Read Zokam Misimna 8 Bible Online

Misimna 8 - Zokam bible

Misimna 8

¹TOPA in Moses tungah,

²"Aaron hopih inla ama kiangah, ‘Meivak sagihte na vak ciangin meivak tunna mailam teng a taan dingin vak in,’ ci in," a ci hi.

³Aaron in tua bangin a hih hi; TOPA in Moses a thupiak bang tektekin meivakte, meivak tunna mailam nga-in a vak hi.

⁴Hih in meivak tunnate kibawl zia ahi hi: Tua in a bul pan a paakte dongin sek-a kiseek kham ahi hi. TOPA in Moses a lahsa bang lianin meivak tunna kibawl hi.

⁵TOPA in Moses tungah,

⁶"Israel dangte lak panin Levi-te lakhia inla amaute siangsak in.

⁷Amaute na siansak nadingin hicih hih in: Amaute tungah sianna tui theh in; tua ciangin a pum tungua mul khempeuh metsakin a puansilhte uh sawpsak inla amau le amau kisiansuahsak in.

⁸Bawngtalno khat tawh an-a biakna, annel limci sathau helsa amaute lasak in; tua khit ciangin mawhna hanga biakna dingin bawngtalno a nihna na lasak ding hi.

⁹Kikhopna Puanbuk mai-ah Levi-te paipih inla Israel mipi bup kikhawmsak in.

¹⁰TOPA mai-ah Levi-te na paipih dinga Israel-te in amaute tungah a khut uh a nga ding uh hi.

¹¹Amaute in TOPA na a sep theih nadingun Aaron in Israel-te panin TOPA mai-ah Levi-te vei-a biakna bangin a pia ding hi.

¹²"Levi-te in bawngtalnote tungah a khut uh a ngak khit uh ciangin, Levi-te adingin thoihdamna bawlna-in TOPA tungah mawhna hanga biakna-in zang unla, a khat pen meihal biakna-in zang un.

¹³Aaron le a tapate mai-ah Levi-te dingsak un, tua ciangin amaute vei-a biakna bangin TOPA tungah pia un.

¹⁴Hih bangin Israel dangte panin Levi-te na tuam koih dinga, Levi-te kei aa ahi ding uh hi.

¹⁵"Levi-te na siansak khit vei-a biakna bangin na piak khit ciangin amaute Kikhopna Puanbuk ah amau nasep sem dingin a pai ding uh hi.

¹⁶Amaute Israel mi kei tunga hong kipiasate ahi uh hi. Keimah in tacil, Israel numei pana tapa upa pen tangin amaute ka sang hi.

¹⁷Israel tacil apa peuhmah mihing ahi a ganhing ahi zongin kei aa ahi hi. Egypt ah tacil khempeuh ka vatmai lai-in kei adingin amaute ka tuamkoih hi.

¹⁸Tua hi a, Israel tapa upa pen khempeuh tangin Levi-te ka la khin zo hi.

¹⁹Amaute adingin thoihdamna na bawl dinga a pai uh ciangin pulpi in Israel-te a vat loh nadingin Israel mite tanga Kikhopna Puanbuk a nasem dingin Israel mite khempeuh lak panin Levi-te Aaron le ama tapate tungah ka pia hi," a ci hi.

²⁰TOPA in Moses a thupiak bang tektek in Moses, Aaron le Israel mipi bup in Levi-te tungah a hih uh hi.

²¹Levi-te in amau le amau kisiangtho sakin a puan uh a sawp uh hi. Tua ciangin Aaron in vei-a biakna bangin TOPA mai-ah amaute pia-a, amaute a siantho nadingun thoihdamna a bawlsak hi.

²²Tua khit ciangin Kikhopna Puanbuk a Aaron le a tapate ukna nuai-ah amau nasep sem dingin Levi-te a pai uh hi. TOPA in Moses a thupiak bang tektekin amaute in Levi-te tungah a hih uh hi.

²³TOPA in Moses tungah,

²⁴"Levi-te tungah hih zang in: Kikhopna Puanbuk-a nasem dingin pasal kum sawmnih le nga pan a tungsiah a kuan ding uh hi;

²⁵ahi hangin a kum sawmnga a phate a nasepna panun tawlnga ding uh a, na a sem nawn kei ding uh hi.

²⁶Kikhopna Puanbuk a, a sanggamte uh nasep a huh thei ding uh hi; ahi hangin amau mahmah in na a sem peuhmah kei ding uh hi. Tua hi a hih in Levi-te tavuan na piakzia ding ahi hi," a ci hi.