Read Zokam Zechariah 14 Bible Online

Zechariah 14 - Zokam bible

Zechariah 14

¹Gal sunga na vanlakte uh note lakah a kihawm hun, TOPA hong pai ni ding hong tung ding hi.

²Jerusalem do dingin minam khempeuh ka khawm ding hi; khuapi kila dinga, innte kilong gawpin numeite kibuan gawp ding hi. Khuapi alang salin kikai dinga, a om lai teng khuapi pan a kipaikhiatpih kei ding hi.

³Tua ciangin TOPA kuankhia-in gal kido hun lai-a kido bangin tua minamte a do ding hi.

⁴Tua ni ciangin Jerusalem nisuahna Olive Vum tungah a khe in ding dinga, Olive Vum nisuahna pan nitumna lamah phel nih kisuah in, mual alang leilu lamah kikhinin, alang leitaw lamah kikhin dinga kuampi khat a piang ding hi.

⁵Azel dongah mualkuam kizalh ding ahi manin note ka mualkuam tawnin na tai ding uh hi. Judah kumpipa Uzziah hun lai-a zinlin a[26] a na tai bangun na tai ding uh hi. Tua ciangin TOPA ka Pasian hong pai dinga, a siangthote khempeuh amah tawh a paikhawm ding uh hi.

⁶Tua ni ciangin khuavak, ahi a, a vot ahikeh vuk ahi zongin a om kei ding hi.

⁷Ni tangkai ni - TOPA in a theih ni khat hi dinga, sun hun, zan hun cih a om kei ding hi. Nitak hun a tun ciangin khua a vak ding hi.

⁸Tua ni ciangin Jerusalem pan a nungta tui luangkhia dinga, a kimkhat nisuahna tuipi b[27] ah luangin a kimkhat nitumna tuipi c[28] ah tuk tawh khal tawh a luang ding hi.

⁹Leitung buppi ah TOPA , kumpi a hi ding hi. Tua ni ciangin TOPA khat bek om dinga, ama min bek min ahi ding hi.

¹⁰Gamsung buppi, Geba pan Jerusalem leitaw-lam Rimmon dong Arabah tawh kibang ding hi. Ahi hangin Jerusalem kisangsakin a omna ngei-ah om dinga, Benjamin Kongpi a kipan Kongpi Masapen lampang Kiu Kongpi dong, Hananel Tausang panin kumpi lenggah sukna dong ahi hi.

¹¹Tua lai-ah mi teng dinga, a kisusia kik ngei nawn kei ding hi. Jerusalem a lungmuang ta ding hi.

¹²Jerusalem a do minam dangte tungah TOPA in a tunsak ding hih gimna ahi hi: A khe un a ding kimlai asa uh muatin, a mit uh a mitbu sungah muatin, a kam sunguah a leii uh a muat ding hi.

¹³Tua ni ciangin TOPA in mite patauhna lianpi a vat ding hi. Khat le khat kikhutmat ding uh a, khat le khat a kilai ding uh hi.

¹⁴Judah in zong Jerusalem ah a do ding hi. A kimkota minamte khempeuh hauhnate - ngun le kham le puante tampitak a kikhopsak ding hi.

¹⁵Tua giahphualte a om sakolte, sakolneute, kala-ohte, laate le ganhing om khempeuh tungah tua gimna lianpi bangmah a tung ding hi.

¹⁶Tua ciangin minamte khempeuh pana Jerusalem sima a suakta laite khempeuh Thahatpen TOPA bia dingin kum simin kuanto ding uh a, Biakbuk Pawi va bawl ding uh hi.

¹⁷Thahatpen TOPA Kumpipa bia dingin leitunga om mite peuhmah Jerusalem ah a kuantoh kei uh leh amau gamah guah a zu kei ding hi.

¹⁸Egypt gam mite paito-in a va kihel kei uh leh a gamuah guah a zu kei ding hi. Biakbuk Pawi a, a pai nuam lote tungah TOPA d[29] in a tunsak gimna mah amaute tungah a tungsak ding hi.

¹⁹Hih in Biakbuk Pawi a sim nuam lo minamte khempeuh le Egypt-te thuak ding dan ahi hi.

²⁰Tua ni ciangin sakol longte tungah TOPA TUNGAH SIANGTHO HI ci-in kigelh dinga, TOPA inn sunga beelte biakna-tau mai-a kuangkum siangthote a bang ding hi.

²¹Jerusalem le Judah a bel peuhmah Thahatpen TOPA aa in siangtho dinga, biakna pia dinga paite in beel pawlkhat la ding uh a, an huanna-in a zang ding uh hi. Tua hi-a tua ni ciangin Thahatpen TOPA inn sungah Canaan mi e[30] kicite khat zong a om nawn kei ding hi.