Read Zokam Zechariah 10 Bible Online

Zechariah 10 - Zokam bible

Zechariah 10

¹Khuakhal kipat hunin TOPA tungah guah ngen un; huihpi meiipite a bawl TOPA ahi hi. Amah in mite tungah guah zusak a, a kua mahpeuh tungah ankungte a pia hi.

²Milimte in zuau kam pau-in, khongkhaite in mangmuhna-zuau mu uh hi; amaute in amaan lopi-in mang khia uh a, a mawkna-in a hehnem uh hi. Tua ahi ciangin mite tuu bangin vakzau uh a, a cing nei lo tuu bangin amaute a kinengniam hi.

³"Tuucingte tungah ka heh suak lua-a, a makaite dan ka thuaksak ding hi; ahang in, Thahatpen TOPA in a ganhonte, Judah innkuante don dinga, gal sunga sakol hatpen a bangsak ding hi.

⁴Judah panin innkiu khuambul suang hong pai dinga, amah panin puanbuk khetphim, amah panin kidona thalpeu, amah panin gam-uk peuhmah, hong pai ding hi.

⁵Amaute a[21] a vekpi un galsimna-a kongzing buannawi a tuancilgawp mi thahatte bang ding uh hi. TOPA in amaute ompih ahi manin gal do ding uh a, sakol galkapte a lawnthal ding uh hi.

⁶Judah innkuante ka thakhauhsak dinga Joseph innkuante ka honkhia ding hi. Amaute khuatuah ka hi manin a ngei uh ka bangsak kik ding hi. Keimah amaute Pasian TOPA ka hi manin ka nial ngei loh bang ka hi ding a, amaute ngetna ka dawng ding hi.

⁷Ephraim-te mi thahat tawh kibang ding uh a, zudawn bangin a lungkim ding uh hi. A tate un tua mu-in kipak ding uh a, TOPA sungah a lungdam ding uh hi.

⁸Amaute khutvanin ka kaikhawm ding hi. Amaute ka tankhia taktak dinga, a masa lai-a bangin tampi a pha ding uh hi.

⁹Mite lakah amaute ka thehthanga, mun tuamtuam gamlapi ah a om uh hangin kei hong phawk ding uh hi. A tate uh tawh amaute suakta in hong ciah kik ding uh hi.

¹⁰Egypt panin amaute ka paikhiatpih dinga, Assyria panin amaute ka kaikhawm ding hi. A om nading uh om lo zah dongin Gilead le Lebanon ah ka tunpih ding hi.

¹¹Amaute in lungkhamna tuipi kantan ding uh hi; tuipi hualte ki-uk zo-in Nile thuknate khempeuh a kangcip ding hi. Assyria kiphatsakna kinuaisiah dinga, Egypt sik ciangkhut a mangthang ding hi.

¹²TOPA sungah amaute ka thakhauhsak dinga, ama minin a kalsuan ding uh hi," TOPA in cikhia hi.