Read Zokam Habakkuk 1 Bible Online

Habakkuk 1 - Zokam bible

Habakkuk 1

¹Kamsang Habakkuk ngah thusuak.

²TOPA aw, ken nong huh ding bangtan vei hong ngenin, nang hong za lo lailai ding na hi hiam? Ahikeh, "Ngongtatna" ci-a kong kiko hangin hong hon lo na hi hiam?

³Bang hangin thutanglohnate hong musak na hi hiam? Bang hangin thukhial thuak keikai na hi hiam? Siatna le ngongtatna ka maingat hi. Kitotna le kilangneihna in hong umcih hi.

⁴Tua ahi ciangin thukham in thu nei nawn loin thumaanna a tungnung ngei kei hi. Thutang a kikawnghek theih nadingin migilote in thumaan mite a umcih uh hi.

⁵"Minamte enin vil dih un - lamdang na sa mahmah ding uh hi. Ahang in, note tungah hong kigen taleh na uploh ding uh thu, no hunin kong tungsak ding hi.

⁶A cikzia lo, a hiamgamh mi Babylon-te a[1] ka tawisang dinga, amaute in leitung khempeuh zo khinin amau aa ahi lo mite tenna munte nangawn a laksak ding uh hi.

⁷Amaute kihtak huai-in a mulkimhuai mi hi uh a, amau mah thukham hipahin amau kipahtawina a thupisak uh hi.

⁸A sakolte uh gialbem sangin manlangzaw a, khuamial kuana keivom sangin kihtakhuai zaw hi. A sakol tuangte uh gamlapi panin hong kipan uh a, a sakolte un a khecin uh phutin a kop dian uh hi. Amaute, sa ne dinga bawhsuk musane lengte tawh kibang uh hi,

⁹a vekun a ngongtatsa-in a kuan uh hi. Sehnel-gama huih bangin a sakolte b[2] un mainawt uh a, sehnel bangin thongkiate a khawm uh hi.

¹⁰Kumpite ciamnuihbawl uh a, gam-ukte a selpho uh hi. Kulh a ki-um khuapite nuihsan uh a, lei sungvumin laziau uh hi.

¹¹Tua ciangin huih nung bangin paisuak uh a - amau hatna pasian-a a nei mikhialte ahi uh hi," ci-in a dawng hi.

¹²TOPA aw, mong nei lo hi lo na hi hiam? Ka Pasian, keima Siangtho Pa, ka si kei ding uh hi. TOPA aw, kote thukhen dingin amaute na seh hi; ka Suangpi aw, amaute dan pia dinga na kipsak ahi hi.

¹³Gitlohna et nadingin na mitte ciim lua-a, khialhna na thuak zo kei hi. Tua ahileh bang hangin a zuautatte thuakzo lai na hi hiam? Bang hangin migilote in amaute sanga a thumaanzawte a valhtum laitakun dai hithiat na hi hiam?

¹⁴Nang in tuipi sunga ngasa bangin mite na bawla, a uk om lo tuipi sunga ganhing bangin na bawl hi.

¹⁵A gilo a galte un a vekun ngathang tawh kaikhia uh a, a len uh tawh huai khinin, a domlen un a khawm uh hi; tuateh amah nuamin a lungdam hi.

¹⁶Tua ahi ciangin a len ah ki-ap a, a domlen gimnamtui a hal hi; ahang in, a len uh hangin noptat zo uha, an a duh bangbang uh a ne uh hi.

¹⁷Amah in minamte lainat het lo a, susiasia-in a lente hawmsak lailai ding ahi hiam?