Read Zokam Zephaniah 3 Bible Online

Zephaniah 3 - Zokam bible

Zephaniah 3

¹Mite nengniamin a lehdo a kihhuai khuapi, gimna nak thuak na nicia!

²Amah in kuama thu mang loin kuama bawlphat ding a ut kei hi. Tuanu in TOPA muang loin a Pasian kiang a naih nuam kei hi.

³A uliante humpinelkai hawk hi uh a, a gam-ukte a zing-an ding bangmah a nei lo khuamial kuana keivomte ahi uh hi.

⁴A kamsangte uh ki-uangsakin zuautat mi hi uh hi. A siampite in mun siangtho thanghuaisak uh a, thukham tungah a ngongtat uh hi.

⁵Tuanu sungah TOPA thumaan a, khialhna a bawl kei hi. Zingsang khat khit zingsang khat a thutangna zekkhia a, nisimin a zekkhia lo ngei kei hi. Tua hi napi thumaan lote in zumna mel a thei kei uh hi.

⁶"Minamte ka khenkhia khin hi; a panmun muanhuaite uh kisumang khin hi. A kongzingte uh kuama tot loh dingin ka kinusiacipsak hi; a khuapite uh kisia khin hi; kuamah kinusia loin-kuamah a om peuhmah kei hi.

⁷Khuapi kiangah, ‘Kei hong kihta in hong kibawlphatnate sang nuam ta niteh maw!’ ka ci hi. Tua ciangin ama sunga teng mite kikhenkhia nawn lo dinga, a tungah ka dan piaknate khempeuh zong a tung kei ding hi. Ahi hangin a sep ngeite uh sep ding a lawp lai veve ding uh hi.

⁸TOPA in cikhia hi, "Tua ahi ciangin ka mawhsak a[9] ding ni na ngak un; ka hehluatna khempeuh- amaute tunga ka thangpaihna a thuak dingin minamte kumpi-gamte tawh kaihkhop ding ka lungsim ka khentat khin zo hi. Haza a ka hehluatna meikuang in leitung buppi a kangtum ding hi.

⁹Tua ciangin amaute khempeuh in TOPA min lo in liangko kinawkin a na a sep theih nadingun mite muk ka siangthosak ding hi.

¹⁰Cush b[10] gunpite gal panin keimah biakna hong piate, ka thehthang mite in biakna hong puak ding uh hi.

¹¹Tua ni ciangin kei tunga nong khialhna khempeuh hangin kong maizumsak kei ding hi, bang hang hiam cih leh hih khuapi panin amau kiphatsakna nuam a sate ka lakhia ding hi. Ka mual siangtho tungah nang na kiphasak nawn kei ding hi.

¹²Ahi hangin note lakah TOPA min a muang a kiniamkhiatte le a lungnemte ka nusia ding hi.

¹³Israel a baanglaite in khialhna a bawl nawn kei ding uh hi; zuauthu gen lo ding uh a, a kam uah khemna kimu nawn lo ding hi. Amaute in an ne in lum hithiat ding uh a, kuamah in a lausak nawn kei ding hi," a ci hi.

¹⁴Zion Tanu aw, la sa in; Israel aw, kikokhia in! Jerusalem Tanu aw, na lungsim neihzahin lungdamin nuam in!

¹⁵TOPA in na dan thuak ding tawh hong kipelhsak khin hi; na galte hong kilehhawlsak zo hi. TOPA Israel-te Kumpipa, note tawh omkhawm khin hi; note in kisiatna peuhmah na kihta ngei nawn kei ding uh hi.

¹⁶Tua ni ciangin amaute in Jerusalem tungah, "Zion aw, lau kei in; na khutte zawsak kei in.

¹⁷TOPA na Pasian in hong ompih hi, nang hong hon dingin amah thahat hi. Amah nang tungah lungkim mahmah dinga, ama itna tawh daitakin hong omsakin no tungah lungnuamin la sa ding hi,"

¹⁸"A kisehsa pawi hanga na dahnate uh kong lakkhiatsak ding hi; tuate in note adingin vangikpi le mawhsakna ahi hi. c[11]

¹⁹Tua hun ciangin nang hong nengcipte khempeuh dan ka pia dinga, khebaite hu-in a kithehthangte ka kaikhawm ding hi. Amaute omna gam peuhpeuh ah, a maizumna uh phatna le pahtawina ka suaksak ding hi.

²⁰Tua hun ciangin nang kong khawm dinga; tua hun ciangin inn ah nang kong ciahpih ding hi. Na mailam hun a[12] ka hoihsak ciangin note mitmuh tektekin leitung mite lakah hong pahtawi-in kong phat ding hi," TOPA in ci hi.