Read Zokam Micah 4 Bible Online

Micah 4 - Zokam bible

Micah 4

¹Ni nunung ni ciangin mualliante lakah TOPA biakinnpi mual a lianpenin kikoih ding hi; mualneute tungah kilaamto dinga, mite in a zuan ding uh hi.

²Minam tampite pai-in, "Hong pai un, Jacob innkuante’ Pasian’ inn omna TOPA mualtungah kahto ni, ama lampi i tot theih nadingin a lampi hong hilh ding hi," ci ding uh hi. Zion panin thukham hong paikhia dinga, Jerusalem panin TOPA kammal hong paikhia ding hi.

³Mi tampite kikal thu khensak dinga, gamlapi-a minam thahatte kitotna a vengsak ding hi. Amaute in a namsaute uh lei kalhna tu in sek ding uh a, a teipite uh heuhna temin a sek ding uh hi. Minam khat le minam khat namsau kiliiksan nawn lo ding uh a, galsim dingin zong a kisin nawn kei ding uh hi.

⁴Mi peuhmah ama lenggui nuai le ama theikung nuai-ah tu dinga, Thahatpen TOPA gensa ahi manin kuamah in amaute a lausak kei ding hi.

⁵Minam khempeuh amau pasian min tekin a kalsuan ciat ding uh hi; ei i hileh a tawntungin TOPA eite Pasian minin i kalsuan den ding hi.

⁶TOPA in, "Tua ni ciangin khebaite ka kaikhawm dinga, saltaangte le ka dahsak mite ka gawm ding hi.

⁷Khebaite a baanglai-in ka bawl dinga, gamlapi-a minam khauhin ka bawl ding hi. Tua ni-a kipan Zion mual tungah TOPA in a uk tawntung ding hi.

⁸Tuuhon cinna tausang aw, Zion tanu’ mun muanhuai a[11] aw, na kumpi-gam uh no hong kipia kik ding hi; Jerusalem tanu kumpi hi ding hi.

⁹Bang hangin nakpi-a kap na hi hiam - kumpi nei lo na hi hiam? Na thulakte mangthangin, numeite thuak ngei natna in hong mat tawh kibang hi lo ahi hiam?

¹⁰Zion Tanu aw, numei thuak ngei thuak bangin na sa-in, kinuai in; ahang in, khuapi nusia-in gam sungah giahphual na sat ding hi. Babylon ah na pai ding hi; tua lai-ah hong kihukhia ding hi. Tua lai-ah na galte khut panin TOPA in nang hong tankhia ding hi.

¹¹Ahi zongin tu-in nang langkhat ah minam tampite kikhawm uh hi. Amaute in, "Amah buahsak ni, i mitin Zion kaikhit ni!" ci uh hi.

¹²Ahi hangin amaute in TOPA ngaihsutna a thei kei uh hi; ancilna phuala buhphalte khop bangin kaihkhop dinga a geel ahilam a theitel kei uh hi.

¹³Zion Tanu aw, tho inla cil in, ahang in, sik ki nang kong pia ding hi; sumngo khepek kong pia dinga, minam tampite na sikkham zan ding hi," cikhia hi. Amaute in a thulam lo-a a ngah khempeuh uh TOPA apin, leitung khempeuh’ Topa tungah a hauhna uh a ap ding uh hi.