapi pawlkhat teelkhia un.

¹²Thu kikhen dingin mihonpite mai-ah a din ma-in mi that khate a sih loh nadingin phulapa panin bukna munah kikoih ding hi.

¹³Na piak uh hih khuapi gukte note bukna khuapi hi ding hi.

¹⁴Jordan hihlam galah thum, Canaan lam galah thum mah bukna khuapi-in pia un.

¹⁵Sawmkhol lopi a midang khat a that khate tua munah a suahtak theih nadingin hih khuapi gukte, Israel-te pemtate le amau laka a teng mi peuhmah adingin bukna khuapi hi ding hi.

¹⁶"‘Mi khat in na-a kizang sik khatin mi khatpeuh a si dingin a sat leh amah mi that ahi hi; tua mi thatpa kithat ding hi.

¹⁷Ahikeh mi khat in mi thah theih nading suangtum khat a khutah tawi-a, mi khatpeuh a si dingin tupna-a a neih leh amah mi that ahi hi; tua mi thatpa kithat ding hi.

¹⁸Ahikeh mi khatpeuh in thah theih nadingin a khut sungah na-a kizang sing khat tawi-a, a sih nadingin mi khatpeuh a sat leh amah mi that ahi hi; tua mi thatpa kithat ding hi.

¹⁹Sisan phulapa in mi thatpa a that ding hi; amah a tuahkhak ciangin a that ding hi.

²⁰Mi khatpeuh in sawmkhol lopi-in a sih nadingin suang ahikeh bang khatpeuh in a den a,

²¹ahikeh galbawlin a sih nadingin khuttumin a tup leh tua mipa kithat ding hi; amah mi that ahi hi. Sisan phulapa in mi thatpa a tuah khak ciangin a that ding hi.

²²"‘Ahi hangin galbawl lopi-a mi khatpeuh in midang khat sun vat ahikeh bukbawl loin na khatpeuhin deng

²³ahikeh amah mu lopi-in a sih theih nading suangtum khat khiatkha a, amah a sih leh tua ciangin amah a galpa hi loin amah liamsak a sawm ahi loh nungsangin

²⁴mipite in hih ding ngeina tawh kizui-in amah le sisan phulapa kikalah thu a khen ding uh hi.

²⁵Mipi in sisan phulapa panin mi that-a kingawhpa hu pelmawh ding uh a, amah a taina bukna khuapi ah paikiksak ding uh hi. Sathau siangtho a kinilh tulpipa a sih matengin tua lai-ah a teng ding hi.

²⁶"‘Ahi hangin a kimawhsakpa, a taina mun bukna khuapi-a a kiciangtanna mun pualam ah a pai-a,

²⁷khuapi pualam ah sisan phulapa in a muh leh mi that mawhsakna om loin sisan a kimawhsakpa that thei hi.

²⁸Tulpipa a sih matengin a kimawh-sakpa ama bukna khuapi ah a teng ding hi; tulpipa a sih ciang bekin ama neihsa munah ciah kik thei pan ding hi.

²⁹"‘Hong tung ding na tu na ta khangun hihte na tenna mun peuhpeuh uah note adingin a kisam ding ngeinate ahi hi.

³⁰"‘Mi khat in midang khatpeuh a thah leh tecite genna siksan bekin mi thatpa kithat ding hi. Ahi hangin teci khatbek genna siksanin khat beek a kithat kei ding hi.

³¹"‘A si dinga kisehsa mithatpa nuntakna kitatna sum na sang kei ding uh hi. Amah pel loin kithat taktak ding hi.

³²"‘Bukna khuapi-a a taisa mi khatpeuh, tulpipa a sih ma-in ama neihsa gamah ciah-a a ten nading phalna-in tatna sum na sang kei ding uh hi.

³³"‘Note omna gam na ninsak kei ding uh hi. Sisan luansakna in leitang ninsaka, sisan a kiluansak nasa leitang ah khatpeuh sisan mah a luan kei ngal leh mawhna thoihdamna kibawl thei lo hi.

³⁴Keimah TOPA Israel-te lakah teng ka hi manin keima omna, note tenna leitang ninsak kei un,’ ci-in gen in," a ci hi.