Read Zokam Haggai 2 Bible Online

Haggai 2 - Zokam bible

Haggai 2

¹A kha sagihna a ni sawmnih le khatna ni-in kamsang Haggai tungah TOPA thu tunga:

²"Judah gam ukpipa Shealtiel tapa Jerubbabel, tulpi Jehozadak tapa Joshua, le a baanglai mite hopih inla amaute kiangah,

³"A masa inn thupina a mu no lakah na om uh hiam? Tu-a pen tawh bang na ci muh uh hiam? No muhna ah bangmah man lo abang hiam?

⁴Ahi zongin tu-in Jerubbabel aw, kihatsak in, ‘TOPA in ci hi.’ Jehozadak tapa tulpi Joshua aw, kihatsak in, no gamsunga tengte khempeuh aw, kihatsak unla na sem un, ‘TOPA in cikhia hi. Ahang in, keimah in kong ompih hi,’ Thahatpen TOPA in cikhia hi.

⁵Hih in Egypt pana na paikhiat lai-un note tawh ka thukhun ahi hi. Tua hi-a keima Kha note lakah om lai hi. Lau kei un,’ ci hi.

⁶"Thahatpen TOPA in hih hong ci hi: ‘ A sawt loin vantungte le leitung tuipi le leikeu, khat vei ka lok kik ding hi.

⁷Minam khempeuh ka lok dinga minam khempeuh deihna hong tungin hih inn minthanna tawh a kidim ding hi,’ Thahatpen TOPA in ci hi.

⁸Ngunte keima aa hi a, khamte zong keima aa mah ahi hi,’ Thahatpen TOPA in cikhia hi.

⁹‘A masa inn minthanna sangin tu laitaka inn a minthangzaw ding hi,’ Thahatpen TOPA in ci hi. ‘Tua hi-a hih munah kilemna ka pia ding hi.’Thahatpen TOPA in cikhia hi," a ci hi.

¹⁰Darius in a uk a kum nihna kha kua kha a ni sawmnih le lina ni-in kamsang Haggai tungah TOPA thu tunga:

¹¹"Thahatpen TOPA gen hih ahi hi, ‘Thukham genna siampite dong in:

¹²Mi khat in a ki-apsa sa them khat a puan kikhep kawmah pua henla, tua a puantualpi kikhepna in anlum pawlkhat ahikeh a kihuan an, lenggahzu pawlkhat, sathau ahikeh an dang khatpeuh sukha leh tua a sukkhak pen a ki-apsa an a suak ding hiam,’ ci in," a ci hi. Siampite in, "Suak lo hi," ci-in a dawng uh hi.

¹³Tua ciangin Haggai in, "Mi khat misi tawh a kisukkhaka a nin a suah khit ciangin hih nate khatpeuh a lawn leh tua a lawn pen anin a suak ding hiam?" a ci hi. Siampite in, "Hihi, anin a suak hi," ci-in a dawng uh hi.

¹⁴Tua ciangin Haggai in, "Hih mite le hih minamte kei muhna ah tua tawh kibang uh hi," TOPA in cikhia hi. ‘A sep peuhpeuh, a piak peuhpeuh uh anin ahi hi.

¹⁵"‘Tu-in, tuni tekteka kipan a[2] hih thu limtakin ngaihsun un. TOPA biakinnpi ding suang a kician ma-in nate bangci om hiam, cih ngaihsun un.

¹⁶Mi khatpeuh tehna sawmnih a vum omna ah a pai ciangin tehna sawm bek na om hi. Mi khatpeuh lengahzu tehna beelpi sawmnga omna ah a pai ciangin tehna sawm nih bek a pha hi.

¹⁷Khuta na sepsate khempeuh uh cinghteeksak, maaibuaksakin, gialpi ka densak hangin kei lamah nong kihei nai kei uh hi,’ TOPA in ci hi.

¹⁸Tuni-a kipan mailam ah tu-a khakua na kha ni sawmnih le li ni TOPA biakinnpi bulpi a kiphuh ni-a kipan limtakin ngaihsun un. Limtakin ngaihsun un:

¹⁹Na saal sunguah anci om nawn lo ahi hiam? Tuhun dong lenggui le theikung, mang kawlsing le olive kungte gah nai lo hi. "‘Tuni-a kipan note thupha kong pia ding hi,’ci hi," a ci hi.

²⁰Tua kha a ni sawmnih le li ni-in Haggai tungah TOPA thu a nihveina tunga:

²¹"Judah ukpipa Zerubbabel tungah vante le leitung ka lok nading thu gen in.

²²Keimah in kumpi tokhomte lumletin, gamdang kumpi-gamte’ vangliatna ka beisak ding hi. Sakollengte le a hawlte ka lawnthal ding hi; sakolte le a tunga tuangte ama sanggampa namsau mahin a tuk ding uh hi.

²³"Thahatpen TOPA in, ‘Tua ni ciangin ka nasempa Shealtiel tapa Zerubbabel aw, nang kong la ding hi,’ TOPA in cikhia hi. ‘Nang hong teel khin ka hi manin ka seal zungbuh bangin kong bawl ding hi,’ Thahatpen TOPA in cikhia hi, ci in," a ci hi.