Read Zokam Zechariah 9 Bible Online

Zechariah 9 - Zokam bible

Zechariah 9

¹Hadrach gam langah TOPA langpanna thu tunga, Damascus tungah a tu ding hi - ahang in, mite le Israel behte khempeuh in TOPA a[16] mitsuan uh a -

²gamgi kizawng Hamath le a siam mahmah uh zongin Tyre le Sidon tungah zong a tu ding hi.

³Tyre in ama mun muanhuai ding bawl khin hi; amah in leivui bangin ngun khawm venvan a, kongzing nin zahin kham a nei hi.

⁴Ahi hangin Topa in a neihsate lakmangsakin tuipi tunga a vangliatna susia dinga, tua ciangin amah mei-in a kihaltum ding hi.

⁵Ashkelon in tua mu-in lau ding hi; Gaza nasa lua-in kawigawp dinga, a lametna bei ding ahi manin, Ekron in zong a kawigawp lawh ding hi. Gaza in a kumpipa taan dinga, Ashkelon a kinusiacip ding hi.

⁶Gamdang mite in Ashdod la ding uh a, Philistia-te kiphatsakna ka beisak ding hi.

⁷Amaute kam panin sisan ka lakhia dinga, amaute hakawm panin a kikham ante ka lakhia ding hi. A kinusia laite i Pasian aa hi dinga Judah-te tungah makaite suakin, Ekron ahileh Jebus mite abang ding uh hi.

⁸Ahi hangin ka innkuante galguk hatte panin ka hu ding hi. Tu-in ka mite vil den ka hi manin mi nengniamte in a nuaisiah zo ngei nawn kei ding uh hi.

⁹Zion Tanu aw, nuam mahmah in! Jerusalem Tanu aw, kiko in! En in, na kumpipa b[17] na kiangah thumaanna le hotkhiatna kengin migi-in laa tungah, sin nai loh, laapi ta laano tungah hong tuang hi.

¹⁰Ephraim panin a sakollengte uh leh, Jerusalem panin a galsimna sakolte uh ka lakkhiatsak dinga, a galsimna thalpeute uh ka kuaitan ding hi. Amah in minamte tungah kilemna a tangko ding hi. Ama ukna tuipi khat pan tuipi khat, Gunpi c[18] panin leimong d[19] dong a zai ding hi.

¹¹Nang ading ahileh nang tawh ka thukhunna sisan hangin na thongkia mite tui omlohna dum thukpi panin ka khahkhia ding hi.

¹²Lametna kiate aw, na kulh muanhuai uh zuan kik un; tu nangawnin a zahnih a nang kong piak ding ka genkhia hi.

¹³Ka thalpeu ka kek bangin Judah ka kek dinga, Ephraim tawh ka bulh ding hi. Greece aw, na tapate langkhat ah, Zion aw, na tapate ka thosak dinga, nang galhangte namsau kong bangsak ding hi.

¹⁴Tua ciangin amaute tungah TOPA a kilang ding hi; a thaltangte khuaphelep bangin tee zalzal ding hi. Thupipen TOPA in pengkul a mut ding hi; amah leitaw-lam huihpi lakah kuan dinga,

¹⁵Thahatpen TOPA in amaute a dal ding hi. Amaute in suang sailungtang tawh susia-in a zo ding uh hi. Amaute in dawn ding uh a zukham bangin hawkin, biakna-tau kiute-a sisan thehna e[20] a kizang kuang-uk khat bangin a dim ding uh hi.

¹⁶Tua ni ciangin TOPA amaute Pasian in ama ganhon ahi a mite a honkhia ding hi. Amaute, kumpi lukhu-a suangmanpha bangin ama gam sungah a tee diamdiam ding uh hi.

¹⁷Amaute melhoihin iplah huai si uncia! Anlim in tangvalnote khanphasakin, zuthak in numeinote a khanphasak hi.