Read Zokam Nahum 1 Bible Online

Nahum 1 - Zokam bible

Nahum 1

¹Nineveh tawh kisai thusuak khat. Elkhosh-te Nahum mangmuhna laibu ahi hi.

²TOPA in a aam le phula Pasian ahi hi; TOPA in phu la-a thangpaihna tawh a dim hi. TOPA in ama galte tungah phu la-a, a galte langah a thangpai hi.

³TOPA heh baih lo-a, vanglian mahmah hi; TOPA in a khialte dan tuaksak loin a om kei hi. A paina-ah huihpi nungin pingpei kipei-a, meiite a khepeka leivui ahi hi.

⁴Amah in tuipi tai-a keucip hi; amah in gunte khempeuh a kangsak hi. Bashan le Carmel-te keugaw in Lebanon pakpalhte a vul hi.

⁵Ama mai-ah mualliante kilinga, mualneute a tuisuakmang hi. Ama omna ah leitang le leitung le a sunga omte khempeuh kiling uh hi.

⁶Ama lunghamna kua in nangzo ding hiam? Amah hehluatna kua in thuakzo ding hiam? A thangpaihna mei bangin a sungkhia hi; ama mai-ah suangtumte kitamzan hi;

⁷TOPA hoih a, lungkham hunin bukna ahi hi. Amah a muangte don a,

⁸ahi hangin Nineveh tuikhang tuumsakin a beisak ding hi; a galte khuamial sungah a delhkek ding hi.

⁹TOPA langah a sawmsimnate khempeuh uh amah a[1] in a beisak ding hi; lunghimawhna nih vei hong tung lo ding hi.

¹⁰Amaute ling lakah awkin a zu dawn uh kham ding uh hi. Lopa keu bangin kangtum ding uh hi. b[2]

¹¹Nineveh aw, nang sungah TOPA langbawl sawma, gitlohna thukuppih khat piangkhia hi.

¹²TOPA gen hih ahi hi: "Amaute hat mahmah in a tam mahmah uh hangin kiphuktanin a maimang ding uh hi. Judah aw, nang kong bawlsiat khit hangin kong bawlsia kik nawn kei ding hi.

¹³Tu-in note ngawnga hakkol ka sutan dinga na kolte uh ka bottat ding hi," a ci hi.

¹⁴TOPA in nang Nineveh tawh kisai-in thu hong pia khin hi, "Na min pua dingin suan le khak na nei nawn kei ding hi. Na pasian biakinn sunga om na bawltawm uh limte le na sun uh milimte ka susia ding hi. Note siahuai lua na hi manun na hankhuk ding uh ka bawl ding hi," a ci hi.

¹⁵Hua mualliante tunga thuthak hoih hong puakpa, kilemna tangkopa khe en in! Judah aw, na pawite uh bawl unla, na kiciamnate uh tangtungsak un. Migilote in note hong sim nawn kei ding uh hi; amaute kisusiamang ding hi.