Read Zokam Habakkuk 3 Bible Online

Habakkuk 3 - Zokam bible

Habakkuk 3

¹Kamsangpa Habakkuk thungetna. Shigionoth a[10] tawh kithuah.

²TOPA aw, na minliatna ka za khin a, na sepsate lamdang ka sa mahmah hi, TOPA aw. Ko hunin hong thaksuaksakin, ko hun mahin kitheikhiasak inla, na thangpaih hunin nong lainat ding phawk in.

³Teman panin Pasian hong pai-a, Paran Vum panin Siangtho Pa hong pai hi. b[11] Ama minthanna in vante tuama, amah kiphatna leitung a dim hi.

⁴Ama thupina nisuak tawh kibang hi; ama khut panin nizangte tangkhia hi, ama vangliatna tua ah kisel hi.

⁵Ama ma-ah gimna a pai hi; a kalsuannate a kilawhbaih natna in zui hi.

⁶Amah dinga lei kiling hi; amah khuadaka minamte a lingsak hi. Tangtawng mualliante kitamkham a, tanglai mualneute kicim hi. Ama lampite a tawntung ahi hi.

⁷A lungdong Cushan-te puanbukte le lunggim mahmah a teng Midian-te ka mu hi.

⁸TOPA aw, gunte tungah heh na hi hiam? Luineute tungah thangpai na hi hiam? Na sakolte tung le na gualzawhna lengte tungah na tuan ciangin tuipi tungah thangpai na hi hiam?

⁹Na thal na tuam kei a, thaltang tampi na guang hi. Gunte in leitung na phelkhap hi;

¹⁰mualliante in nang hong mu uh a, toncip uh hi. Tuizeupi kihot suk kihot to hi; tui thukpite hawk uh a, tuihualte sangpipi ah a kilaamto uh hi.

¹¹Na thaltangte a len zalzalna, na teipite khuaphia bangin a tee zalzalna vante ah, ni le kha a khawlcip hi.

¹²Thangpaisa-in leitung na tuancil a, hehsa-in minamte na tuangawp hi.

¹³Nangma mite hukhia ding, nangma sathau nilhpa honkhia dingin na kuankhia hi. Migilote gama makaipa na tuangawp-a, a lutang pan a khepek dong na hawkkhia hi.

¹⁴Munbu sungah migentheite a kisukgawp bangin, kote hong delh dingin ama galkap hangte hong kuankhiat laitakin ama teipi -in a lutang na sunlet hi.

¹⁵Na sakolte tawh tuipi na tuangawp a, tuilianpite a kilokgawp hi.

¹⁶Ke’n ka za a, ka lungtang kisai damdamin ka muk linga, ka guh ka tang hong zenin, a muatkhia ding banga, ka khete a ling daldal hi. Tua hi taleh ko hong simgawp minamte tungah kisiat ding ni lungduaitakin ka ngak ding hi.

¹⁷Theikungte a pak kei zongin, lenggui ah lenggah gah loin, olive a gah kei zongin, lote ah an piang loin, tuubuk sungah tuu khatbeek a om kei zongin gankholna khempeuh hawm khin ta leh,

¹⁸TOPA sungah ka lungnuam lai veve dinga, ka Pasian kei hong Honpa sungah ka lungnuam veve ding hi.

¹⁹Thupipen TOPA keima thahatna hi; ka khepekte sazukpi khe bangsaka, asanna munte ah hong paizosak hi. Tumtheih makaipa ading. Ka khausai tumging pan ahi hi.