Read Zokam Haggai 1 Bible Online

Haggai 1 - Zokam bible

Haggai 1

¹Kumpipa Darius in a uk a kum nihna kum, a kha gukna a ni masa ni-in kamsangpa Haggai tungtawnin TOPA in, Judah gam-ukpa Shealtiel tapa Zerubbabel tung le tulpipa Jehozadak tapa Joshua a[1] tungah thu a gen hi:

²Hih in Thahatpen TOPA thugen ahi hi: "Hih mite in ‘TOPA inn lam ding hun tung nai lo hi,’ ci uh hi," a ci hi.

³Tua ciangin kamsangpa Haggai tungtawnin TOPA kammal tunga:

⁴"Hih inn kisiagawpsa-a a om laitakin note inn nopci mahmah ah na om uh kilawm ahi hiam?" a ci hi.

⁵Tu-in Thahatpen TOPA in, "Na omzia uh lim ngaihsut dih un.

⁶Tampitak na suan uh hangin tawmkha bek na at uh hi. Na nek uh hangin na gil uh a vah kei hi. Na dawn uh hangin na duhna uh a kam zo kei hi. Puan na silh uh a na khua uh a lum kei hi. Sum na thalawh uh a sum-ip tawvang khata koih bang lel thaman na ngah uh hi," hong ci hi.

⁷Hih in Thahatpen TOPA gen ahi hi: "Na lampi uh lim ngaihsut dih un.

⁸Mualtungah kuanto unla singbeu va pua un, keimah a sungah omin nuamtak tengin hong kipahtawi theih nading inn lam un," TOPA in ci hi.

⁹"Note in tampitak na lamet uh hangin tawmcik bek pha mawk hi. Inn a na tutsate uh ka mutmang hi. Bang hang hiam?" Thahatpen TOPA in cikhia hi. "Tua pen note khempeuh na inn ding ciat uh lamin na manlah uh a, kei inn a siasa-a a om hang ahi hi.

¹⁰Tua ahi ciangin note hangin vante in daitui kangsaka, leitang in gah a gahsak kei hi.

¹¹Keimah in lote le mualliante tung, ankungte tung, lenggui thak, sathau le lei pana piangte peuhmah, mihingte le ganhonte le khuta na sep uh nate khempeuh tungah guah ka haang hi," a ci hi.

¹²Tua ciangin Shealtiel tapa Zerubbabel, tulpipa Jehozadak tapa Johua le a baanglaite khempeuh in TOPA amaute Pasian thu le kamsangpa Haggai thupuak a mang uh hi, bang hang hiam cih leh TOPA amaute Pasian in amah a sawl ahi hi. Tua hi-a mite in TOPA a kihta uh hi.

¹³Tua ciangin TOPA kamtaipa Haggai in mite tungah hih TOPA thugente puaka TOPA in, "‘Note kong ompih hi,’ ci hi," a ci hi.

¹⁴Tua ciangin TOPA in Judah gam-ukpa Shealtiel tapa Jerubbabel lungsim, tulpipa Jehozadak tapa Joshua lungsim le a baanglai mite lungsim a phonglo hi. Amaute in amau Pasian Thahatpen TOPA inn lam a kipan uh hi.

¹⁵Tua ni pen Kumpi Darius in a uk zawh a kum nihna kum a kha gukna a ni sawmnih le li ni ahi hi.