Read Zokam Zechariah 8 Bible Online

Zechariah 8 - Zokam bible

Zechariah 8

¹Thahatpen TOPA thu kei tungah hong tung kik hi.

²Thahatpen TOPA thugen hih ahi hi: "Zion ka aam mahmah hi; amah ka aamna-in ka sin ka lung a so hi," a ci hi.

³TOPA thugen hih ahi hi: "Zion ah ka kileh dinga, Jerusalem ah ka teng ding hi. Tua ciangin Jerusalem pen Thutak Khuapi kici dinga, Thahatpen TOPA mual pen Mual Siangtho kici ding hi," a ci hi.

⁴Thahatpen TOPA thugen hih ahi hi: "A teek mahmah pitek le putekte khat vei Jerusalem kongzingte ah tu kik ding hi. Tek lua uh ahi manin ciangkhut a khun ciat ding uh hi.

⁵Khuapi sung kongzing teng numeino le pasalno kimawlte tawh kidim ding hi," a ci hi.

⁶Thahatpen TOPA thugen hih ahi hi: "Tua hun ciangin a baanglai hih mite adingin tua pen a piandang tawh kibang ding hi. Ahi hangin kei adingin piandang ding ahi hiam?" Thahatpen TOPA in cikhia hi.

⁷Thahatpen TOPA gen hih ahi hi: "Nitumna le nisuahna gamte panin ka mite ka honkhia ding hi.

⁸Jerusalem a teng dingin amaute ka puak kik dinga, amaute keima mite hi-in, keimah amaute Pasian hihna tawh amaute tungah thumaanin ka muanhuai ding hi," a ci hi.

⁹Thahatpen TOPA gen hih ahi hi: "Thahatpen TOPA inn ding abul kiphuh hun lai-a om kamsangte thugen tu-a a za note aw, biakinnpi kilam theih nadingin na khut uh khauhsak un.

¹⁰Tua hun ma-in mihing ganhing thaman a om kei hi. Keimah in mi khempeuh a vengte tawh kilangneihsak ka hi manin a galte uh hangin lungmuangtaka nasem kuamah a om kei hi.

¹¹Ahi hangin tu-in a beisa-a ka hih bangin hih a baanglaite tungah ka hih nawn kei ding hi," Thahatpen TOPA in cikhia hi.

¹²"Vantungte in daitui kiasakin ankungte hoihtakin po dinga, lengguite gahin leitang in gah a gahsak ding hi. Hih a baanglai mite tungah a luah dingun hihte khempeuh ka pia ding hi.

¹³Judah le Israel aw, minamte lakah hamsiatna na suah khit uh bangin kong honkhia dinga, thupha khat na hi ding uh hi. Kihta kei unla, na khut uh khauhsak un," a ci hi.

¹⁴Thahatpen TOPA gen hih ahi hi: "Na pate un kei hong hehsak ciangin ka hehpih loh bangin note tungah siatna tunsak ding ka khentat hi," Thahatpen TOPA in ci hi,

¹⁵"Tu-in Jerusalem le Judah tungah a hoihin bawl kik dingin ka khensat khin hi. Kihta kei un.

¹⁶Note sep ding hihte ahi hi: Khat le khat thutakin kihopih unla na thukhen zumte uh ah a maan le a hoihin thu khen un;

¹⁷na vengte uh tungah a hoih lo sawm kei unla amaan lopi a kiciam nuamsa kei un. Hihte khempeuh ka mudah hi," TOPA in cikhia hi.

¹⁸Thahatpen TOPA thu kei tungah hong tung kik hi.

¹⁹Thahatpen TOPA gen hih ahi hi: "Judah-te adingin a kha lina, a kha ngana, a kha sagihna le a kha sawmna-a antannate, lungdamna hunte le nuamna pawi suak ding hi. Tua ahi ciangin thutak le kilemna na it un," a ci hi.

²⁰Thahatpen TOPA gen hih ahi hi: "Mi tampite le khuapi tampi-a a tengte hong pai lai ding uh a,

²¹khuapi khata tengte adang khatah pai-in, ‘Eite pai-in TOPA tungah thuumin, Thahatpen TOPA zong pah ni. Kei a paipai ta ka hi hi,’ ci ding uh hi.

²²Tua ciangin mi tampi le a vanglian minamte Thahatpen TOPA zongin, Jerusalem ah pai ding uh a ama tungah a thum ding uh hi," a ci hi.

²³Thahatpen TOPA thugen hih ahi hi: "Tua ni ciangin kam khempeuh le minamte khempeuh sung pan mi sawm in Jew khat a puanmongteep panin lenkipin, ‘Nang tawh tonkhawm ni, bang hang hiam cih leh nang tawh Pasian omkhawm hi, a kicih ka za uh hi,’ ci ding uh hi," a ci hi.