Read Zokam Zechariah 2 Bible Online

Zechariah 2 - Zokam bible

Zechariah 2

¹Tua ciangin ka ento a - ka mai-ah a khutin tehna khau a tawi mi khat a na om hi!

²"Koi ah pai ding na hiam?" ci-in ka dong hi. Amah in, "Jerusalem bangcia zai-a bangtan sau hiam cih theih nadingin a teh ding ka hi hi," hong ci hi.

³Tua ciangin kei hong hopih vansawltak paikhia a, vansawltak dang khatin na dawntuahin,

⁴ama kiangah: Tai inla tua tangvalpa kiangah, "Jerusalem kulh nei lo khuapi a suak ding hi. Bang hang hiam cih leh a sungah mihing ganhing tam lua mahmah hi.

⁵Kei mahmah a kimkotah mei kulhpi ka hi dinga, a sung lam pan a minthanna ka hi ding hi, TOPA in ci hi,’ va ci in.

⁶TOPA in, "Hong pai ou! Hong pai ou! Leilu-lam gam panin tai ou,’ ci hi. Ahang in, note, vantung huih lite lakah kong thehthang zo hi," TOPA in cikhia hi.

⁷"Zion aw, hong pai ou! No Babylon Tanu sunga tengte suakta un."

⁸Ahang in, Thahatpen TOPA thugen hih ahi hi: "Amah in kei hong pahtawi khina, nang hong luhgawp minamte langah kei hong sawla - nang hong khoihkha peuhmah ama mit nauta khoihkha ahi hi -

⁹a silate un amaute na a luh nadingun amaute langah ka khut ka kha taktak ding hi. a[1] Tua ciangin Thahatpen TOPA in kei hong sawl ahilam na thei ding uh hi.

¹⁰"Zion Tanu aw, nuam inla kiko in. Ahang in, kei kong pai ta a, note lakah kong teng ding hi," TOPA in cikhia hi.

¹¹Tua ni ciangin minam tampite in TOPA pawlpih ding uh a, keima mi a suak ding uh hi. Note lakah ka teng dinga, Thahatpen TOPA in note kiangah kei hong sawl ahilam na thei ding uh hi.

¹²TOPA in gam siangtho-a a tanh bangin Judah luah dinga Jerusalem a teel kik ding hi.

¹³Mite khempeuh aw, TOPA mai-ah daitakin om un, bang hang hiam cih leh amahmah a tenna mun siangtho panin dingkhia ta hi," a ci hi.