Read Zokam Zechariah 7 Bible Online

Zechariah 7 - Zokam bible

Zechariah 7

¹Kumpi Darius in a uk a kum lina, a kha kuana, Kislev kha, a ni lina ni-in Zechariah tungah TOPA thu a tung hi.

²Bethel mite in Sharezar le Regem-Melech, a mite uh tawh TOPA tungah a thum dingin sawl uh a,

³Thahatpen TOPA inn a siampite le kamsangte kiangah, "Kum tampi sung ka hihsa bangin a kha ngana sung an tangin thum lai ding ka hi uh hiam?" ci-in dongsak uh hi.

⁴Tua ciangin Thahatpen TOPA thu kei tungah hong tunga,

⁵"Gam mite khempeuh le siampite tungah, ‘A beisa kum sawm sagih sung, a kha ngana le a kha sagihna sungin an tangin thu na nget uh ciangin kei ading taktak mah a antang na hi uh hiam?

⁶Tua hi-a na nek na dawn uh ciangin nomau ading mah a pawibawl hilo na hi uh hiam?

⁷Jerusalem le a kima khuapite lung nuamin a daupau lai leh Negev le nitumna lam mualbul zangte a, a kiten lai-in kamsang masate tungtawna TOPA thugente hih thute mah hilo ahi hiam?’ ci in," a ci hi.

⁸Zechariah tungah TOPA thu tung kika,

⁹"Thahatpen TOPA thugen hih ahi hi: Thumaan thutangin thu khen unla khat le khat kilainatin kikhuatuah un.

¹⁰Meigong numeite, pa nei lote, pemtate le mizawngte nengniam kei un. Khat le khat kisiatsak ding na lungsimun ngaihsun kei un,’ ci hi.

¹¹"Ahi hangin amaute in a thusim kei uh hi; lungkhauhin nungngatsan uh a, a bil uh a hum uh hi.

¹²Amaute lungsim thausuang bangin saka thukham ahikeh Thahatpen TOPA in kamsang masate tungtawna ama Kha tawh a gen thute a ngai nuam kei uh hi. Tua ahi ciangin Thahatpen TOPA a heh mahmah hi.

¹³"Thahatpen TOPA in, ‘Ka sap ciangin amaute in ka thu a ngai nuam kei uh hi; tua ahi ciangin amaute in kei hong sap uh ciangin ka ngai kei ding hi,’ ci hi.

¹⁴Huihpi gilo zangin minamte khempeuh lakah amaute ka thehthanga, tua lai-ah pemta a suak uh hi. Amaute nungah a gam uh kinusia-in gamkhingpi suak uh a, a sungtum a pusuak kuamah a om kei hi. Amaute in gam nuam kimlai hih bangin gamkhing a suaksak uh hi," a ci hi.