Read Zokam Micah 7 Bible Online

Micah 7 - Zokam bible

Micah 7

¹Hamsia na zen ing e! Lenggah a heu laitaka singgah lawh a sawmpa tawh ka kibang hi. Lokhia a neknek ding lenggah om lo a, ka lunggulh theigah palte a om kei hi.

²A pasian-mite leitungah beimangta a, thutaka dingtang mi khat beek a om kei hi. Mi khempeuh in sisan luansak ding bek ngak uh a; amau sanggamte lenthang a siah uh hi.

³A khutte gel uh gitloh nasep ding siam mahmah a, a gam-ukte un letsong ngenin, thukhente in golhguk sang uh a, thuneite amau deih bangin thu sit uh a - a vekun a kithu tuak uh hi.

⁴Amaute a hoihpen nangawn ling tawh kibang uh a, a thutangpente lingdawn hiam sangin siazaw uh hi. Na galvilpa ni, nang kiangah Pasian hong hawh ni tung zo hi. Tu-in amaute lungkham ding hun hi ta hi.

⁵Na vengpa muang kei in; lawm khatpeuh pisan pah kei in. Na kianga lum na kawinu tungnangawn ah na thugen ding kidawm in.

⁶Ahang in, tapa in a pa pahtawi lo a, tanu in a nu langbawlin mo in teknu a langbawl hi - mi khat gal in amau innkuan sung mah ahi hi.

⁷Ahi zongin ke’n ka hileh lametna tawh TOPA ka en gige a, ka honpa Pasian ka ngak hi; ka Pasian in ka thu hong ngai ding hi.

⁸Ka galte in hong awi vial kei un! Ka puk hangin ka tho ding hi. Khuamial lakah ka tut hangin, ka khuavak TOPA hi ding hi.

⁹Ama langkhat ah ka mawh hangin ka thu hong thumsak mateng TOPA thangpaihna ka thuak dinga amah in kei hong diksak ding hi. Amah in khuavak ah kei hong puakkhia dinga thumaan ka mu ding hi.

¹⁰Tua ciangin ka galte in mu ding uh a, kei tungah, "TOPA na Pasian koi-ah om hiam?" hong cite maizumin a kihum ding uh hi. Tuanu kisiatna ka mitin ka mu ding hi; tu nangawnin lam lian a buandim bangin khe tawh a kituancil ding hi.

¹¹Na kulh uh cian kik ding ni le na gamgite uh a kikhan ni hong tung ding hi.

¹²Tua ni ciangin mite Assyria pan le Egypt khuapite pan, Egypt pan Eupharates ciang dong nangawn le tuipi pan tuipi dong le muallian pan muallian dongin na kiangah hong pai ding uh hi.

¹³A tunga teng mite gamtatnasa hangin leitung gamkhing a suak ding hi.

¹⁴Lei hoiha lonona mun tulaka a[23] amau le amau a teng na innluah ding na mite, nangma tuuhonte na ciangkhutin cing in. Tanglai peka bangin Bashan le Gilead ah amaute tasak in.

¹⁵"Egypt pan na paikhiat lai mah bangin ka na lamdangte amaute ka lak ding hi."

¹⁶Minamte in mu ding uh a, a vangliatna uh maizumpih ding uh hi. A kam uh hum ding uh a, a bil uh a ngong ding hi.

¹⁷Amaute in gul bangin leivui liak ding uh a, leitungah ganhing bangin a bokvak ding uh hi. Kawhawm sung panin ling kawmin amaute pusuakkhia ding uh hi; TOPA eite Pasian kihta in kihei ding uh a, note zong hong kihta ding uh hi.

¹⁸Na innluah dingin a baanglaite khialhna maisaka a mawhna uh a phelsak nang tawh kibang Pasian kua om ahi hiam? Na heh den kei a, na lainatna na lak hi.

¹⁹Kote nong khuatuah kik ding hi; ka mawhnate uh khepek nuai-ah sikcipin, ka khialhnate uh tuipi thuk sungah na lawnmang ding hi.

²⁰Tanglai pekpeka ka pate uh tunga na kiciamsa bangin Jacob tungah thumaanin Abraham tungah na lainatna na lak ding hi.